حکومت ءَ یک ءُ نیم سال ءِ تہ ءَ معیشت ءَ را برجائی ءِ راہ ءَ ایر کتگ، وزیر مملکت ءِ ھزانگ ءَ پریس کانفرنس

اسلام آباد۔15دسمبر  (اے پی پی): وزیر مملکت ءِ ھزانگ بلال اظہر کیانی ءَ گوشت کہ استیں حکومت ءَ ایوک ءَ یک ءُ نیم سال ءِ تہ ءَ معیشت ءَ را برجائی ءِ بنیات داتگ وھدے کہ آئی ءَ اقتدار ءِ سر ءَ قبضہ کنگ ءِ وھد ءَ جاور سک گران بوتگ اَنت ءُ گشگ بوھگ ءَ اَت کہ اقتدار خار ءِ تاج اِنت۔ اسلام آباد ءَ پریس کانفرنس ءَ گوں تران کنان ءَ آئی ءَ گوشت کہ حکومت ءَ آئی ایم ایف پروگرام ءِ چیر دستی ءَ بنجاہی سرپلس ٹارگٹ ءِ سر ءَ ھچ وڑیں منی بجٹ ءِ ھوار نہ بوتگ ءُ آئی ایم ایف ءِ سرجمیں جائزہ سوبمندیں رنگ ءَ سرجم بوتگ اَنت کہ ایشی ءَ پد آئی ایم ایف بورڈ ءَ منظوری داتگ۔ آئی ءَ گوشت کہ اقتصادی برجائی ءِ آسر ءَ مہنگائی 22درسد ءَ چہ یک ہندسہ ءَ اتکگ، وھدیکہ زرّ ءِ ذخیرہ ءَ مزنیں کساسے ءَ گہتری اتکگ۔ ھمے رنگ ءَ ٹیکس ءِ تہ ءَ جی ڈی پی ءِ تناسب 8.8درسد ءَ چہ 10.3درسد ءَ سر بوتگ ءُ ایف بی آر ءِ ٹیکس ءِ آمدنی ءَ 26درسد ءِ گیشی ریکارڈ کنگ بوتگ۔ بلال اظہر کیانی ءَ گوشت کہ گلوبل ریٹنگ ایجنسی آنی نیمگ ءَ پاکستان ءِ کریڈٹ ریٹنگ ءِ تہ ءَ گہتری ھم حکومت ءِ اقتصادی پالیشی آنی سر ءَ دل یکیمی ءِ ثبوت انت۔ آئی ءَ گوشت کہ نوں حکومت ءِ آیوکیں مول ءُ مراد جندی شوبگ ءِ سروکی ءَ برجائی اقتصادی دیمروئی ءِ ھاترا انت ایشی ءَ چہ زرّ ءِ ذخیرہ گیش مھکم بنت ءُ چاگرد ءِ نزوریں بھر آناں سیت رسیت۔ آئی ءَ گوشت کہ مزن وزیر ءِ ہدایت ءِ پد ءَ 9 ورکنگ گل جوڑ کنگ بوتگ، ایشی ءِ تہ ءَ جندی شوبگ ءَ وتی گپ ءُ تران پیش کتگ۔ بازیں گلاں وتی سوج داتگ کہ آہانی سرا عمل کنگ بوتگ، وھدے کہ آیوکیں ہفتگ ءَ دگہ پنچ گل وتی سوجاں پیش کن انت۔ مزن وزیر ءَ برآمد کنگ ءِ سر ءَ 0.25درسد سرچارج ھم ھلاس کتگ ۔ اپوزیشن پارٹی تحریک انصاف ءِ سرا ایراد گرگ ءَ وزیر مملکت ءَ گشتگ کہ تحریک انصاف ءَ پاکستان ءَ را ڈیفالٹ ءِ نیمگ ءَ کشگ ءِ ھاتر ءَ ہچ وڑیں سنگ یلہ نہ داتگ، آئی ایم ایف ءَ را نمدی نبشتہ کنگ بوتگ ءُ سفارتی سیادی ءَ را تاوان رستگ۔ معیشت، سفارتکاری ءُ دفاع ءِ ھلاپ ءَ منفی بیانیہ چہ نام نہاد رہشون ءَ بندات بیت کہ آڈیالہ جیل ءَ نشتگ ءُ آ سلاہ بندیں اُرد ءِ ھلاپ ءَ نفرت انگیزیں زبان کارمرز کنگ ءَ بوتگ۔ آئی ءَ گوشت کہ بھارتی مزن وزیر مودی ءَ ھم تحریک انصاف ءِ سروک علی امین گنڈا پور ءِ گپ پدا پدا کتگ کہ ملک ءِ واستہ جیڈھ ءِ سبب انت۔ آئی ءَ گوشت کہ جعفر ایکسپریس اُرش ءَ پد گپ ءُ تران ءِ واستہ دعوت دیگ بوھگ ءَ ابید ھم تحریک انصاف ءَ بھر زوری ءَ چہ انکار کتگ ءُ ایشی ءَ پد ھم وتی فوجی ھلاپیں بیانیہ برجاہ داشتگ۔ بلال اظہر کیانی ءَ گشتگ کہ فوج ءَ جنگ سوبمند بوتگ ءُ مرچی ہم افسر ءُ سپاھیگ قربانی دیگ ءَ انت بلے تحریک انصاف ہمے منفی بیانیہ ءِ سرا اوشتاتگ ءُ پارلیمنٹ ءَ آیگ ءَ پد ہم راجی اسمبلی ءَ را راجی دژمن بیانیہ ءِ واستہ کارمرز کنت۔ آئی ءَ گوشت کہ لیفٹیننٹ جنرل (ریٹائرڈ) فیض حمید ءَ را سزا دیگ ءَ چہ پاک فوج ءَ وت مہ وتی احتساب ءِ یک رژنائیں درور ءِ پیش داشتگ، ایشی ءَ را پانزدہ ماہ ءِ کانودی عمل ءَ پد الزام آنی بنیات ءَ دیگ بوتگ۔ آئی ءِ رد ءَ عمران خان ءَ نواز شریف ءُ اے دگہ سیاسی سروکانی ھلاپ ءَ ھمے مردم ءِ وسیلگ ءَ پولیس ءِ کرد پیلو کتگ ۔ وزیر مملکت ءَ گوشت کہ اے درستیں کار ءُ کرد ءِ داد انت ءُ وت مہ وتی احتساب ءِ عمل برجاہ مانیت۔ آئی ءَ اے گپ ءِ سر ءَ زور پر دات کہ حکومت اقتصادی گہتری ءُ برجمی ءَ را دل یکیمی کنت ءُ تحریک انصاف ءَ تباہی سوچ ءِ بدل ءَ جوڑیشت ءِ سیاست بہ زیر ایت ۔ آئی ءَ گوشت کہ راجی ٹیرف پالیشی ءِ ھم جار جنگ بوتگ ایشی ءَ چہ صنعتی شوبگ ءَ آسراتی رس ایت ءُ معیشت ءَ را گیش مھکم بیت۔ حزانگ ءِ وزیر مملکت بلال اظہر کیانی ءَ گشتگ کہ حکومت پرائیویٹ سیکٹر ءِ سرجمی ءَ دلبڈی دیگ ءَ انت پرچا کہ کارخانہ جوڑ کنگ ءُ روزگار ءِ موہ پیداک کنگ بنیاتی رنگ ءَ پرائیویٹ سیکٹر ءِ ذمہ واری انت۔ آئی ءَ گوشت کہ حکومت ءِ کرد ایش انت کہ آ پالیشی جوڑ بہ کنت، آسراتی بہ دنت ءُ کاروباری ماحول ءِ پجاری ءَ بہ کنت تانکہ سرمایہ کاری ءِ تہ ءَ گیشی بہ بیت ءُ معیشت برجائی بہ بیت۔ آئی ئَ گوشت کہ سیاسی رنگ ئَ حکومت سوبمندی ئِ نیمگ ئَ جنزگ ئَ اِنت، آئین ئِ تہ ئَ ریاستی ادارگ وتی کرد ئَ پیلو کنگ ئَ اَنت۔ بلال اظہر کیانی ءَ گوشت کہ پی ٹی آئی ءَ گپ ءُ تران ءِ واستہ کوشست آناں کدی جوانیں پسو نہ داتگ، ایشی ءِ سبب ءَ سیاسی درجہ حرارت کم کنگ نہ بوتگ۔ وزیر مملکت ءَ گیش گوشت کہ خیبر پختونخوا ءَ جان سلامتی، وانگ ءُ زانگ یا گورننس ءِ ھوالگ ءَ اڈیالہ جیل ءَ چہ کدی ھچ وڑیں گپ ءُ تران نہ بوتگ وھدے کہ اے درستیں سیاسی قوت آنی ذمہ واری اِنت کہ آ الس ءِ دیم ءَ اوشتاتگیں راستیں جیڈھ آنی سر ءَ دلگوشی بہ دنت۔ آئی ءَ گوشت کہ حکومت جندی شوبگ ءِ گوما شریکی ءَ اقتصادی برجائی، اصلاحات ءُ برجمیں دیمروئی ءِ ایجنڈا ءِ سر ءَ جزمیگ اِنت۔ وزیر مملکت ءِ ھزانگ بلال اظہر کیانی ءَ گشتگ کہ وفاقی حکومت ءِ واھگ انت کہ صوبہ این ایف سی ءِ جیڈھ آنی سر ءَ پچیں ھیال ءِ گوما گپ ءُ تران بہ کن انت۔ آئی ءَ گوشت کہ حکومت آئی ایم ایف ءِ ابید ھم بازیں اصلاحات آناں سرجم کنگ ءِ واستہ جزمیگ اِنت تانکہ ملکی معیشت ءَ را مھکم ءُ وت واجہ جوڑ کنگ بہ بیت۔ وزیر مملکت ءَ گیش ءَ چہ گیش اے گپ ءِ پدرائی کت کہ گورنر ءِ حکومت ءِ آپشن آئین ءِ تہا است انت ءُ اگاں کجام ہم گل ریاست ءِ ھلاپ ءَ مدام بیانیہ ءِ سرا عمل بہ کنت گڈا اے معاملہ آئینی کارروائی ءَ سر بوت کنت۔ بلال اظہر کیانی ءَ اے گپ ءِ سر ءَ زور پر دات کہ وفاق ءُ صوبگ آنی نیام ءَ کمک ءُ جوڑیشت ءِ گپ ءُ تران ملک ءِ دیمروئی ءُ برجائی ءِ تہنا ضمانت اِنت۔