چیئرمین سینیٹ سید یوسف رضاگیلانی نا پاکستان نا پنی آ سٹنٹ مین سلطان گولڈن ءِ جہانی ریکارڈ اس جوڑ کننگ آ مبارکباد

اسلام آباد۔ 15 دسمبر (اے پی پی) چیئرمین سینیٹ سید یوسف رضاگیلانی پاکستان نا پنی آ سٹنٹ مین سلطان گولڈن ءِ ترند انگا ریورس کارجمپ انا جہانی ریکارڈ جوڑ کننگ آ مبارکبادی پیش کرینے۔ چیئرمین سینیٹ تینا تہنیتی کلہو اٹی پارے کہ سلطان گولڈن نا دا بھلا سرسہبی نئے بیرہ اونا جندی خواری، کسبی مہارت و جیرت مندی نا شاہدی ءِ بلکن داڑآن جہانی کہول آ پاکستان نا پن ہم روشنا مسنے۔ سید یوسف رضاگیلانی پارے کہ پاکستانی ورناک چندی بشخ آتیٹی جہانی کہول آ تینا لائخی تے منفنگ ءُ ہرا مچ آ قوم اکن گمرناسوب ءِ۔ اوداعزم انا درشانی ءِ کرے کہ داوڑنا سرسہبی ملک انا ورناتیکن است بڈ مریک و اوفتے مثبت سرجز آتا کنڈآ اتیک۔ چیئرمین سینیٹ سلطان گولڈن کن نیک است خواہی نا درشانی ءِ کرسا دعاکرے کہ او آخبت ہم ہندا عزم، حوصلہ و لگن اٹ پین سرسہبی دوئی کے و پاکستان نا پن ءِ مچ آ دنیا ٹی پین بڑزکے۔