حکومت یک و نیم سال اٹی زرگزران ءِ سوگوی نا کسر آ شاغانے، وزیر مملکت خزانہ نا پریس کانفرنس

اسلام آباد۔ 15 دسمبر (اے پی پی) وزیر مملکت خزانہ بلال اظہر کیانی پارینے کہ ساڑی حکومت بیرہ یک ونیم سال انا وخت اٹی زرگزران ءِ سوگوی نا بنداو فراوان کرینے، وخت اس کہ اقتدار ءِ سنبھالنگ نا وخت آ حالیت آک بھاز مشکل ئسر و تینٹ دا پاننگاکہ اقتدار پِت آتا تاج ءِ۔ اسلام آباد اٹی پریس کانفرنس آن تران کرسا اوپارے کہ حکومت آئی ایم ایف پروگرام نا رداٹ پرائمری سرپلس نا ہدف بیدس منی بجٹ نا دوئی کرے و غٹ آئی ایم ایف جاچ  سرسہبی اٹ پورو کننگا، ہرافتیان پد آئی ایم ایف بورڈ ہم منظوری ءِ تس۔ اوپارے کہ زرگزرانی سوگوی ٹی کبینی 22 درسد آن ککم مرسا سنگل ڈیجٹ اٹی بسنے، وخت اس کہ زرمبادلہ نا کوڑی تیٹی نمان گچینی بسنے۔ ہندا وڑ خراج ٹو جی ڈی پی کچ 8.8 درسد آن ودسا 10.3 درسد اسکان سرمس و ایف بی آر نا خراج ریونیو ٹی 26 درسد ودکی ریکارڈ کننگا۔ بلال اظہرکیانی پارے کہ جہانی ریٹنگ ایجنسی تا کنڈآن پاکستان نا کریڈٹ ریٹنگ اٹی گچینی ہم حکومت نا زرگزرانی پالیسی تیا پت انا شاہدی ءِ۔ اوناپاننگ ئس کہ داسہ حکومت نا بروک آ ہدف نجی بشخ انا کماشی ٹی پائیدار اقتصادی شونداری دوئی کننگ ءِ ہراڑآن زرمبادلہ نا کوڑی پین سوگو مریک و نزور تپہ غاتے فائدہ رسینگک۔