دِیر انا انصاف اٹ و منظم کاریم اٹ اتنگ آن بیدس علاقائی سوگوی، پائیدار شونداری و انسانی سلامتی ممکن اف، ڈاکٹر مصدق ملک

ریاض۔ 15 دسمبر (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ دِیر انا انصاف اٹ و منظم کاریم اٹ اتنگ آن بیدس علاقائی سوگوی، پائیدار شونداری و انسانی سلامتی ممکن اف، دنیا ءِ گپ وتران، امن، ہم گرنچی و تین پہ تینی شرف نا اصول آتیکن اول سرآن عزم کروئی مریک۔ ترجمان وزارت موسمیاتی بدلی و چاگڑدی ہم گرنچی نا رداٹ داخیال آتا درشانی ءِ او دوشنبے نادے آ سعودی عرب نا دارالحکومت ریاض اٹی اڈ ہلوک اقوام متحدہ نا اتحادِ تہذیب(یواین اےاو سی) نا 11 می جہانی فورم آن تران کرساکرے۔ دا بڑزکو کہولی فورم ’’انسانیت کن گپ وتران نا اِرا عشرہ ‘‘ نا سرحال نا رداٹ اڈ ہلک، ہراٹی اقوام متحدہ نا تہذیب آتا نیام اٹ سیوت نا قیام نا 20 سال پورو مننگ نا ہم جشن ءِ اڈتننگا۔ فورم اٹی جہانی راہشون ، پالیسی ساز ، تعلیم نا چاہندار و سول سوسائٹی نا نمائندہ غاک بشخ ہلکر۔ ڈاکٹر مصدق ملک جہانی نظام اٹی رونما مروک بدلی تے مون آتخسا پارے کہ گڑاس وارخواہی تیا ہڑتوم آ کنڈآتا کمکاری نا جاگہ اسہ کنڈی گام گیج ہلنگ انگ ءِ، ہرا جہانی امن وانصاف کن تشویشناک ءِ۔ بنجائی وزیر داہیت آ زور شاغا کہ حق و انصاف نا اصول آتا اطلاق بے پرخ بایدے مرے۔ اوپیدوار کرے کہ زالبول آتا حق، اقلیت آتا حق، چاگڑدی حق و چناتا حق بنداوی و ناقابل انکار ءُ۔ ہندا رداٹ او فلسطین و کشمیر نا حالیت آتا کنڈآ چکار ترفسا سوج کرے کہ انت فلسطینی و کشمیری تا حق ہم ہنداخہ ہی اہمیت تخک۔ اوپارے کہ کشمیر نا الس ہم اقلیت آتیٹی شمار مریک و اوفتے ہمو حق بایدے ملے ہرا مچ آ دنیا ٹی ایلو اقلیت آتے دوئی ءِ۔