بنجائی وزیر پروفیسر احسن اقبال نا کماشی ٹی علامہ محمد اقبال نا 150 می سال دے ءِ اڈتننگ نا بابت جوڑ نیشنل کمیٹی نا اہم دیوان

اسلام آباد۔ 15 دسمبر (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال نا کماشی ٹی علامہ محمد اقبال نا 150 می سال دے ءِ اڈتننگ نا بابت جوڑ نیشنل کمیٹی نا اہم دیوان اسلام آباد اٹی اڈ ہلک۔ دیوان اٹی بنجائی وزیرحوالکاری و شینکاری عطاء اللہ تارڑ ہم بشخ ہلک۔ دیوان اٹی علامہ محمد اقبال تون اوار اوار قائد اعظم محمد علی جناح نا 2026 اٹی 150 می سال دے (جشن ولادت) نا بابت قومی کہول انا دود آتا اڈتننگ آ سرجمی اٹ سجفنگا۔ داوخت آ پروفیسر احسن اقبال پارے کہ سال 2026 ءِ قائد اعظم محمد علی جناح نا سال گوندنگک و قائد اعظم نا 150 می سال دے ءِ قومی کہول آ شایان شان وڑاٹ اڈتننگک۔ بنجائی وزیرپارے کہ دود آتے گڈیکو دروشم اس تننگ کن اسہ ذیلی کمیٹی اس جوڑ کننگ انگ ءِ ہرا پنچ دے انا تہہ ٹی تینا سلاہ و سوج آتے پیش کیک۔ اوپارت کرے کہ دود آتے بامسخت و گچین کننگ کن مربوط حکمت عملی اختیار کننگے تانکہ اوفتا اثر بیرہ رسمی سلپ بلکن فکری و ہیلکاری پلو ہم تالان مرے۔ پروفیسر احسن اقبال پارے کہ قائدا عظم نا وژن ہی پاکستان نا پورو راہشونی ءِ کیک و اونا اصول  سیوت، ایمان و تنظیم ءِ پبی وڑاٹ تالان کننگک۔ اوداہیت آ زور شاغا کہ قائد اعظم نا زند و قیام پاکستان کن اونا کڑد ءِ نمان کننگ کن آب اٹ راگ سیریز ہم تیار کننگک۔ بنجائی وزیر پارے کہ قائد اعظم نا فکر اینو نا پاکستان کن کسر نا ڈیوا ءِ و حکومت نا پروگرام ’’اڑان پاکستان‘‘ ہم قائد اعظم نا وژن آ تالان ءِ۔ اوپیدوار کرے کہ سلاہ ئی دود آک بیرہ دود آتسکان محدود مفس بلکن اوفتا کمک اٹ قائد اعظم نا کلہو ءِ پوسکن آ چین اسکان گچین وڑاٹ بایدے گدریفنگے۔ دیوان اٹی شریک باسک آک قائد اعظم وعلامہ اقبال نا فکر و فلسفہ ءِ قومی شونداری و شونہالی تون گنڈنگ و الس، خاص کر ورناتیٹی فکری بیداری ودی کننگ کن چندی سلاہ  پیش کریر۔