پاکستان امداد آ سیبو نا جاگہ غا پائیدار زرگزرانی شونداری و تین پہ تینی فائدہ غاتیا تالان شریداری کن واپار و زرکاری ءِ مرکزی حیثیت اس تننگ ءِ، بنجائی وزیر خزانہ نا سی این این بزنس عریبک ءِ انٹرویو

اسلام آباد۔ 15 دسمبر (اے پی پی) بنجائی وزیر خزانہ و محصولات، سینیٹر محمد اورنگزیب پارینے کہ پاکستان داسہ امداد آ سیبو کننگ نا جاگہ غا پائیدار زرگزرانی شونداری و تین پہ تینی فائدہ غاتیا تالان شریداری کن واپار و زرکاری ءِ مرکزی حیثیت اس تننگ ءِ و ہندا حکمت عملی نا رداٹ جہانی شریدار، خاص کر خلیجی ملک آتون اقتصادی رابطہ غاتے پین سوگو کننگ انگ ءِ۔ سی این این بزنس عریبک ءِ انٹرویو ٹی بنجائی وزیر خزانہ پیدوار کرے کہ وزیراعظم نا کنڈآن بیان کروک دا اسٹریٹجک سمت پاکستان نا زرگزانی پت و اصلاحاتی پیش رفت نا ڈیک ءِ ۔ سینیٹر محمد اورنگزیب پارے کہ تدوک آ 18 تُو اٹی پاکستان اسہ جوان میکرواکنامک سوگوی پروگرام آ کاربند مسنے ہراٹی نمان و قابل پیمائش سرسہبی دوئی مسنے۔ کبینی، ہرا اسہ موقع سے آ ریکارڈ 38 درسد اسکان سرمسوسس، داسہ کم مرسا سنگل ڈیجٹ کہول آ بسنے۔ مالیاتی پڑ آ پاکستان پرائمری سرپلس دوئی کرینے وخت اس کہ کرنٹ اکاؤنٹ نسخان مقررہ ہدف آتا تہہ ٹی  ءِ۔ اومستی پارے کہ زرمبادلہ نا کچ اٹی سوگوی بسنے و زرمبادلہ نا کوڑی  گچین مرسا کم و ود 2.5 تُو انا درآمدآتا بریبر مسنے، ہرا پیشن نا مالیاتی سوگوی نا چیدہ ءِ۔ بنجائی وزیر خزانہ پاکستان نا گچین مروک زرگزرانی حالیت آتا اِرا بھلا جہانی سرسہبی تا ذکر ءِ کرے۔ اولیکو دا کہ برجاسال ہر مسٹ آ جہانی کریڈٹ ریٹنگ ایجنسی پاکستان نا ریٹنگ و آؤٹ لک اٹی گچینی کرینو۔ ارٹ میکو داکہ پاکستان آئی ایم ایف نا ایکسٹینڈڈ فنڈ فیسلٹی نا رداٹ ارٹ میکو جاچ ءِ سرسہبی اٹ پورو کرینے، ہرانا منظوری برجاہفتہ آئی ایم ایف نا ایگزیکٹیو بورڈ تس۔ داپیش رفت آتیان جہانی کہول آ پاکستان نا زرگزرانی پالیسی و اصلاحاتی سمت آ ودوک آ پت انا درشانی مریک۔ اوپارے کہ میکرو اکنامک سوگوی مربوط حکمت عملی نا رداٹ دوئی کننگانے، ہراٹی سخت مالیاتی و مالی پالیسی تتون اوار اوار جوان ساختی اصلاحات اوار ءِ۔