پاکستان نا کادوگلی ٹی اقوام متحدہ نا امن دستہ غاتیا جلہو نا ترندی اٹ مذمت

اسلام آباد۔ 15 دسمبر (اے پی پی) پاکستان کادوگلی سوڈان اٹی اقوام متحدہ نا امن دستہ غاتیا مروک آ بہیمانہ جلہو نا سخت انگا لوز آتیٹی مذمت ءِ کرینے، ہراٹی اقوام متحدہ نا عبوری سلامتی فورس ابیے(یواین آئی ایس ایف اے) نا رداٹ خذمت سرتروک آ بنگلہ دیش نا شش امن کارندہ شہید وخت اس کہ چندی پین ٹھپی مسنو۔ دوشنبے نادے آ وزارت خارجہ غان جاری بیان نارداٹ پاکستان دا است ہسون واقعہ ٹی نہادی جان تا زیان آ حکومت بنگلہ دیش و بنگلہ دیش نا الس تون ہڑزخواہی و داسخت ساہت اٹی پدسلوک خاہوت آتون پورو یکجہتی نا درشانیءِ کیک۔ بیان اٹی پاننگانے کہ اقوام متحدہ نا امن دستہ جھیڑہ غاتا توننگ، شاری تا رکھ و اقوام متحدہ نا بیرک نا کیرغ امن نا قیام کن جہانی کوشست آتیٹی صف اول اٹی کڑد ادا کننگ ءِ، نن ہموخرُن آ ہیلمٹ بینوک آ امن کارندہ غاتا عظیم قربانی ءِ خراج عقیدت پیش کینہ  ہرافک ڈیہہ اٹی امن و سوگوی کن تینا جان تے ندر کریر۔ وزارت خارجہ نا پاننگ ءِ کہ پاکستان دا لغور جلہو نا دمدستی و شفاف جاست وپاست نا خواست کیک تانکہ زموار آتا پیدواری ءِ کرسا اوفتے عدالت نا مون آ اتنگ مرے۔ بیان اٹی داہیت انا ہم درشانی ءِ کننگا کہ پاکستان اقوام متحدہ نا سلامتی کونسل نا باسک و جہانی برادری تون اواری اٹ اقوام متحدہ نا غٹ امن دستہ غاتا رکھ و سلامتی ءِ پک کننگ کن تینا کمکاری ءِ برجاتخک۔