پاکستان ءِ دیمروئی گوں مہر ، یکوئی ءُ انسانیت ءِ رھبنداں بندوک اِنت، خواجہ محمد آصف

سیالکوٹ۔14دسمبر  (اے پی پی):وفاقی وزیر دفاع خواجہ محمد آصف ءَ گوشت کہ کرسمس ءِ میلہ سرجمیں دگنیا ءَ گوں عقیدت ءُشرپ  ءَ برجم دارگ بیت۔ حضرت عیسیٰ ءِ پیدائش یک معجزہ یے، حضرت عیسیٰ ءِ تعلیمات پہ انسانیت ءَ داں قیامت ءِ روچ ءَ رژنائی ءِ چراگ انت۔ اے ھیالانی درشانی آئی ءَ سیالکوٹ کانٹ ءَ برجم داشتگیں کرسمس ءِ مراگش ءَ گوں تران کنان ءَ کت۔ آئی ءَ گیش گوشت کہ حضرت عیسیٰ ءَ نزیکی، براتی ءُ وت مہ وتی ءِ احترام ءِ سبق داتگ ءُ کجام ھم مذھب ءِ منوگر اے پیغام ءَ چہ ہٹ نہ بنت۔ وفاقی وزیر دفاع ءَ گوشت کہ آئی ءِ واستہ اے شرپ ءِ گپ اِنت کہ آ عیسائی برات ءُ گہار آنی وشیاں بھر ءُ بانگ کنگ ءَ اِنت۔ آئی ءَ گوشت کہ ھر وھد ءَ کہ عیسائی کمیونٹی آئی ءَ را وتی کجام ھم پروگرام ءَ بھر زورگ ءِ دعوت دنت گڑا آ ھما جاہ ءَ ھوار بیت۔ آئی ءَ گوشت کہ مئے مٹی مئے مستریں بندوک اِنت، کہ مارا یکے دومی ءَ گوں مھکمیں رنگ ءَ بندوک کنت۔ ہما ہمت ءُ جزم کہ مئے بہادریں قوتاں لہتیں ماہ پیسر پیش داشتگ ات، پاکستان ءِ راجدپتر ءِ یک رژنائیں ءُ زرینیں بابے انت۔ اے مزنیں سوب مندی یے کہ ایشی ءِ سر ءَ مرچی نہ ایوک ءَ مارا ناز اِنت بلکیں آؤکیں پدریچ ھم داں قیامت ءِ روچ ءَ ایشی ءِ سر ءَ ناز کن اَنت۔ مئے بہادریں قوتاں مارا یک انچیں موہ یے داتگ کہ ما ایشی ءِ سرا فخر کت کنیں۔ مئے بامردیں لشکر ءَ مارا دنیا ءِ تہ ءَ مزنیں بستارے ءِ رسگ ءِ موہ داتگ۔ پاکستان ءِ دیمروئی ءِ سفر اصل ءَ مہر ءُ یکوئی ءِ سفر انت ۔ پاکستان ءِ دیمروی مہر، تپاکی ءُ انسانیت ءِ اصولاں گوں بندوک انت، ہر مذہب ءُ فرقہ ءِ مردم ہر وھد ءَ ملک ءُ مٹی ءِ گپ ءَ کیت گڑا یکے دومی ءَ گند انت۔ آئی ءَ گیش کرتگ کہ اولی ءُ مستریں گپ ایش انت کہ مئے پیم انسانیت ءِ پیم بہ بیت ءُ اے پیم گوں ملک، وطن ءُ مٹی ءَ بندوک انت۔ آئی ءَ گْوشتگ کہ آیوکیں وھداں مئے ملک گیش دیمروئی کنت، وشھالی کیت، وھدیکہ گریبی ءُ بے روزگاری ءِ تہاری دور بیت۔