بی بی آصفہ بھٹو زرداری ءَ دسمبر ءَ پولیو ءِ گامگیج ءِ واستہ الس ءِ کمک ءِ دزبندی

اسلام آباد۔14دسمبر  (اے پی پی):بانُک اول بی بی آصفہ بھٹو زرداری ءَ چہ مات ءُ پت، سرپرست، السی نمائندگ ءُ چاگردی رہشوناں لوٹ کتگ کہ آ 15دسمبر ءَ بگر داں 21دسمبر 2025 ءَ ملک ءِ توامیں صوبہ ءُ دمگ آنی تہ ءَ پولیو ءِ ھلاپ ءَ راجی ویکسینیشن گامگیج ءَ را سرجمیں رنگ ءَ کمک بہ کن اَنت۔ صدر ءِ مملکت ءِ کارگس ءِ پریس ونگ ءِ نیمگ ءَ یک شمبے ءِ روچ ءَ جاڑی بوتگیں بیان ءِ تہ ءَ عصفہ بھٹو زرداری ءَ گوشت کہ اے گامگیج ءِ سوبمندی ءِ شرط اجتماعی ذمہ واری اِنت ءُ ھاندان آنی نیمگ ءَ چہ اپیل کت کہ آ اے گپ ءَ را دل یکیمی بہ کن اَنت کہ پنچ سال ءَ چہ کم عمریں ھر زھگ ءَ را پولیو ءِ ڈراپ دیگ بہ بیت۔ اے گامگیج ءِ ساھت ءَ سرجمیں ملک ءَ 45.4 ملین زھگ آناں ویکسین کنگ ءِ ٹارگٹ ایر کنگ بوتگ کہ ایشی ءِ تہ ءَ پنجاب ءَ 23.3 ملین، سندھ ءَ 10.6 ملین، خیبر پختونخوا ءَ 7.3 ملین ءُ بلوچستان ءَ 2.66 ملین زھگ آزات جموں ءُ اسلام آباد ءَ ھوار کنگ بنت۔ آئی ءَ گوشت کہ اے گامگیج اوگانستان ءِ دسمبر ءِ پولیو گامگیج ءِ ھمگرنچی ءَ کنگ بوھگ ءَ اِنت تانکہ کورونا وائرس ءِ سیم سر ءَ چہ دیم ءَ شنگ ءُ تالان بوھگ ءَ را بند کنگ بہ بیت۔ آئی ءَ شہید محترمہ بے نظیر بھٹو ءِ کوشست ءِ یات ءَ گوشت کہ پاکستان ءَ اولی راجی پولیو گامگیج 1994 ءَ آئی ءِ سروکی ءَ بندات کنگ بوتگ ءُ آئی ءِ وژن انگت ءَ اے نادراھی ءِ ھلاسی ءِ راجی کوشست آناں رھشونی کنگ ءَ اِنت۔ بی بی آصفہ بھٹو زرداری ءَ گوشت کہ آئی ءِ اے جہد ءِ گوما یک گہتریں ذاتی سیادی یے است، چیا کہ آئی ءَ را ھما ساھت یات اِنت کہ آئی ءِ مات ءَ مزن وزیر ءِ بستار ءَ وت آئی ءَ را پولیو ءِ اولی ڈراپ داتگ اَنت۔ آئی ءِ رد ءَ آ ساھت پولیو ءِ ھلاپ ءَ پاکستان ءِ راجی جنگ ءِ بنداتی نقطہ بوتگ ءُ آئی ءَ اے مول ءُ مراد ءِ ھاترا آئی ءِ زندمان ءِ عزم ءِ شکل داتگ۔ آئی ءَ گوشت کہ سئے روچی گامگیج ءِ تہ ءَ دروازگ ءَ دروازگ ءَ ویکسینیشن کنگ بیت ایشی ءَ پد یک روچے گیش دارگ بوتگ۔ ہائی رسک ءِ دمگاں کہ اودا کمیونٹی ءِ بنیاد ءَ ویکسینیشن ءُ ھاسیں موبائل ٹیم ءِ حکمت عملی ءِ سرا عمل کنگ بوھگ ءَ انت، پنچ روچی گامگیج ءِ سرا دو روچ ءِ گیش کنگ بیت۔ 408484 پولیو ءِ فرنٹ لائن کارندہ سرجمیں ملک ءَ دیم دیگ بوتگ انت کہ ایشی ءِ تہ ءَ دمگ ءِ انچارج، یونین کونسل ءِ میڈیکل افسر ءُ موبائل، فکسڈ ءُ ٹرانزٹ ٹیم ھوار انت۔ بی بی آصفہ بھٹو زرداری ءَ گچین بوتگیں نمائندگ، بنجاہی حکومت ءِ کارندہ، مذہبی رہشون ءُ کمیونٹی ءِ پیریناں چہ ہم اپیل کتگ کہ آ پولیو ٹیم آنی کمک ءَ بہ کن انت، کمیونٹی آنی تہ ءَ رسگ ءِ آسراتی ءَ بہ کن انت ءُ ردیں ھال ءُ اھوال ءُ جھجک ءِ گر ءُ دار ءَ کرد پیلو بہ کن انت۔ آئی ءَ گوشت کہ 11دسمبر ءَ وفاقی وزیر ءِ راجی جان سلامتی ءِ ازمت، ریگولیشن ءُ کوآرڈینیشن ءِ سروکی ءَ دیوان ءَ راجی تک ءَ گامگیج ءِ تیاری آنی سر ءَ چار ءُ تپاسی کنگ بوتگ ایشی ءَ پد چیف سیکرٹری آنی سروکی ءَ صوبائی تک ءَ ٹاسک فورس ءِ دیوان برجم دارگ بوتگ تانکہ سیکورٹی، رسد ءُ یکوئی افرادی قوت ءِ دوبر آمادگی ءَ را دل یکیمی کنگ بہ بیت۔ اے کمپین ءِ سرجمیں صوبگ آنی تہ ءَ سرکاری رنگ ءَ بندات کنگ بوتگ وھدیکہ راجی ءُ صوبائی ایمرجنسی آپریشن سنٹر آنی نیمگ ءَ چہ نزیکیں نگرانی ءُ وھد ءِ سر ءَ کمک ءِ واستہ ہائی رسک ءِ دمگ آنی تہ ءَ تکنیکی کارندہ آناں دیم دیگ بوھگ ءَ اِنت۔ بی بی آصفہ بھٹو زرداری ءَ چہ شہریاں اپیل کتگ کہ آ ویکسین کنوکاں وش آتک بہ کن اَنت، ھرچ بیگواھیں زھگ ءِ ھال ءَ بہ دنت ءُ فرنٹ لائن کارندہ آناں دلبڈی بہ دنت، پرچا کہ ایوک ءَ یکجاھیں کوشست آنی وسیلگ ءَ اے وائرس ءِ ھلاسی ءُ پاکستان ءِ زھگ آنی آیوکیں وھد ءِ رکھینگ بوت کنت۔