وانگ ءُ زانگ ءِ ادارگاں راجی زبان ءِ دیمروئی وھد ءِ لوٹ اِنت، خواجہ محمد آصف

سیالکوٹ۔13دسمبر  (اے پی پی):وزیر دفاع خواجہ محمد آصف ءَ گشتگ وانگ ءُ زانگ ءِ ادارگاں راجی زبان ءِ دیمروئی وھد ءِ لوٹ اِنت، استاد نودربراں وتی راجی زبان ءَ گپ جنگ ءِ سکین ءَ بہ دنت پرچا کہ وانگ ءُ زانگ ءِ مستریں مول ءُ مراد ھم ایش اِنت کہ آ وتی پجار ءَ نوکیں پدریچ ءَ بہ دنت۔ آئی ءَ اے گپ سینٹر آف ایکسیلنس ڈینش گرلز اسکول سیالکوٹ ءَ برجم داشتگیں ھاسیں مراگش ءَ ھاسیں مہمان ءِ بستار ءَ گجرانوالہ ایجوکیشن بورڈ ءَ نامداریں عہدہ زرتگیں نودربر آنی شرپ ءَ بھر زوری کنان ءَ کت۔ اے موہ ءِ سر ءَ صوبائی وزیر محنت ءُ انسانی توان محمد منشاللہ بٹ، ڈپٹی کمشنر سیالکوٹ صبا اصغر علی، باسک صوبائی اسمبلی چوہدری فیصل اکرام، سلطان ٹیپو، طارق میر بول، اسکول ءِ پرنسپل ایرام شیرازی ءُ شہباز حسن ھم ساڑی بوتگ انت۔ وزیر دفاع خواجہ محمد آصف ءَ گشتگ کہ راجی زبان مئے پجار، تہذیب ءُ دود ءُ ربیدگ ءِ نمائندہ انت ءُ ایوک ءَ وانگ ءُ زانگ ءِ کمک ءَ ما وتی نسل ءَ را آئی ءِ پجار ءَ دات کناں۔ آئی ءَ استاداں گوں دزبندی کتگ کہ نودربراں راجی زبان ءَ شاعری، کسہ ءُ داستان بہ وان اَنت دانکہ نودربرانی دل ءَ پاکستانی ءُ راجی پجار برجم بہ بیت۔ آئی ءَ پنجابی زبان ءِ ارزشت ءِ سر ءَ ھم چمشانک دات ءُ گوشت کہ دمگی زبان مئے دود ءُ ربیدگ ءِ میراث اَنت ءُ آھاں ھم ھما ارزشت دیگ بہ بیت۔ وزیر دفاع ءَ گوشت کہ وانگ ءُ زانگ مسلم لیگ ن ءِ حکومت ءِ اولی ترجی بوتگ ءُ ڈینش اسکول ءِ وڑیں ادارگ اے گپ ءِ عملی ثبوت انت کہ حکومت کوالٹی ءُ برابر وانگ ءُ زانگ ءِ موہ پجارینگ ءِ واستہ سنگینیں گامگیج زورگ ءَ انت۔ آئی ءَ گْوشتگ کہ اے وانگجاہ ءَ آیگ ءَ من ءَ وتی کسانی ءِ یات اتک پرچا کہ آئی ءِ پت ءُ پیروکی ھند ھم ھمے میتگ ءَ اِنت۔ مراگش ءِ تہا گجرانوالہ بورڈ ءِ تہا نامداریں عہدہ ءِ ھاتر ءَ زالبولیں نودربر آنی نیام ءَ انعام ءُ اعزازی ڈھال ءِ بہر ءُ بانگ کنگ بوتگ۔ زالبولیں نودربراں جتا جتائیں سرھالانی سر ءَ جوانیں ٹیبلو ھم پیش داشتگ اَنت کہ آھاں ھواریں مردماں سک باز ستا کرتگ۔ گڈسرا وزیر دفاع ءَ نودربر زالبول آنی محنت، استاد آنی کوشست ءُ انتظامیہ ءِ کارکردگی ءَ را شگر ءُ منت درشان کت ءُ نودربر زالبول آنی واستہ وشیں باندات ءِ واستہ نیکیں واھگ آنی درشان کت۔