پنجاب حکومت مہلوک ءِ گہبود ءِ  منصوبگاں پیلو کنگ ءَ انت، رانا تنویر حسین

شیخوپورہ۔ 13 دسمبر (اے پی پی):راجی فوڈ سیکیورٹی ءُ پٹ ءُ پول ءِ وفاقی وزیر رانا تنویر حسین ءَ چیئرمین پنجاب ماڈل بازار ملک محمد افضل کھوکھر، ڈپٹی کمشنر شیخوپورہ شاہد عمران مارت ءُ باسک پنجاب اعظم عامرتھ ءِ ہمراہی ءَ ماڈل بازار شرق پور شریف ءِ بنگیج کت۔ اے موہ ءِ سر ءَ ڈپٹی کمشنر شاہد عمران مارت ءَ وفاقی وزیر رانا تنویر حسین ءَ را ضلع شیخو پورہ ءَ ماڈل ریحری بازار ءُ سہولت بازار آنی جوڑیشت ءِ بابت ءَ سرپد کت ءُ ھال دات کہ کوٹ عبدالمالک ءَ ماڈل ریحری بازار ءِ جوڑیشت ءَ پد شگور شگور ءَ سہولت بازار ءِ افتتاح کنگ بوتگ۔ آیوکیں بھر ءَ اے بازار ھم رند ءِ سئے تحصیل آنی تہ ءَ بندات کنگ بنت۔ وفاقی وزیر رانا تنویر حسین ءَ گوشت کہ پنجاب حکومت ءَ الس ءِ لوٹ آناں ھیال ءَ دارگ ءَ سہولت بازار بندات کتگ۔ اے پنجاب ءِ سر وزیر مریم نواز شریف ءِ یک انقلابی گامگیج یے کہ ایشی ءِ مستریں مول ءُ مراد مہلوک ءَ را ریلیف دیگ انت۔ آئی ءَ گوشت کہ نواز لیگ ءِ حکومت یک آباد، روشن ءُ مھکمیں پاکستان ءِ جوڑیشت ءِ واستہ استیں وسیلگ آناں کارمرد کنگ ءَ انت۔ دمگ ءِ الس ءَ سہولت بازار ءِ جوڑ کنگ ءِ ھاتر ءَ وفاقی وزیر رانا تنویر حسین، پنجاب اسمبلی ءِ باسک رانا طاہر اقبال ءُ ڈپٹی کمشنر شاہد عمران مارتھ ءِ ھاسیں منت واری ءِ درشانی کتگ۔