وفاقی داخلہ ءِ وزیر محسن نقوی ءَ عراقی ھمکار جنرل عبدالامیر  الشمری ءَ گوں گند ءُ نند کتگ، پاک عراق ءُ عراق ءِ دو نیمگی سیادی ءِ بابت ءَ گپ ءُ تران

برسلز ۔12دسمبر  (اے پی پی): وفاقی وزیر داخلہ ءُ منشیات ءِ کنٹرول محسن نقوی ءَ برسلز ءَ عراق ءِ داخلہ ءِ وزیر جنرل عبدالامیر الشمری ءِ گوما ھاسیں گند ءُ نند کت، ایشی ءِ تہ ءَ پاک عراق ءُ دو نیمگی سیادی ءُ زائرین ءِ آسراتی ءِ واستہ گامگیج آنی ھوالگ ءَ سرجمیں ھیال ءُ لیکہ آنی تبادلہ کنگ بوت۔ گند ءُ نند ءِ آسر ءَ دوئیں ملک آنی تہی کارانی وزارت آنی نیام ءَ پائیدار ءُ موثر بنیات آنی سر ءَ کمک ءَ را دیمروئی دیگ ءِ واستہ تپاک کنگ بوت۔ عراق ءِ تہی کارانی وزیر ءَ زائرین ءِ گل آنی منظم ءُ ریگولیٹ کنگ ءِ واستہ پاکستان ءِ نیمگ ءَ چست کتگیں گامگیج آناں سک باز ساڑات۔ عراق ءِ تہی کارانی وزیر ءَ وتی پاکستانی ھمکار محسن نقوی ءَ گوں تران کنان ءَ گوشت کہ شمئے دور ءَ اولی رند ءَ زائرین ءِ گل آنی جوڑ کنگ ءِ واستہ موثر گامگیج چست کنگ بوتگ، اے ستا کرز انت۔ عراق ءِ تہی کارانی وزیر ءَ دل یکیمی دات کہ پاکستان ءِ تہی کارانی وزارت ءِ نیمگ ءَ داتگیں لسٹ ءَ ھواریں دراہیں زائرین آناں ملک ءِ تہ ءَ سر بوھگ ءِ موہ دیگ بیت۔ عراق ءَ آیگ ءِ اجازت دیگ بیت۔ وفاقی وزیر داخلہ محسن نقوی ءَ اے گپ پدر کت کہ عراق ءَ رووکیں زائرین ءَ را ہچبر چہ ٹھینگ بوتگیں وھد ءَ چہ گیش نندگ ءِ اجازت نہ دیگ بیت ءُ اے درگت ءَ دوئیں ملک آنی سیادی داروکیں ادارگ آنی نیام ءَ نزیکیں رابطہ برجاہ بیت۔ تہی کارانی وزیر محسن نقوی ءَ زیارتی آنی ھوالگ ءَ سرجمیں کمک ءُ روایتی مہمان داری ءِ پد ءَ عراق ءِ حکومت ءُ الس ءِ شگر ءُ منت گپت ءُ گوشت کہ پاکستانی زیارتی آنی ایمنی، شرپ ءُ آسراتی پاکستان ءِ حکومت ءِ اولی ترجی انت۔ عراق ءِ تہی کارانی وزیر ءَ اے موہ ءِ سر ءَ گوشت کہ آ زوت پاکستان ءِ تر ءُ تاب ءَ کنت تانکہ زیارتی آنی آسراتی، سیکورٹی کمک ءُ دو نیمگی سیادی ءَ را گیش مھکم کنگ ءِ واستہ یکجائی پلان آف ایکشن جوڑ کنگ بہ بیت۔ دوئیں داخلہ ءِ وزیر آنی نیام ءَ سیکورٹی کمک، ناشرکاری ءِ ھلاپ ءَ جنگ ءُ انسانی سوداگری ءِ گر ءُ دار ءِ واستہ یکجائی میکانزم آنی واستہ ھال ءُ اھوال ءِ مھکم کنگ ءُ گیش مھکم کنگ ءِ سر ءَ ھم تپاک کنگ بوتگ۔