بنجائی وزیر واپار جام کمال خان تون ترکیہ نا بڑزکو کہول انا ڈل انا اوڑدہی

اسلام آباد۔ 11 دسمبر (اے پی پی) بنجائی وزیر واپار جام کمال خان تون ترکیہ نا بڑزکو کہول انا ڈل پنچ شنبے نادے آ داڑے اوڑدہی کرے، اوڑدہی ٹی ایوی ایشن، ڈیفنس مینوفیکچرنگ و ہائی ٹیک صنعت آتیٹی کمکاری آ گپ وتران کننگا۔ وزارت واپار آن جاری بیان نا رداٹ اوڑدہی ٹی ترکیہ نا ڈل پاکستان اٹ جوائنٹ وینچرز و ٹیکنالوجی ٹرانسفر و پاکستان اٹ مینوفیکچرنگ یونٹ اس جوڑ کننگ اٹ است خواہی نا درشانی ءِ کرے۔ بنجائی وزیر جام کمال ہڑتوم آ کنڈآتا صنعتی و اقتصادی تعلقداری تے پین سوگو کننگ آ زور شاغا و ایرو سپیس، ڈیفنس پروڈکشن ، منرلز و ڈوئل یوز مینو فیکچرنگ اٹ کمکاری نا گیشتر گمان تےتالان کرے۔ بنجائی وزیر ترک کمپنی تے ڈیہہ انا مارکیٹ آتیکن سٹریٹجک پروڈکشن پارٹنر جوڑ کننگ نا پیش کش کرے۔ ترکیہ نا ڈل پاکستان نا سٹریٹجک وژن نا ستا و مریس مدی کمکاری نا است خواہی نا درشانی ءِ کرے۔ ہڑتوم آ فریق آک بزنس ٹو بزنس رابطہ، زرکاری آ تالان صنعتی شریداری و ٹیکنالوجیکل کمکاری ءِ ودفنگ و آخبت اٹ بینکاری و واپاری فیسلی ٹیشن میکانزم سوگو کننگ آ امنا کریر۔