پاک تیونس سیاسی سلابت نا چارمیکو دور، چندی بشخ آتیٹی کمکاری، ہڑتوم آ کنڈآتا تعلقداری نا پورو دائرہ کار نا جاچ ءِ ہلنگا، دفترخارجہ

اسلام آباد۔ 11 دسمبر (اے پی پی) پاکستان و تیونس نا نیام اٹ ہڑتوم آکنڈآتا سیاسی سلابت نا چارمیکو دور تیونس اٹی اڈ ہلک۔ دفترخارجہ نا کنڈآن پنچ شنبے نادے آ جاری بیان نا رداٹ پاکستانی ڈل انا کماشی ءِ ایڈیشنل سیکرٹری خارجہ (افریقہ) حامد اصغر خان کرے وخت اس کہ تیونس نا ڈل انا کماشی ءِ ڈائریکٹر جنرل (ایشیا) سلیم گھرانی کرے۔ گپ وتران اٹی ہڑتوم آ فریق آک سیاسی کمکاری، بڑزکو کہول انا ہن وبر، واپار و زرکاری،دفاعی و سیکورٹی کمکاری، تعلیم و الس تون الس نا رابطہ غاتون اوار ہڑتوم آکنڈآتا تعلقداری نا پورو دائرہ کارانا جاچ ءِ ہلک۔ او2026 اٹی اسلام آباد اٹی مروک آ 10 می اسیجائی کمیشن نا دیوان آن مست اقتصادی کمکاری ءِ ودفنگ نا وڑوڈول آتیاہم گپ وتران کرے۔ ڈل کثیر الجہتی فورم خاص کر اقوام متحدہ و اسلامی کمکار تنظیم اٹی تین پہ تینی ہم گرنچی ءِ ودفنگ آ امنا کرے۔ اودے ٹک نیامی، فلسطین و قطبی افریقہ نا حالیت آتون اوار علاقائی و جہانی پیش رفت آ ہم گپ وتران کرے۔ ایڈیشنل سیکرٹری خارجہ (افریقہ) وزارت خارجہ نا سیکرٹری خارجہ محمد بن عیید تون ہم اوڑدہی کرے۔ ہڑتوم آ کنڈآک ہڑتوم آکنڈآتا تعلقداری تے پین ودفنگ و غٹ بشخ آتیٹی کمکاری ءِ مون آ دننگ نا عزم انا درشانی ءِ کریر۔ بیان نا رداٹ پاکستان وتیونس نا نیام اٹ متکن دوستانہ تعلقداری ءِ ہرانا خصوصیت تین پہ تینی شرف و خڑکی کمکاری ءِ۔ داسال ہڑتوم آ ملک آتا نیام اٹ سفارتی تعلقداری نا قیام نا 67 می سال دے ءِ اڈتننگ انگ ءِ ۔