پاکستان جہانی دودوربیدہ ئی میرات نا رکھ اکن سنبرینگوک، دا مسخت کن جہانی کہول آ اسیجائی کوشست المی ءِ، بنجائی وزیر اورنگزیب خان کھچی

روم ۔ 11 دسمبر (اے پی پی) بنجائی وزیر قومی میرات و دودوربیدہ اورنگزیب خان کھچی پارینے کہ پاکستان جہانی دودوربیدہ ئی میرات نا رکھ اکن سنبرینگوک ءِ، دامسخت کن جہانی کہول آ اسیجائی کوشست المی ءِ۔ پنچ شنبے نادے آ وزارت قومی میرات و دودوربیدہ نا کنڈآن جاری بیان نا رداٹ اورنگزیب خان کھچی داخیال آتا درشانی ءِ روم اٹی انٹرنیشنل سینٹر فار سٹڈی آف پریزرویشن اینڈ ریسٹوریشن آف کلچرل پراپرٹی (آئی سی سی آر او ایم) نا جنرل اسمبلی نا 34 می دیوان اٹی پاکستان نا نمائندگی ءِ کرسا کرے۔ اوداہیت آ زور شاغا کہ موسمیاتی بدلی، قدرتی آفت و سلہہ بند جھیڑہ غاتا ودوک خطرہ غاتا رداٹ جہانی دودوربیدہ ئی میرات ءِ رکھ کننگ کن اسیجائی کوشست المی ءِ، پاکستان بروک آ چین تیکن اسیجائی میرات نا رکھ انا بارواٹی آئی سی سی آراوایم تون پورو کمکاری کن سنبرینگوک ءِ۔ بنجائی وزیر آئی سی سی آراوایم نا فلیگ شپ پروگرام کون آ ورلڈ ہیریٹیج لیڈرشپ، ڈیزاسٹر رسک مینجمنٹ و ورناتا شمولیت اٹی پاکستان نا پبی بشخ ہلنگ ءِ تالان کرے۔ اوآئی سی سی آراوایم نا سٹریٹجک اولیت 2026-2031نا پبی مخ تفی ءِ کرسا سویل۔ سویل کمکاری ٹی ودکی نا گرج آہم زور شاغا۔ بنجائی وزیر نوکاپ آن پد پاکستان نا دودوربیدہ ئی میرات نا بحالی نا آزموندہ غاتے ہم دیوان نا بشخ ہلوک آتون شیئرکرے ہرافتا ستاءِ کننگا۔ آئی سی سی آراوایم نا دیوان اٹی وزیر دودوربیدہ اورنگزیب خان کھچی نا بشخ ہلنگ پاکستان نا گیشتر دودوربیدہ ئی سفارتکاری نا بشخ ءِ۔ اونا ساڑی بشخ ہلنگ او آئی سی کلچرل فیسٹیول (باکو) تون اوار چندی جہانی فورم تیٹی پاکستان نا ودوک کڑد ءِ تالان کیک، دادورہ غان قومی کہول آ دودوربیدہ ئی میرات نا رکھ اکن تکنیکی کمکاری و علمی ہل و تس نا پوسکن کسر ملنگ نا اومیت ءِ۔