پابندی نا  لوٹاں  ، سیاسی گلاں ھم سیاسی رویہ زورگ لوٹ ایت، بلاول بھٹو زرداری

لاہور۔10دسمبر  (اے پی پی): پاکستان پیپلز پارٹی ءِ چیئرمین بلاول بھٹو زرداری ءَ گشتگ لہتیں سیاسی قوت سوشل میڈیا ءِ وسیلہ ءَ ادارہاں نشانگ جوڑ کنگ ءَ انت کہ ملک ءِ ھاتر ءَ تاوان انت ۔ آئی ءَ چار شمبے ءِ روچ ءَ باغبانپورہ  ءَ پارٹی ءِ مرحوم سینئر کارکن زبیدہ جعفری ءِ ھاندان ءَ گوں دلپدردی درشان کنگ ءَ پد میڈیا ءَ گوں گپ ءُ تران کنگ ءَ ات۔ آئی ءَ گوشت کہ لاہور ءَ کارکن آنی تہ ءَ ھوار بوھگ ءَ چہ وشی اِنت ۔ بلاول بھٹو زرداری ءَ مئی ءَ گوں بھارت ءِ گوما بوتگیں جنگ ءُ جیڑھانی حوالہ ءَ گوشت کہ پاکستان ءَ بھارت ءِ زوراکی ءِ سر ءَ 6بھارتی جنگی بالی گراب آنی سر ءَ تیر گواری کنگ ءَ جوانیں رنگ ءَ پسو داتگ ءُ دگنیا ءَ را یک ھاسیں پیغام داتگ کہ پاکستان وتی آجوئی ءُ سیمسر آنی رکھینگ ءِ تہ ءَ کس ءَ چہ پد نہ کپ ایت۔ آئی ءَ گوشت کہ بھارت ءِ نیمگ ءَ چہ ھوپ ءِ ھست انت وھدیکہ اوگانستان ءِ نیمگ ءَ چہ ناشرکاری ءِ ترس راستی ءِ رنگ ءَ بوھگ ءَ انت۔ ناشرکار چہ اوگانستان ءَ پاکستان ءَ کاینت، آپریشن کن اَنت ءُ پدا کاینت کہ پاکستان ءِ واستہ مزنیں سیکورٹی چیلنج اِنت، البت پاکستان ءِ بہادریں اُرد اے ھترہانی دیم ءَ اوشتاتگ اَنت۔ بلاول بھٹو ءَ گوشت کہ ملک ءِ اندری چیلنج آں گوں ھم گر ءُ چیل بوھگ ءَ انت ءُ اے وڑیں وھد ءَ ھمک راج دوست ءِ زمہ واری انت کہ آ ملک ءُ پاک فوج ءِ ھمراھی ءَ اوشتات کنت۔ آئی ءَ گوشت کہ اے گپ اپسوزی گپ اِنت کہ لھتے سیاسی قوت سوشل میڈیا ءِ وسیلگ ءَ ادارگ آناں نشانگ جوڑ کنگ ءَ اَنت، اے رنگیں رویہ ءِ مول ءُ مراد ادارگ آناں نزور کنگ اِنت، ایشی ءَ چہ ملک ءَ تاوان اِنت۔ آئی ءَ گوشت کہ یک سیاسی گل ءِ سیاسی دجال ءِ کرد ءَ پیلو کنان ءَ الس ءُ فوج ءِ نیام ءَ پرشت ءِ جوڑ کنگ ءِ کوشست کنگ ءَ اِنت۔ اگاں کجام ھم سیاسی گل انتہا پسندی ءِ گل ءِ کرد ءَ پیلو بہ کنت گڑا جُست ءُ پُرس دیم ءَ کاینت۔ تحریک انصاف ءِ رویہ انچوش انت کہ آہانی سرا بندش جنگ بوت کنت۔ کسے بروت اے مردماں بہ گشیت کہ سیاست انتہا پسندی نہ انت۔ اگاں کجام ھم سیاسی گل ناشرکارانی کمک ءَ بہ کنت گڈا گورنر ءِ ھاکمی ءِ ھترہ بوت کنت، البت من اے درگت ءَ کے پی کے ءِ گورنر ءِ بیان نہ دیستگ۔ بلاول بھٹو زرداری ءَ گشتگ اگاں کسے سندھ ءَ کیت ءُ گچین کاری ءَ بہر بہ دنت گڑا مارا وشی بیت ۔ ہر وھد ءَ کہ گچینکاری بنت گڑا پیسر ءَ اصلاحات المی انت۔ آئی ءَ گوشت کہ ما ھچ سیاسی گل ءِ سر ءَ بندش نہ لوٹ آں، بلے سیاسی گل آناں ھم سیاسی رویہ زیرگ لوٹ ایت۔