وفاقی وانگ ءُ زانگ ءُ پیشہ وارانہ تربیت ءِ وزیر مملکت وجیہہ  قمر ءَ امریکی مزنیں تک ءِ ڈل ءَ گوں گند ءُ نند کت، وانگ ءُ زانگ، تکنیکی تربیت ءُ معدنی شعبہ آنی تہ ءَ کمک ءَ را گیش مھکم کنگ ءِ سر ءَ تپاک

اسلام آباد۔10دسمبر  (اے پی پی):وفاقی وانگ ءُ زانگ ءُ پیشہ وارانہ تربیت ءِ وزیر ءِ مملکت وجیہہ  قمر ءَ امریکی مزن تک ءِ ڈل ءَ گوں گند ءُ نند کتگ ءُ وانگ ءُ زانگ، تکنیکی تربیت ءُ معدنیات ءُ کان کنی ءِ شوبگ ءَ دو نیمگی کمک ءِ دیمروئی ءِ ھوالگ ءَ گپ ءُ تران کتگ۔ چار شمبے ءِ روچ ءَ اسلام آباد ءَ پاکستان ءِ نوکیں امریکن ایجوکیشنل فاؤنڈیشن بلڈنگ ءِ بنگیج ءَ پد وزارت ءَ گند ءُ نند بوتگ۔ دوئیں نیمگ ءَ اے گپ ءِ سر ءَ تپاک کنگ بوت کہ نوکیں ماڑی ءَ چہ پاکستان ءُ امریکہ ءِ نیام ءَ وانگ ءُ زانگ ءِ رہشونی، وانگ ءُ زانگ ءِ تبادلہ ءُ وانگ ءُ زانگ ءِ کمک ءَ را گیش دیمروئی رسیت۔ امریکی ڈل ءِ تہ ءَ بیورو آف ایجوکیشنل اینڈ کلچرل افیئرز ءِ پرنسپل ڈپٹی اسسٹنٹ سیکرٹری شیری کینیسن ہال، بیورو آف جنوبی ءُ میان اُستمانی ایشیائی امور ءِ قائم مقام ڈپٹی اسسٹنٹ سیکرٹری شیلی سیور ءُ امریکی سفارتخانہ ءِ مزنیں کارندہ ھوار اتنت۔ گند ءُ نند ءَ وانگ ءُ زانگ ءِ کمک، استاد آنی پیشہ وارانہ دیمروئی، امریکی ایجوکیشنل فاؤنڈیشن ءِ وسیلگ ءَ نودربر ءُ استاد آناں رسائی ءَ را گیش کنگ ءُ تکنیکی ءُ پیشہ وارانہ وانگ ءُ زانگ (ٹی وی ای ٹی) ءِ تہ ءَ کمک ءَ را گیش گیش کنگ ءِ سر ءَ گپ ءُ تران کنگ بوتگ۔ وزیر ءِ مملکت وجیہہ قمر ءَ گوشت کہ پاکستان وتی ورنا آناں جھان ءِ تک ءِ وانگ ءُ زانگ ءِ آسراتی پجارینگ ءُ دوئیں ملک آنی نیام ءَ مردمی سیادی ءَ را گیش مھکم کنگ ءِ واستہ جزمیگ انت۔ وجیہہ  قمر ءَ پاکستان ءِ دراجیں مدتی اقتصادی دیمروئی ءِ واستہ معدنیات ءُ کان کنی ءِ شوبگ ءَ را سک باز المی لیکگ ءَ گوشت کہ پاکستان ءَ نوکیں کان کنی ءِ ٹیکنالوجی، گہتریں جیولوجیکل میپنگ، معدنیات ءِ پروسیسنگ ءُ کارکن آنی تربیت ءِ تہ ءَ امریکی کمک ءَ را وش آتک کنت۔ آئی ءَ گوشت کہ اے شوبگ ءِ تہ شریکداری ءَ چہ جیولوجی، معدنیات ءِ درگیجگ، پروسیسنگ، ءُ نوکیں صنعتی ٹیکنالوجی ءِ پڑ ءَ کارکن آنی واستہ جوانیں روزگار ءِ موہ رس ایت۔ آئی ءَ گیش گوشت کہ اے کمک ءَ چہ ارزشت ءِ گیشی ءَ را گیش کنگ بیت، ایمنی ءِ گامگیج آناں گہتر کنگ ءُ پائیدار کان کنی ءِ جھان ءِ رہبند آناں دیمروئی دیگ بیت۔ گند ءُ نند ءَ پاکستانی ترتیری ادارگ ءُ امریکی کمیونٹی کالج آنی نیام ءَ شریکداری ءَ را گیش کنگ، نوکیں نصاب ءِ دیم ءَ آرگ ءُ میاں اوستمانی تک ءِ سرٹیفیکیشن پروگرام آنی بندات کنگ ءِ سر ءَ ھم تپاک کنگ بوتگ۔ وزیر مملکت وجیہہ  قمر ءَ گوشت کہ پاکستان امریکہ ءِ گوما وتی شریکداری ءَ را ارزشت دنت ءُ وانگ ءُ زانگ، تکنیکی تربیت ءُ نوکیں اقتصادی شوبگ آنی تہ ءَ کمک ءَ را گیش وسعت دیگ ءِ واستہ جزم اِنت۔ مرچی ءِ گپ ءُ تران ءَ معدنیات ءُ کان کنی ءَ ھوار بازیں شوبگ آنی تہ ءَ مہارت آناں دیمروئی دیگ ءِ یکجائی عزم ءِ نوک کنگ بوتگ۔ گند ءُ نند ءِ گڈ ءَ دوئیں ملک آنی نیام ءَ وانگ ءُ زانگ، کار ءِ دیمروئی ءُ جتا جتائیں شعبہ جاتی منصوبگ آنی تہ ءَ کمک ءَ را گیش کنگ ءِ واستہ باقاعدہ رابطہ ءُ عملی گامگیج آنی سر ءَ تپاک کنگ بوت۔