چینی وزیراعظم لی چیانگ نا ورلڈ بینک، آئی ایم ایف و اقوام متحدہ نا کانفرنس واپار و شونداری نا سروک آتون اوڑدہی

بیجنگ۔ 10 دسمبر (اے پی پی) چین نا وزیراعظم لی چیانگ بیجنگ اٹی ’’1پلس 10‘‘ ڈائیلاگ اٹی بشخ ہلنگ کن چین آ بروک آ ورلڈ بینک نا صدر اجے بانگا ، جہانی مالیاتی فنڈ(آئی ایم ایف) نا منیجنگ ڈائریکٹر کرسٹالینا جور جیوا و اقوام متحدہ نا کانفرنس واپار و شونداری نا سیکرٹری جنرل ربیکا گرینسپان تون جتا جتا اوڑدہی کرے۔ سی جی ٹی این نا رداٹ دا وخت آ لی چیانگ پارے کہ چین غٹ فریق آتون اواری اٹ چاربھلا جہانی گام گیج آتے عملی دروشم اس تننگ، حقی کثیر الجہتی پالیسی ءِ تینا کننگ، بریبر و منظم جہانی کثیر قطبی نظام نا شونداری و غٹ اکن شمولیت آ تالان اقتصادی عالمگیریت ءِ مون آ دننگ نا خواہندار ءِ۔ چین ورلڈ بینک اتون کمکاری ءِ برجاتخک و جہانی مالیاتی فنڈ اتون کم کٹیا والا ملک آتا شونداری ٹی کمک نا بشخ آتیٹی کمکاری ءِ پین گہرا کیک۔ اوپارے کہ چین اقوام متحدہ نا کانفرنس واپار و شونداری تون رابطہ و ہم گرنچی ءِ ودفنگ خواہک و گرین معدنیات، ڈیجیٹل زرگزران، مصنوعی ذہانت و کم کاربن گدریفنگ نا بشخ آتیٹی کمکاری ءِ پدریسہ ودفک۔ اجے بانگا، کرسٹالیناجور جیوا و ربیکا گرینسپان چین نا شونداری نا سرسہبی و گلوبل ساؤتھ نا شونداری ٹی چین نا کنڈآن نہادی کمکاری نا ستاءِ کرے۔ اوپارے کہ او چین اتون کمکاری ءِ سوگو کرسا جہانی حکمرانی نا نظام اٹی اصلاحات و گچینی کن اسیجائی وڑاٹ کاریم کننگ نا خواہندار ءِ۔