بنجائی وزیر داخلہ محسن نقوی نا پاک فوج انا دلیر گلزادہ سوار محمد حسین شہید ءِ سلام و خراج عقیدت

اسلام آباد۔ 10 دسمبر (اے پی پی) بنجائی وزیر داخلہ محسن نقوی یوم شہادت آ پاک فوج انا دلیر گلزادہ سوار محمد حسین شہید ءِ سلام پیش کرے و اودے خراج عقیدت پیش کرے۔ تینا بیان اٹی محسن نقوی پارے کہ او شکرگڑھ نا پڑآ جیرت نا پوسکن ءُ تاریخ اس نوشتہ کروک  آ بہادر سپاہی ءِ خراج عقیدت پیش کیک۔ محسن نقوی سوار محمد حسین شہید نا خذمت آتا ستاءِ کرساپارے کہ سوار محمدحسین شہید فولادی عزم اتون دشمن نا ڈٹ کر مقابلہ ءِ کرے۔ اومستی پارے کہ سوار محمدحسین گولہ باری و گولی تا بوچھاڑ آن پد ہم دشمن نا اودیم پوزیشن آتا پیدواری ءِ کرساکرے۔ سوار محمدحسین جون ءِ دلدست آ تخسا دشمن نا ٹھکانہ غاتا بارواٹی فیصلہ کن معلومداری فراوان کرے۔ محسن نقوی پارے کہ سوار محمدحسین شہید انا سہی پیدواری پاکستانی فوج انا پیش گامی ءِ گچین کرے۔ وزیرداخلہ شہید انا قربانی تے خراج تحسین پیش کرسا پارے کہ آتش و آہن نا بیچ سوار محمد حسین آخیریکو دم اسکان دشمن نا گن پوزیشن تے پارسا شہیدی نا جام ءِ نوش کرے۔ محسن نقوی پارے کہ سوار محمدحسین نا شہیدی پاک فوج انا ہرورناکن ثابت گامی و شجاعت نا روشنا حوالہ جوڑ مسنے۔ اوزور شاغا کہ سوار محمدحسین نا معرکہ دشمنان پاکستان کن دوٹوک کلہو ءِ کہ ننا ہر سپاہی وطن آ جان ءِ ندر کننگ اعزاز اس تکک۔