مزن وزیر محمد شہباز شریف ءُ انڈونیشیا ءِ صدر پرابووو سوبیانتو  ءَ اقتصادی ءُ تجارتی سیادی، دفاع، سلامتی، جان سلامتی، وانگ ءُ زانگ، سائنس ءُ ٹیکنالوجی، کشت ءُ کشاری ءُ چاگردی کمک ءَ را گیش مھکم کنگ ءِ واستہ وتی یکجائی جزم ءِ  درشان

اسلام آباد۔9دسمبر  (اے پی پی): مزن وزیر محمد شہباز شریف ءُ جمہوریہ انڈونیشیا ءِ صدر پرابووو سوبیانتو  ءَ اقتصادی ءُ تجارتی سیادی، دفاع، سلامتی، جان سلامتی، وانگ ءُ زانگ، سائنس ءُ ٹیکنالوجی، کشت ءُ کشاری ءُ چاگردی کمک ءِ نیام ءَ گیش مھکم کنگ ءِ یکجائی جزم ءِ پدا پدر کتگ۔ دو نیمگی تجارت ءِ حجم ءَ را گیش کنگ ءِ واستہ تجارت ءِ معاہدہ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ اسلام آباد ءَ مزن وزیر گس ءَ انڈونیشیا ءِ صدر پرابووو سوبیانتو  ءَ را وش اتک کتگ۔ صدر پرابووو سوبیانتو  ءَ را مزن وزیر گس ءَ سر بوھگ ءِ پد ءَ آئی ءَ را گارڈ آف آنر دیگ بوت۔   شرپ مندیں دوئیں رہشون آں دو نیمگی گند ءُ نند کت ایشی ءِ پد ءَ مزن تک ءِ ڈل ءِ تک ءَ گپ ءُ تران بوت۔ گند ءُ نند ءَ نائب مزن وزیر ءُ دری کارانی وزیر محمد اسحاق ڈار، پاک اُرد ءِ سروک ءُ دفاعی اُرد ءِ سروک فیلڈ مارشل سید  عاصم منیر، کابینہ ءِ باسک ءُ مزن مزنیں کارندہ آں شریک کت۔ دوئیں رہشوناں بھارت ءُ پاکستان ءِ نیام ءَ دو نیمگی سیادی ءِ توامیں تک ءُ پھنات آنی سر ءَ چار ءُ تپاسی کت ءُ وت مہ وتی مفاد ءِ توامیں پڑ آنی تہ ءَ کمک ءَ را گیش مھکم کنگ ءِ واستہ وتی یکجائی جزم ءِ سر ءَ زور پر دات، ایشی ءِ تہ ءَ سیاسی ءُ سفارتی سیادی، اقتصادی ءُ تجارتی سیادی، دفاعی ءُ ایمنی، جان سلامتی، وانگ ءُ زانگ، سائنس ءُ ٹیکنالوجی، کشت ءُ کشاری ءُ چاگرد ھوار اَنت۔ دوئیں رہشون آں وت مہ وتی یکوئی آناں گیش ودینگ ءِ سر ءَ ھم تپاک کتگ۔ دو نیمگی تجارت ءِ تہ ءَ بوتگیں پیشرفت ءِ سر ءَ دل یکیمی ءِ درشان کنان ءَ دوئیں رہشون آنی نیمگ ءَ انڈونیشیا ءُ پاکستان ءِ ترجیحی تجارتی معاہدے ءِ سر ءَ چار ءُ تپاسی کنگ ءِ سر ءَ تپاک کنگ بوتگ تانکہ دو نیمگی تجارت ءِ کساس ءَ را گیش گیش کنگ بہ بیت کہ ایشی ءِ ارزشت ءِ کساس 4ارب ڈالر اِنت۔ دیمترا آہاں تجارتی عدم توازن ءِ گیواری ءِ ھاتر ءَ کوشست بندات کنگ ءِ سرا تپاک کتگ۔ دوئیں بامرد آں ھاسیں رنگ ءَ حلال صنعت، کشت ءُ کشاری سامان آنی تجارت، انفارمیشن ٹیکنالوجی، ٹیکنیکل ءُ پیشہ وارانہ تربیت ءُ ایندگر شوبگ آنی تہ ءَ کمک ءِ تہ ءَ گیشی ءِ سر ءَ زور پر دات۔ دوئیں رہشون آنی تہ ءَ ھاسیں سرمایہ کاری ءِ آسراتی کونسل ءُ انڈونیشیا ءِ وت واجہیں دولت فنڈ ءِ نیام ءَ گیشیں کمک ءِ وسیلگ ءَ جتا جتائیں شوبگ آنی تہ ءَ سرمایہ کاری ءُ یکجائی منصوبگ آنی تہ ءَ کمک ءَ را گیش کنگ ءِ سر ءَ تپاک کنگ بوتگ۔ مزن وزیر ءَ صدر پرابو ءِ راجی وشھالی ءِ گامگیج آنی توسیپ کت ایشی ءِ تہ ءَ ’’مفت غذائیت ءِ ورگ‘‘ ءِ پروگرام ھم ھوار اِنت۔ جان سلامتی ءِ شوبگ ءَ کمک ءَ را گیش کنگ ءِ واستہ انڈونیشیا ءِ دلچسپی ءِ سر ءَ دلگوش کنان ءَ مزن وزیر ءَ طبی ماہرین آنی تبادلہ، طبی صلاحیت آناں یکوئی ءِ منگ ءُ ھاسیں تربیت ءِ پھجارینگ ءِ وسیلگ ءَ کمک ءَ را گیش کنگ ءِ راہ آنی شوھازگ ءِ سر ءَ تپاک کت۔ دوئیں بامرد آں کشمیر ءُ غزہ ءِ جاور ھال ءَ ھوار دمگی ءُ جھان ءِ جیڈھ آنی سر ءَ ھم ھیال ریچی کت ۔ دوئیں رہشوناں اقوام متحدہ ءِ سلامتی کونسل ءِ سیادی داروکیں قرارداد ءُ انسانی حق آنی رکھینگ ءِ رد ءَ جیڈھ آناں پرامن گیواری ءِ واستہ وتی یکجائی ءِ جزم ءِ پدا پدر کت۔ مزن وزیر ءَ غزہ ءَ صدر پرابو ءِ فعال سفارتی ءُ انسانی کمک ءِ کوشست آناں ساڑات ءُ جنگ بندی ءِ بندوبست آنی آسراتی ءُ انسانی کمک پجاری ءِ تہ ءَ آئی ءِ کرد ءَ را ساڑات۔ دوئیں رہشون آں اقوام متحدہ، او آئی سی ءُ ڈی 8 ءِ وڑیں کثیر نیمگی فورم آنی تہ ءَ دوئیں ملک آنی نیام ءَ نزیکی ءُ سرگرمیں کمک ءِ ھوالگ ءَ گپ ءُ تران کت۔ مزن وزیر ءَ انڈونیشیا ءَ را ڈی 8 ءِ سروکی ءِ سر ءَ مبارکی دات ءُ انڈونیشیا ءِ صدر ءَ را اے فورم ءِ سرجمیں کمک ءِ دل یکیمی دات۔ گپ ءُ تران ءَ پد دوئیں رہشون آں جتاجتائیں پڑاں مفاہمت نامہ ءُ معاہدہ آنی بدلی ءِ گواہ بوت۔ مزن وزیر ءَ انڈونیشیا ءِ صدر ءُ آئی ءِ ھمراھیں ڈل ءِ شرپ ءَ نان ءِ ورگ ءِ میزبانی ھم کت۔ اے تر ءُ تاب پاکستان ءُ انڈونیشیا ءِ نیام ءَ سفارتی سیادی ءِ جوڑ بوھگ ءِ 75 سالی روچ ءِ درگت ءَ بوھگ ءَ اِنت کہ دوئیں ملکانی نیام ءَ براتی سیادی ءِ تہ ءَ یک سنگ میل ءِ نشان اِنت۔