اشکر ءِ چات آں کار کنگ  ءِ شوبگ  دیمروئی ءِ پڑ ءَ جوانیں  بستار ءِ دار ائیت،  سی ایم بلوچستان

کوئٹہ۔ 09 دسمبر (اے پی پی): اشکر ءِ چات آں کار کنگ  ءِ نمائندگی ءَ یک ڈل ءَ بلوچستان ءِ سر وزیر سرفراز بگٹی ءَ گوں گند ءُ نند کت، ایشی ءِ تہ ءَ کان ءِ چیمبر آف مائنز ءِ جیڈھ، زمین ءِ پھجارینگ ءُ کان ءِ شوبگ ءَ گوں سیادی داروکیں ھاسیں جیڈھ آنی سر ءَ ھیال ءُ لیکہ درشان کت۔ ڈل ءَ بنجاھی وزیر ءِ منت گپت کہ آئی ءَ سرکاری رنگ ءَ کان کنی ءِ شوبگ ءَ را صوبگ ءِ تہ ءَ صنعت ءِ درجہ داتگ۔ سر وزیر بلوچستان ءَ گوشت کہ صوبگ ئِ اقتصادی دیمروئی ءَ کان کنی ئِ شوبگ ئِ مزنیں کرد ءَ انت۔ کان کنی ءَ را یک صنعت ءِ درجہ دیگ ءَ چہ نہ ایوک ءَ کارکن آناں شریں ایمنی رس ایت بلکیں سرمایہ کار ءُ کارکن آنی واستہ سازگاریں چاگرد ھم رس ایت۔ آئی ءَ گوشت کہ صوبائی حکومت ءَ کان کنی ءِ شوبگ ءَ شفاف ءُ نوکیں نظام ءِ جوڑ کنگ ءَ را وتی اولی ترجی آنی تہ ءَ ھوار کتگ۔ بنجاھی وزیر ءَ گیش گوشت کہ کان کنی ءَ گوں سیادی داروکیں مزدور آنی وشھالی ءُ کار ءِ جاور آنی گہتری ءِ واستہ گیش موثر گامگیج کنگ بیت۔ استان ءِ معدنی وسیلگ راجی ءُ میاں اوستمانی سرمایہ کاری ءِ واستہ پچ کنگ بوھگ ءَ انت، وھدیکہ ناجائزیں کان کنی ءِ گر ءُ دار ءُ معدنیات ءِ رکھینگ ءِ واستہ یک جامع حکمت عملی ءِ ھم جوڑ کنگ بوھگ ءَ انت۔ ڈل ءَ چمالنگ ءُ ڈکی ءَ کارکن آنی واستہ ریسکیو سنٹر جوڑ کنگ ءُ اے شوبگ ءَ برجاھیں اصلاحات آنی واستہ صوبائی حکومت ءِ منت واری درشان کت۔ دیوان ءِ تہ ءَ صوبائی وزیر مرہ شب نوشروانی، باسک صوبائی اسمبلی شہزادہ آغا عمر احمدزئی، اے سی ایس ءِ ہوم، سیکرٹری ءُ ڈی جی مائنز ءِ ھواری ءَ دگہ سیادی داروکیں کارندہ ھم ھوار بوتگ اَنت۔