وزیراعظم شہباز شریف نا ٹرانسپرنسی انٹرنیشنل نا پاکستان اٹی کرپشن نا بارواٹی السی تاثر آ تالان رپورٹ آ است جمی نا درشان

اسلام آباد۔ 09 دسمبر (اے پی پی) وزیراعظم محمد شہباز شریف ٹرانسپرنسی انٹرنیشنل نا پاکستان اٹی کرپشن نا بارواٹی السی تاثر آ تالان رپورٹ آ است جمی نا درشانی ءِ کرسا پارینے کہ سروے نا رداٹ الس نا بھلو کچ اس دا سلاہ تسنے کہ ننا حکومت اٹی اوفتے کرپشن تون مون تروئی تمیتنے، الس نا دا سلاہ کرپشن نا برخلاف جنگ و شفافیت نا مون آ دننگ نا بابت ننا کوشست آتا اعتراف ءِ، ملک انا زرگزران نا پین گچینی، الس ءِ گچین خذمت آتا فراوانی و کرپشن نا پورو چٹفنگ کن سنبرینگو ک اُن۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم ٹرانسپرنسی انٹرنیشنل نا پاکستان اٹی کرپشن نا بارواٹی السی تاثر آ تالان رپورٹ آ است جمی نا درشانی ءِ کرے۔ وزیراعظم پارے کہ سروے ٹی الس نا بھلو کچ اس دا سلاہ تسنے کہ ننا حکومت اٹی اوفتے کرپشن تون مون تروئی تمیتنے و الس نا دا سلاہ کرپشن نا برخلاف جنگ و شفافیت نا مو ن آ دننگ نا بابت ننا کوشست آتا اعتراف ءِ، الس نا گیشتری زرگزران نا بحالی کن حکومتی گام گیج آتے سرسہب گوندا ہرا کہ ستاکڑزک، ٹرانسپرنسی انٹرنیشنل نا دا رپورٹ حکومت نا کنڈآن کروک آ اصلاحات نا سرسہبی نا شاہدی ءِ۔ وزیراعظم پارے کہ نن حکومت نا ہربشخ اٹی میرٹ و شفافیت آن پُر نظام کن اولیتی بنداوتیا کاریم کرین و دا بابت پین کاریم کننگ اُن۔ گچین مروک زرگزرانی ٹک، اصلاحات و حکومتی پالیسی و گام گیج آتیا مثبت السی سلاہ ٹیم ورک انا بھرم ءِ، نائب وزیراعظم و وزیرخارجہ اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر ، وزیرخزانہ محمد اورنگزیب و اونا ٹیم انا کوشست آک ستاکڑزرہ۔ وزیراعظم پارے کہ زرگزرانی سوگوی آن شونداری نا سفر بناکرینے، ملک انا زرگزران نا پین گچینی، الس ءِ گچین خذمت آتا فراوانی و کرپشن نا پورو چٹفنگ کن سنبرینگوک اُن۔