آئی ایم ایف نا کنڈآن ساڑی آ مالی اجراء داہیت انا شاہدی ءِ کہ پاکستان زرگزرانی سوگوی و شونداری کن المی گام گیج آتیا عملدرآمد کننگ ءِ، وزیراعظم شہباز شریف

اسلام آباد۔ 09 دسمبر (اے پی پی) وزیراعظم محمد شہباز شریف پارینے کہ جہانی مالیاتی فنڈ (آئی ایم ایف) نا کنڈآن ساڑی آمالی اجراداہیت انا شاہدی ءِ کہ پاکستان زرگزرانی سوگوی و شونداری کن المی گام گیج آتیا عملدرآمد کننگ ءِ، اصلاحاتی ایجنڈانا نافذ و زرگزرانی شونداری نا کسر ءِ آوار کننگ اٹ چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نا کمکاری نا اہم کڑد ءِ، ہمووخت مر اف ہراتم پاکستان وام تیان پورو نجات دوئی کرسا زرگزرانی وڑاٹ خودکفیل مریک۔ سے شنبےنادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم جہانی مالیاتی فنڈ (آئی ایم ایف ) نا کنڈآن حکومتی زرگزرانی اصلاحات و گام گیج آتا گچین نافذ نا سوب آن برجاپروگرام نا رداٹ مالی اجراء آ حکومت نا زرگزرانی ٹیم انا کوشست آتا ستاءِ کرینے۔ وزیراعظم پارے کہ جہانی مالیاتی فنڈ انا کنڈآن پاکستان اٹی زرگزرانی اصلاحات و گام گیج آتا گچین نافذ کننگ آ است جمی نا درشانی زرگزرانی ٹیم خاص کر وزیرخزانہ محمد اورنگزیب و اونا ٹیم انا خواری نا شاہدی ءِ، آئی ایم ایف نا کنڈآن ساڑی آ مالی اجراء داہیت انا شاہدی ءِ کہ پاکستان زرگزرانی سوگوی و شونداری کن المی گام گیج آتیا عملدرآمد کننگ ءِ۔ وزیراعظم پارے کہ ڈیفالٹ نا دنگ آن ملک ءِ سوگوی و شونداری نا سمت اٹی گامزن کننگ اسہ سخت ءُ ریسہ اس ئس ہراڑکن غٹ اواری اٹ قربانی تسر، سیاسی جماعت آک سیاست نا قربانی ترسا و قوم زرگزرانی مشکلات آتے سگسا ناممکن ءِ ممکن کرسا نشان تسر۔ وزیراعظم پارے کہ اللہ نا فضل و کرم اٹ پاکستان نا زرگزرانی اصلاحات و ڈیجیٹائزیشن سرسہب کیس سٹڈی نا وڑاٹ مچ آ دنیا ٹی درور اس جوڑ مسنے، پاکستان نا زرگزرانی شونداری نا تغ انشاء اللہ زوت پورو مریک۔ وزیراعظم پارے کہ سوگوی آن پد شونداری نا سمت آ ہِننگ زرگزران نا بابت داسہ پین خواری درکارءِ، بطور خادم پاکستان، پاکستانی الس نا شونہالی و ملک انا پیشن نا وام تیان پورو نجات اسکان خواری ءِ برجاتخیوہ، انشاء اللہ ہمووخت مر اف ہراتم پاکستان وام تیان نجات دوئی کرسا زرگزرانی وڑاٹ خودکفیل مریک۔