شہباز شریف ءَ گوشت کہ مزن وزیر ءَ امارات ءِ سروکی ءُ الس ءَ را ائید الاتحاد ءِ روچ ءَ مبارک بات داتگ، امارات ءِ بے مٹیں ھاٹیگ، وت جوڑیشتی ھیل کاری ، کشت ءُ کشاری ءُ دگہ شوبگ آنی تہ ءَ سرمایہ کاری ءَ را وش آتک کتگ

اسلام آباد۔ 8دسمبر (اے پی پی): مزن وزیر محمد شہباز شریف ءَ پاکستان ءُ امارات ءِ نیام ءَ شریکداری ءَ را گیش مھکم کنگ ءِ ضلورت ءِ سر ءَ زور پر دات ءُ گوشت کہ قابل تجدید توان، مصنوعی ذہانت، کشت ءُ کشار ءُ ایندگر شوبگ آنی تہ ءَ امارات ءِ سرمایہ کاری ءَ را وش اتک کناں۔ اے ھیالانی درشانی آئی ءَ دو شمبے ءِ روچ ءَ امارات ءِ راجی رو. ائید الاتحاد ءِ موہ ءَ ھاسیں مہمان ءِ بستار ءَ برجم داشتگیں مراگش ءَ گوں گشتانک دیان ءَ کت۔ اے موہ ءِ سر ءَ نائب مزن وزیر ءُ دری کارانی وزیر سینیٹر اسحاق ڈار، وفاقی وزیر، پارلیمنٹ ءِ باسک ءُ دری کارانی مزنیں کساس ءَ ھم ساڑی بوتگ اَنت۔ مزن وزیر ءَ امارات ءِ راجی روچ ءِ درگت ءَ امارات ءِ سروکی ءُ الس ءَ را مبارکی دات ءُ گوشت کہ امارات ءِ راجی روچ ءِ مراگش ءَ بھر زوری منی واستہ شرپ ءِ گپ اِنت۔ مزن وزیر ءَ امارات ءِ استیں سروکی ءَ را شگر ءُ منت درشان کت ءُُ گوشت کہ آہانی سروکی ءَ امارات ءَ دیمروئی ءِ نوکیں کونڈ آنی سر ءَ سر بوتگ ءُُ ملک ءَ را دیمروئی ءُ وشھالی ءِ راہ ءَ راھشونی کتگ۔ مزن وزیر ءَ شیخ زاید بن سلطان النہیان ءَ را امارات ءِ دیمروئی ءِ بُن ھشت ایر کنوک ءُ پاکستان امارات ءِ سیادی ءِ آرکیٹیکٹ لیکگ ءَ گوشت کہ پاکستان ءَ امارات ءِ گوما وتی اسٹریٹجک شراکت داری ءِ سر ءَ پھر اِنت۔ مزن وزیر ءَ گوشت کہ امارات ءَ پاکستان ءِ اقتصادی برجائی ءِ تہ ئَ مزنیں کردے پیلو کتگ۔ آئی ءَ گوشت کہ قابل تجدید توانائی، مصنوعی ذہانت، کشت ءُ کشار ءُ ایندگر شوبگ آنی تہ ءَ امارات ءِ سرمایہ کاری ءَ را وش اتک کناں۔ آئی ءَ گوشت کہ امارات ءِ دیمروئی ءِ واستہ 18لکھ پاکستانی کمک کنگ ءَ انت۔ آئی ءَ امیت سہرا کت کہ آیوکیں وھد ءَ دوئیں ملک آنی نیام ءَ اسٹریٹجک شریکداری ءَ را گیش مھکم بیت۔ آئی ءَ امارات ءِ دیمروئی ءُ وشھالی ءِ واستہ ھم نیکیں واھگ آنی درشان ھم کت۔ ایشی ءَ چہ پیسر متحدہ عرب امارات ءِ سفیر سالم محمد الزعبی ءَ مراگش ءَ مزن وزیر ءَ را وش اتک کت ءُ گوشت کہ دوئیں ملک آنی نیام ءَ 5 دہائی ءَ چہ دیریں، گہتریں ءُُ راجدپتری براتی سیادی است انت، ءُُ وھد ءِ گوزگ ءَ گوں دوئیں ملک آنی نیام ءَ سیادی گیش مھکم بوتگ انت۔ آئی ءَ پاکستان ءِ جتاجتائیں شوبگ آنی تہ ءَ سرمایہ کاری ءَ را دلکش لیک اِتگ ءُُ گوشت کہ امارات پاکستان ءَ قابل تجدید توانائی، مصنوعی ذہانت، آئی ٹی ءَ ھوار جتا جتائیں شوبگ آنی تہ ءَ سرمایہ کاری ءِ واھشت مند اِنت۔ آئی ءَ پاکستان ءُ امارات ءِ نیام ءَ ھمگرنچی، دیمروئی ءُ وشھالی ءِ واستہ نیکیں واھگ آنی درشان کت۔ ایشی ءَ چہ پد مزن وزیر ءَ امارات ءِ راجی روچ ءِ درگت ئَ کیک ھم کٹ اتگ۔