بلوچستان نا 51 درسد اُراک کٹیا نا نیزگاری و 71 درسد آبادی کثیر الابعاد نیزگاری نا گواچی ءُ، وزیراعلیٰ بلوچستان

کوئٹہ۔ 08 دسمبر (اے پی پی) وزیراعلیٰ بلوچستان میر سرفراز بگٹی پارینے کہ موسمیاتی بدلی دنیا نا غٹ آن بھلا چیلنج ءِ و بلوچستان اونا براہ راست و سنگین اثرآتیان پد ہم پائیدار شونداری ناسفر آ ہِننگ ءِ۔ داخیال آتا درشانی ءِ او دوشنبے نادے آ ’’پائیدار شونداری و بلوچستان اٹی چاگڑدی استقامت‘‘ نا سرحال آ اڈ ہلوک سمپوزیم آن تران کرساکرے۔ اوپارے کہ کوپ 30 آن پد جہانی برادری موسمیاتی گام گیج آتیٹی ترندی نا خواہندار ءِ و بلوچستان کون آ حساس ڈیہہ اکن دا موقع ہم ارے و زمواری اس ہم۔ صوبہ تدوک آ سال آتیٹی خشک سالی، بھلا پِر، ترند انگا باسنی نا ریسہ و موسمی بے ترتیبی تون مون تننگ ءِ وخت اس کہ نیزگار و نزور تپہ غاک غٹ آن زیات زہمی مننگ ءُ۔ اوپارے کہ بلوچستان نا 51 درسد اُراک کٹیانا نیزگاری و 71درسد آبادی کثیر الابعاد نیزگاری نا گواچی ءُ۔ وزیراعلیٰ پارے کہ صوبائی حکومت موسمیاتی چیلنج آتون مون تننگ کن جوان کلائمیٹ چینج پالیسی اس جوڑ کرینے ہرا توانائی، ٹرانسپورٹ، کشت وکشار و دِیر انا بشخ آتیٹی موافقت و تخفیف نا پیدوار حکمت عملی فراوان کیک۔ اوپارے کہ بلوچستان اٹی قابل تجدید توانائی، خاص کر شمسی و ہوائی توانائی نا ڈٹ آتیا پیش رفت برجاءِ تانکہ فوسل فیولز آ سیبو ءِ کم کننگ مرے۔ ٹرانسپورٹ سیکٹر اٹی الیکٹرک گاڈی و گرین انفراسٹرکچر نا مون آدننگ نا گام گیج آک ہم برجاءُ۔ اوپارے کہ کشاری بشخ اٹی موسمیاتی موافق وڑوڈول، دُن کہ کنزرویشن ایگریکلچر و ایگرو فاریسٹری ءِ مون آدننگ انگ ءِ تانکہ غذائی رکھ جوان مرے و اخراج کم مرے دِیر انا بشخ اٹی گچین نظم و نسق و جنگلات آتا رکھ و بحالی کن ہم جوان حکمت عملی اس تینا کننگانے۔ وزیراعلیٰ پارے کہ کاربن ٹریڈنگ بلوچستان کن اسہ اہم ءُ موقع اسے ہراڑآن موسمیاتی فنانس اسکان رسینگ ممکن مریک صوبہ کاربن مارکیٹ نا سوگو فریم ورک اس جوڑ کننگ ءِ ہراٹی ممکنہ کاربن ڈٹ آتا پیدواری اوار ءِ، ہرافتے ٹی خرُن آ کاربن ڈٹ ہم اوار ءِ ہرافتا سرسہب درور سندھ انا ڈیلٹا بلیو کاربن پروجیکٹ اٹی ہُننگ مریک۔ اوپارے کہ بلوچستان کلائمیٹ چینج فنڈ صوبہ ٹی موافقت، تخفیف و کاریم نا کچ ءِ ودفنگ نا ڈٹ آتا کمکاری ءِ کننگ ءِ۔ نیشنل کلائمیٹ ہدف آتیکن صوبائی سلاہ وسوج آتیٹی ہم پائیدار شونداری ، کم کاربن اخراج و چاگڑدی استقامت ءِ بنداوی اولیت تننگانے۔ وزیراعلیٰ غٹ ادارہ، جہانی شریدار ، نجی بشخ و سول سوسائٹی آن خواست کرے کہ او موسمیاتی تنکی تون مون تننگ کن اسیجائی کوشست کیر۔ اوپارے کہ اگہ مثبت ہدف آتا دوئی کننگ کن نن مُر اسکان ہِننگ خوانہ تو ننے اواری اٹ سفر کروئی مریک و بلوچستان نا پائیدار ، رکھ و چاگڑدی رداٹ سوگو آخبت کن اجتماعی کوشست المی ءِ۔ وزیراعلیٰ بلوچستان میر سرفراز بگٹی سمپوزیم نا سرسہب اڈتننگ آ منتظمین آتے مبارکبادی ترسا دااومیت نا درشانیءِ کرے کہ اجتماعی کوشست آتا چرجوئی ءِ برقرار تخسا موسمیاتی بدلی تا چیلنج آتون مون تننگ کن گام گیج آتے نتیجہ خیز جوڑ کننگک۔