حکومت جدت، رسمی زرگزران و زموارانہ شونداری نا است بڈی آ تالان کاروباری چاگڑد ودی کننگ کن سنبرینگوک ءِ، وزیرخزانہ محمد اورنگزیب

اسلام آباد۔ 08 دسمبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ گچین تعمیل، زیات شفافیت و گچین خراج نظام پاکستان نا زرگزرانی بحالی نا مرکزی تمبہ ءِ، حکومت جدت، رسمی زرگزران و زموارانہ شونداری نا است بڈی آ تالان کاروباری چاگڑد اس ودی کننگ کن سنبرینگوک ءِ ۔ اوداہیت ءِ دوشنبے نادے آ داڑے نیسلے پاکستان نا ڈل اتون اوڑدہی ٹی گپ وتران کرسا پارے۔ وزیرخزانہ پارے کہ حکومت رسمی زرگزران ءِ سوگو کننگ و زموارانہ مریس مدی زرکاری ءِ مون آ دننگ اٹ سنبرینگوک ءِ، وزیر خزانہ غیررسمی بشخ آ سخت چاروکی نا حکومتی عزم آ زور شاغسا پارے کہ دا بابت بناکروک کوشست آتا چندی صنعت آتیٹی پیدوار نتیجہ مون آ بننگ ءِ، گچین تعمیل، زیات شفافیت  و گچین خراج نظام پاکستان نا زرگزرانی بحالی نا مرکزی تمبہ ءِ۔ وزیرخزانہ پارے کہ وزارت خزانہ ٹی خراج پالیسی آفس نا قیام پنجرجاتی اصلاحات نا بابت اسہ بھلو گام اسے، داڑآن نجی بشخ اتون مچ آ سال آخبتی  رابطہ نا آسراتی دُومریک و داٹی پالیسی ٹی گچینی و بروک آ بجٹ آن مست گچین سلابتی عملدرآمد ءِ ممکن جوڑ کننگ مریک، نیسلے پاکستان نا ڈل انا کماشی ءِ چیف ایگزیکٹیو آفیسر جیسن ایون سیناکر کریکہ وخت اس کہ چیف فنانشل آفیسر مقصود احمد انجم و ہیڈ آف کارپوریٹ افیئرز اینڈ سسٹین ایبلٹی شیخ وقار احمد ئسک ہم اوڑتون اوار ئسر۔ ڈل وزیرخزانہ ءِ پاکستان تون نیسلے نا متکن آ تعلق و آخبت نا ودکی ڈٹ بندی آن معلومدار کرے۔ چیف ایگزیکٹیو آفیسر کمپنی نا کاروباری سوگوی نا جاچ ءِ پیش کرسا پارے کہ نیسلے مقامیت، پورٹ فولیو ایڈجسٹمنٹ ، پوسکن آٹومیشن، کارکڑد اٹی گچینی و مصنوعات آتیٹی پدریسہ جدت نا کمک اٹ تینا آپریشن تے سوگو کرینے۔