چیئرمین سینیٹ سید یوسف رضاگیلانی نا ملائیشیا نا اسپیکر ایوان نمائندگان تون اوڑدہی

کوالالمپور۔ 08 دسمبر (اے پی پی) چیئرمین سینیٹ سید یوسف رضاگیلانی دوشنبے نادے آ کوالالمپور اٹی ملائیشیا نا ایوان نمائندگان نا اسپیکر تان سری داتو ڈاکٹر جوہری بن عبدل تون اوڑدہی کرے۔ اوڑدہی ٹی پاکستان و ملائیشیا نا نیام اٹ متکن آ ایلمی تعلقداری تے پین سوگو کننگ آ امنا کننگا۔ چیئرمین سینیٹ ہڑتوم آ ملک آتا پارلیمان تا نیام اٹ پدریسہ رابطہ غاتا ستاءِ کرسا سیاسی، زرگزرانی و پارلیمانی بشخ آتیٹی تین پہ تینی کمکاری ءِ پین مون آدننگ نا عزم انا درشانی ءِ کرے۔ اوپارے کہ پاکستان و ملائیشیا نا تعلقداری اسیجائی قدر، دودوربیدہ ئی خڑکی و تین پہ تینی شرف آ تالان ءِ و پاکستان ملائیشیا تون شریداری و ایلمی تعلقداری تے بھاز اہمیت ایتک۔ چیئرمین سینیٹ ہڑتوم آ ملک آتا سوگو جمہوری روایت و متحرک پارلیمانی نظام نا ستاءِ کرسا پارلیمانی فرینڈ شپ گوپ آتا قیام ءِ ستاکڑزوک گوندا۔ اوداہیت آ زور شاغا کہ بڑزکو کہولی پارلیمانی ہن و بر و پدریسہ گپ وتران  ہڑتوم آکنڈآتا تعلقداری تے سوگو کننگ اٹ اہم کڑد ادا کیک۔ او ساڑی آ نوکاپ اٹی ملائیشیا نا کنڈآن فراوان کروک آ امداد آ حکومت ملائیشیا نا منت واری ءِ ہم ہرفے۔ اوڑدہی ٹی علاقائی و جہانی حالیت آتیا ہم سرجمی اٹ گپ وتران کننگا۔ چیئرمین سینیٹ پارے کہ پاکستان و ملائیشیا نا نیام اٹ خڑکی کمکاری ڈیہہ اٹی امن، سوگوی و شونداری کن المی ءِ۔ اووزیراعظم محمد شہباز شریف نا ساڑی آ دورہ ملائیشیا و تدوک آ سال ملائیشیا نا وزیراعظم داتو سری انور ابراہیم نا دورہ پاکستان ءِ ہڑتوم آ کنڈآتا تعلقداری نا سوگوی نا چیدہ گوندا۔ چیئرمین سینیٹ ملائیشیا ءِ آسیان نا گچین چیئرمین شپ و 47 می آسیان سروکی دیوان نا سرسہب اڈتننگ آ مبارکبادی تس۔ چیئرمین سینیٹ پاکستان اٹ برجا ملائیشین زرکاری ءِ ستاکڑزوک گوندسا کوالالمپور اٹی اڈ ہلوک پاکستان۔ملائیشیا بزنس اینڈ انویسٹمنٹ کانفرنس نا حوالہ ءِ تس۔ اوپارے کہ پاکستان خصوصی اقتصادی زون و اسپیشل انویسٹمنٹ فیسلیٹیشن کونسل (ایس آئی ایف سی) نا رداٹ زرکارآتیکن خصوصی آسودہی درستی راستی کرفینے۔