چیئرمین سینیٹ  یوسف رضا گیلانی ءَ ملائیشیا ءِ ایوان ءِ نمائندگانی اسپیکر ءَ گوں گند ءُ نند کتگ، پارلیمانی ءُ وت مہ وتی کمک ءِ دیمروئی ءِ راہ ءُ درانی سر ءَ گپ ءُ تران

کوالالمپور۔8دسمبر  (اے پی پی): چیئرمین سینیٹ یوسف رضا گیلانی ءَ کوالالمپور ءَ ملائیشیا ءِ ایوان ءِ نمائندگ آنی اسپیکر تان سری داتو’ ڈاکٹر جوہری بن عبداللہ ءَ گوں گند ءُ نند کت۔ گند ءُ نند ءِ ساھت ءَ پاکستان ءُ ملائیشیا ءِ دیریں براتیں سیادی ءَ را گیش مھکم کنگ ءِ سر ءَ تپاک کتگ ۔ چیئرمین سینیٹ یوسف رضا گیلانی ءَ دوئیں ملک آنی پارلیمنٹ آنی نیام ءَ برجمیں رابطہ آناں ساڑات ءُ سیاسی، اقتصادی ءُ پارلیمانی شوبگ آنی تہ ءَ وت مہ وتی کمک ءَ را گیش دیمروئی دیگ ءِ جزم ءِ درشان کت۔ آئی ءَ گوشت کہ پاکستان ءُ ملیا ءِ سیادی یکجائی ارزشت، دود ءُ ربیدگی نزیکی ءُ وت مہ وتی شرپ ءِ سر ءَ بنیات انت ءُ پاکستان ملائیشیا ءِ گوما شریکداری ءُ براتی سیادی ءَ را سک باز ارزشت دنت۔ چیئرمین ءَ دوئیں ملک آنی مھکمیں جمہوری روایات ءُ متحرک پارلیمانی نظام آناں ساڑات ءُ پارلیمانی دوستی گروپ آنی جوڑ کنگ ءَ را وش اتک کت۔ آئی ءَ اے گپ ءِ سر ءَ زور پر دات کہ مزن تک ءِ پارلیمانی تبادلہ ءُ مُدامی گپ ءُ تران دو نیمگی سیادی ءَ را مھکم کنگ ءِ واستہ ھاسیں کرد پیلو کنت۔ آئی ءَ گوستگیں سیلاب ءِ وھد ءَ ملائیشیا ءِ نیمگ ءَ چہ داتگیں کمک ءِ سر ءَ ملائیشیا ءِ حکومت ءِ ھم منت گپت۔ گند ءُ نند ءَ دمگی ءُ جھان ءِ جاور ھال آنی سر ءَ ھم سرجمیں رنگ ءَ گپ ءُ تران کنگ بوت۔ چیئرمین ءَ گوشت کہ پڑ ءَ امن، برجائی ءُ دیمروئی ءِ واستہ پاکستان ءُ ملائیشیا ءِ نیام ءَ نزیکیں کمک ءِ المی انت۔ آئی ءَ مزن وزیر محمد شہباز شریف ءِ گوستگیں سال ءَ ملائیشیا ءِ تر ءُ تاب ءَ را دو نیمگی سیادی ءِ مھکمیں چیدگ  لیک اتگ۔ چیئرمین ءَ آسیان ءِ جوانیں چیئرمین شپ ءُ 47می آسیان سروک دیوان ءِ سوبمندیں برجم دارگ ءِ سر ءَ ملائیشیا ءَ را مبارکی دات۔ چیئرمین ءَ کوالالمپور ءَ برجم داشتگیں پاکستان ءُ ملائیشیا بزنس اینڈ انویسٹمنٹ کانفرنس ءِ حوالہ ءَ پاکستان ءَ برجاھیں ملائیشیا ءِ سرمایہ کاری ءَ را وش اتک کت۔ آئی ءَ گوشت کہ پاکستان ءَ ھاسیں اقتصادی زون ءُ ھاسیں سرمایہ کاری ءِ آسراتی ءِ کونسل ءِ چیر دستی ءَ سرمایہ کار آنی واستہ ھاسیں ترغیب بندات کتگ۔ آئی ءَ گوشت کہ پاکستانی کارندہ محنتی، پیشہ وارانہ ءُ بھروسہ مند انت۔  چیئرمین ءَ فلسطینی اُلس ءِ ھک آنی ھوالگ ءَ ایم ایل اے ءِ موقف ساڑاتگ ءُ گوشت کہ اے جیڈھ ءِ سر ءَ ایم ایل اے ءِ سروکی مسلم دگنیا ءَ شرپدار ءُ ستا کرز اِیت۔ چیئرمین سید یوسف رضا گلبانی ءَ اوگانستان ءَ امن ءُ ایمنی ءِ واستہ پاکستان ءِ عزم ءِ پدر کنگ ءَ اوگان سرزمین ءَ چہ ممنوعہ تنظیم آنی کاروائی آنی سر ءَ جیڈھ ءِ درشانی کت۔ آئی ءَ گوشت کہ اوگانستان ءِ گوما نارمل سیادی پاکستان ءِ ایمنی ءِ ھترہ آنی ھلاسی ءِ واستہ جوانیں ءُ تصدیق ءِ لائکیں گامگیج آنی سر ءَ شرط اِنت۔ آئی ءَ بھارت ءِ زوراکیں رویہ ءُ بھارت ءِ قبضہ ءِ چیر ءَ جموں کشمیر ءَ انسانی ھک آنی مزنیں لگتمالی آنی سر ءَ سک باز جیڈھ ءِ درشانی کت۔ آئی ءَ سندھ ءِ آپانی منوگری  ءِ مھتل  کنگ ءِ بھارت ءِ گامگیج ءَ را غیر قانونی لیک اتگ ءُ میاں اوستمانی کانود ءِ سر ءَ عمل کنگ ءِ سر ءَ زور پر داتگ۔ 6  ءُ 7 مئی 2025 ءَ بھارتی زوراکی ءِ حوالہ ءَ سید  یوسف رضا گیلانی ءَ اقوام متحدہ ءِ منشور ءِ آرٹیکل 51 ءِ رد ءَ پاکستان ءِ وت دفاع ءِ حق ءِ سر ءَ زور پر دات ءُ گوشت کہ پاکستان وتی حاکمیت ءِ رکھینگ ءِ ھاترا جزم اِنت بلے دمگ ءِ تہ ءَ امن ءُ امن ءُ ایمنی ءِ واھشت مند اِنت۔