انڈونیشیا ءِ صدر پرابووو سوبیانتو  پاکستان ءِ دو روچی تر ءُ تاب ءَ اسلام آباد ءَ سر بوتگ

اسلام آباد۔8دسمبر  (اے پی پی): انڈونیشیا ءِ صدر پرابووو سوبیانتو  پاکستان ءِ دو روچی تر ءُ تاب ءِ واستہ اسلام آباد ءَ شتگ۔ صدر آصف علی زرداری ءُ مزن وزیر شہباز شریف ءَ نورخان بالی پٹ ءَ آئی ءَ را جوانیں وش اتک کت۔ انڈونیشیا ءِ صدر ءِ وش آتک کنگ ءِ واستہ وفاقی کابینہ ءِ باسک ءُ مزنیں حکام ھم ھوار اتنت۔ وھدے انڈونیشیا ءِ صدر بالی پٹ ءَ چہ دراتک گڑا صدر آصف علی زرداری ءُ مزن وزیر محمد شہباز شریف ءَ گوں جوش ءُ جزبگ ءَ دست ءُ دپ کت۔ روایتی پوشاک ءَ پوشوکیں زھگاں انڈونیشیا ءِ صدر پرابووو سوبیانتو  ءَ را پُل دات۔ انڈونیشیا ءِ صدر ءَ اے موہ ءِ سر ءَ صدر ءُ مزن وزیر ءِ گوما وشیں گپ ءُ تران کت۔ دوئیں ملک آنی بیرک ءِ دست ءَ زھگاں مزنیں مہمان آناں وش آتک کت۔ انڈونیشیا ءِ صدر ءَ را 21 توپ ءِ سلامی ھم دیگ بوتگ۔ انڈونیشیا ءِ صدر ءِ تر ءُ تاب ءِ واستہ مزن وزیر محمد شہباز شریف ءَ دعوت داتگ ات۔ اے صدر پرابو سوبھانٹو ءِ پاکستان ءِ اولی تر ءُ تاب اِنت۔ انڈونیشیا ءِ گڈی صدارتی تر ءُ تاب 2018ءَ صدر جوکو ویڈوڈو ءِ بوتگ ات۔اے تر ءُ تاب ءِ ہم ھاسیں ارزشت است انت پرچا کہ اے سال ءَ پاکستان ءُ انڈونیشیا ءِ نیام ءَ سفارتی سیادی ءِ جوڑ بوھگ ءِ 75سال سال سرجم انت۔ وتی تر ءُ تاب ءِ وھد ءَ صدر پرابووو سوبیانتو  مزن وزیر ءِ گوما ڈل ءِ تک ءَ گپ ءُ تران کنت ءُ صدر آصف علی زرداری ءَ گوں ھم گند ءُ نند کنت۔ تر ءُ تاب ءِ ساھت ءَ دوئیں ملک آنی نیام ءَ تجارت، سرمایہ کاری، دفاع، جان سلامتی، آئی ٹی، موسمی مٹ ءُ بدلی، وانگ ءُ زانگ، دود ءُ ربیدگ ءُ دمگی ءُ جھان ءِ تک ءَ شریکداری ءَ را گیش مھکم کنگ ءِ ھوالگ ءَ جتا جتائیں شوبگ آنی تہ ءَ کمک ءِ دیمروئی ءِ ھوالگ ءَ سرجمیں تبادلہ کنگ بیت۔ پاکستان ءُ انڈونیشیا ءِ نیام ءَ یکجائی قدر ءُ یکوئی مفاد آنی بنیات ءَ مھکم، دلپھکی ءُ دیریں سیادی است انت۔ صدر پرابو سوبیانٹو ءِ اے تر ءُ تاب ءَ چہ دو نیمگی سیادی ءَ را گیش مھکم کنگ ءُ دوئیں نیمگ ءَ چہ فائدگ مندیں کمک ءَ را گیش کنگ ءِ ھاترا یک ھاسیں موہ یے رس ایت کہ اے دوئیں ملک آنی نیام ءَ شریکداری ءِ برجاھیں دیمروئی ءَ کمک کنت۔