چین پاکستان نا ارٹ میکو اُرا و پاکستان ہم چین نا ارٹ میکو اُراءِ، چین ہر مشکل ساہت اٹی پاکستان تون سلیس، عطاء اللہ تارڑ

اسلام آباد۔ 08 دسمبر (اے پی پی) بنجائی وزیر حوالکاری و شینکاری عطاء اللہ تارڑ پارینے کہ چین و پاکستان آئرن ایلم ءُ، چین پاکستان نا ارٹ میکو اُرا و پاکستان ہم چین انا ارٹ میکو اُراءِ، چین ہرمشکل ساہت اٹی پاکستان تون سلیس، نوکاپ آن زہمی تیکن چینی کمپنی و ادارہ غاتا کمکاری ستاکڑزک۔ داخیال آتا درشانی ءِ او دوشنبے نادے آ داڑے ہندی ہوٹل اٹی چائنہ چیمبر آف کامرس ان پاکستان نا کنڈآن پاکستان اٹی فلڈ ڈیزاسٹر کن عطیہ غاتا دود آن بحیثیت مہمان خاص تران کرساکرے۔ بنجائی وزیرپارے کہ پاکستان و چین نا نیا م اٹ تعلقداری اسہ پنیپروک آ رشتہ نا دروشم اسے ٹی ءِ، ہرا ننا بزرگ آتیان ننے میرات اٹی ملانے ہرانا رکھ و قدر ءِ نن ہر حال اٹ کینہ۔ اوپارے کہ پاکستان و چین نا نیام اٹ خڑکی تعلقداری ءِ، چین ننکن ارٹ میکو اُرا ءِ و ہندا وڑ پاکستان ہم چین اکن اِرٹ میکو اُراءِ۔ بنجائی وزیر چین نا چندی شارتا دورہ غاتا حوالہ ءِ ترساپارے کہ پاک چین سنگتی ہرموسم نا سنگتی ءِ، دا سنگتی مدام آخبتی و سوگو مسنے، ہرمشکل وخت اٹی چین پاکستان تون تفینے۔ بنجائی وزیر حوالکاری پارے کہ چین نا راہشون چواین لائی ہراتم پاکستان آ بس تو کنا لمہ اسلام آباد نا سڑک آتیا ایلو چناتتون چینی بیرک ءِ ہرفسا اودے بخیر کریرہ، داہمو یات آک ءُ ہرافتے ٹی نن شون ہلکن، دا ننا دودوربیدہ و میرات نا بشخ ءُ۔ اوپارے کہ ساڑی آ دور اٹی ننا ورناچینک ہم پاک چین سنگتی نا بابت بھاز گڑا ہیل کرینو و دا تعلقداری اینو السی، دودوربیدہ ئی و تعلیمی کہول آ پین سوگو مسنے۔ بنجائی وزیر حوالکاری چین نا صدر شی جن پنگ و وزیراعظم لی جیانگ نا پاکستان کن جوزہ خیرخواہی وکمکاری آ منت واری ءِ ہرفے۔ بنجائی وزیرحوالکاری پارے کہ موسمیاتی بدلی جہانی ویل اسے، نن دانا ترند انگا اثرآتے خنانن، پاکستان نا جہانی کاربن اخراج اٹی بشخ اسہ درسد آن ہم کم ءِ وخت اس کہ موسمیاتی بدلی نا اثرآتا رداٹ نن دنیا نا غٹ آن زیات زہمی ملک آتیٹی اوار اُن۔ اوپارے کہ ہراتم پاکستان اٹی  نوکاپ بس و پنجاب تون اوار چندی علاقہ غاتیٹی مخلوق زہمی مسر تو چین نا کنڈآن کمک و کمکاری ہمووخت آ بے کچ اہم پک مس، چین نا کمپنی و ادارہ غاک تینا راجی زمواری تا رداٹ اسہ گام اس مون آ ہنسا کمک کریر ہراڑآن پک مریک کہ پاک چین سنگتی ناقابل توڑ ءِ، دا کمکاری آ نن چین نا کمپنی تا منت واراُن۔ بنجائی وزیرپارے کہ ہراتم کہ نن مشکل حالیت آتون مون ایتنہ چین مدام ننتون سلیسنے۔ چین اسہ پت انا قابل سنگت اسے و پاکستان مدام داسنگتی نا خواست آتے پورو کننگ کن تیار سلک۔ اوپارے کہ وخت پک کرینے کہ چین و پاکستان واقعی’’آئرن ایلم‘‘ ءُ، السی ، دودوربیدہ ئی و تعلیمی ہل و تس دا سنگتی ءِ پین سوگو کننگ ءِ۔ یات سلے کہ چین چیمبر آف کامرس ان پاکستان پاکستان نا نوکاپ آن زہمی علاقہ غاتیکن ستمبر اٹی کمکی مہم نا بناءِ کرے ہراٹی باسک کمپنی تا پبی بشخ ہلنگ مون آ بس۔ داتم اسکان 32 کمپنی کم و ود 34 ملین روپئی آن زیات زر کمکی گڑاتا ہلنگ و بشخنگ کن جمع کریر۔ داامداد اٹی خور، کنوئی ءُ دیر، کمبل، مچھردانی، و واٹر پروف ترپال کون آ بنداوی گڑااوار ءُ ہرا زہمی علاقہ غاتیٹی دمدستی وڑاٹ درکارءُ۔