گلگت بلتستان نا الس نا راجی آسودہی و زرگزرانی شونداری بنجائی حکومت نا اولیت آتیٹی اوار ءِ، وزیراعظم شہباز شریف

اسلام آباد۔ 08 دسمبر (اے پی پی) وزیراعظم محمد شہباز شریف گوادر پورٹ سٹی ٹی بجلی نا فراوانی ٹی مون تروک ویل آتا ایسری کن جوان ءُ ڈٹ اسے آ دمدستی عملدرآمد نا منظوری ءِ  ترسا پارت کرینے کہ 100 میگاواٹ سولر پروجیکٹ آن گلگت بلتستان اٹی چاگڑدی اعتبار اٹ ساف بجلی نا بے سلنگ و سوگو فراوانی ءِ پک کننگے، گلگت بلتستان نا الس نا راجی آسودہی و زرگزرانی شونداری بنجائی حکومت نا اولیت آتیٹی اوار ءِ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ اودا پارت ءِ بجلی نا بشخ اٹی برجا اصلاحات نا بابت جاچ دیوان نا کماشی ءِ کرساکرے۔ دیوان اٹی نائب وزیراعظم و وزیرخارجہ محمد اسحاق ڈار، بنجائی وزیر خزانہ محمد اورنگزیب، بنجائی وزیر بجلی سردار اویس احمد خان لغاری، بنجائی وزیر حوالکاری و شینکاری عطاء اللہ تارڑ، بنجائی وزیر اقتصادی امور احد خان چیمہ ، بنجائی وزیر پیٹرولیم علی پرویز ملک و ایلو تعلقدار سرکاری عہدیدار آک بشخ ہلکر۔ وزیراعظم خصوصی وڑاٹ پارت کرے کہ گوادر پورٹ سٹی ءِ بے سلنگ ، جوان نہاد و پت انا قابل بجلی نا فراوانی نا ڈٹ آتیا غٹ تعلقدار ادارہ غاک ہم گرنچی اٹ کاریم کیر، گلگت بلتستان اٹی 100 میگاواٹ نا سولر پروجیکٹ آ دمدستی عملدرآمد نا بناءِ کننگے، 100 میگاواٹ سولرپروجیکٹ آن گلگت بلتستان اٹی چاگڑدی اعتبار اٹ ساف بجلی نا بے سلنگ و سوگو فراوانی ءِ پک کننگے۔ اوپارے کہ گلگت بلتستان نا الس نا راجی آسودہی و زرگزرانی شونداری بنجائی حکومت نا اولیت آتیٹی اوار ءِ، گلگت بلتستان اٹی صنعتی سرجز، زرکاری و زرگزرانی شونداری کن ہرممکن گام گیج کننگ انگ ءِ، بجلی نا ویل آتے ایسر کننگ کن احسن اقبال نا کماشی ٹی جوڑ مروک آ کمیٹی و وزارت توانائی نا سلاہ و سوج و گام گیج ستاکڑزک۔ وزیراعظم پارت کرے کہ تیار کروک حکمت عملی ٹی اوار دمدستی، گونڈ مدی و مریس مدی پروجیکٹ آتیا وزارت توانائی گچین عملدرآمد ءِ پک کننگے، گوادر اٹی بجلی نا بے سلنگ آن فراوانی، ملکی زرگزرانی سرجز و زرکاری ٹی شونداری ءِ پک وڑاٹ ودفنگ نا سوب جوڑ مریک، صنعت و زرکارآتیکن پاکستان اٹ جوڑ کروک صنعت آتیکن بجلی نا فراوانی ءِ علاقائی و جہانی آب انا رداٹ کننگے۔ اوپارے کہ بجلی نا بے سلنگ آن فراوانی و ایلو آسراتی تیان گوادر نا بندرگاہ دنیا نا گچین بندرگاہ و آخبت اٹ زرگزرانی سرجزآتا مرکز جوڑ مریک۔ دیوان اٹی وزیراعظم ءِ بنجائی وزیر پاور ڈویژن سردار اویس احمد خان لغاری پاور سیکٹر اٹی برجا ڈٹ آتیا حوال اٹی پارے کہ گوادر اٹی وزارت توانائی نا کنڈآن دمدستی گام گیج آتا سوب آن بجلی نا فراوانی ٹی تعطل ءِ 42 درسد مہالو آن ہی کم کننگانے، بجلی نا فراوانی ٹی تعطل ءِ چٹفنگ آن پد بروک آ 6 تُواٹی گوادر اٹی فراوان کروک بجلی نا وولٹیج ءِ سوگو کننگ کن ہم جوان پلان اس ترتیب تننگانے، گوادر اٹی اُرائی و کاروباری صارف آتے بجلی نا فراوانی پک کننگ کن گچین و فائدہ ئی گام گیج کننگ انگ ءِ، گونڈ مدی پروجیکٹ آتیٹی بروک آ 8 آن 12 تُو اٹی بھلا سرکاری ادارہ غاتیٹی 9.7 میگاواٹ نا سولر کپیسٹی نصب کننگک ، گوادر نا مریس مدی پروجیکٹ آتیٹی 40 میگاواٹ نا ڈٹ سوگو بجلی نا سپلائی ءِ پک کننگ کن نصب کننگک، گوادر اٹی برجاصنعتی و زرگزرانی شونداری ، گوادر نا بندرگاہ و شاری علاقہ غاتیٹی ودکی نا سوب بروک آ سال تیٹی بجلی نا طلب اٹی 30 درسد ودکی نا گمان ءِ، گلگت بلتستان اٹی 100 میگاواٹ نا سولر پروجیکٹ اِرابشخ آتیا تالان ءُ ہرافتے ٹی 18 میگاواٹ چھت آتیا سولر پروگرام و 82 میگاواٹ یوٹیلیٹی سکیل سولر آ تالان ءِ، گلگت بلتستان اٹی چھت و یوٹیلیٹی کہول آ سولر پروجیکٹ آتے 2027 اسکان پورو کننگک، گلگت بلتستان نا حکومت و وزارت توانائی نا اسیجائی پروجیکٹ آتیان حکومت ءِ سالانہ اسہ ارب روپئی نا بچت مریک، حکومت گلگت بلتستان بجلی نا ڈٹ آتیکن ڈغار، مواصلات، انفراسٹرکچر و ایلو آسراتی تا فراوانی ءِ تخوک آ وخت اٹی پک کیک۔