چیئرمین سینیٹ سید یوسف رضاگیلانی نا کوالالمپور اٹی مسٹ میکو گلوبل مسلم بزنس فورم 2025 آن تران

کوالالمپور۔ 08 دسمبر (اے پی پی) چیئرمین سینیٹ سید یوسف رضاگیلانی کوالالمپور اٹی اڈ ہلوک مسٹ میکو گلوبل مسلم بزنس فورم 2025 آن تران کرسا مسلم دنیا نا نیام اٹ اقتصادی کمکاری، اختراع و اسیجائی شونداری ءِ وخت انا اہم گرج گوندا۔ چیئرمین سینیٹ تینا تران اٹی پارے کہ مسلم ملک آتے بیرہ بیان آتسکان محدود سلنگ ناجاگہ غا عملی و مربوط زرگزرانی حکمت عملی اس تینا کننگے تانکہ واپار، زرکاری و صنعتی شونداری نا پوسکن ءُ کسر ملنگ مرے۔ اوزور شاغا کہ اسیجائی ڈٹ، ٹیکنالوجی نا ہل و تس و کاروباری کمکاری نا کمک اٹ مسلم ملک آک تینا اجتماعی زرگزرانی لائخی ءِ پبی وڑاٹ کاریم اٹ اتنگ کیرہ۔ داوخت آ فورم اٹی انڈونیشیا آن پروفیسر دین شام الدین، برطانیہ غان سراقبال سکرینی، اسلامی چیمبر آف کامرس، انڈسٹری اینڈ ٹیکنالوجی نا ڈاکٹر وائل، مائیکل ڈاتو اقبال و سرواک نا ڈپٹی پریمیئر داتوامات حاجی اوانگ تون اوار جہانی کہول انا اہم شخصیت آک بشخ ہلکر۔ سید یوسف رضاگیلانی اسلامی مالیاتی نظام، فن ٹیک و پائیدار زرکاری ءِ مسلم دنیا ٹی زرگزرانی سوگوی و شونداری نا اہم ذریعہ گوندا۔ اوپارے کہ پوسکن آ ٹیکنالوجی و اختراعات آن بیدس پائیدارزرگزرانی شونداری ممکن اف، ہنداسوب آن مسلم ملک آک پٹ وپول و شونداری آزیات چکارکیر۔ اوپاکستان اٹی ساڑی مون آ بروک زرگزرانی وارخواہی تے مون آ تخسا پارے کہ پاکستان نا ورناک و لائخ آ آبادی، تالان مروک صارف آتا منڈی و ترندی اٹ شون ہلوک اختراعی چاگڑدی نظام زرکارآتیکن پرکشش وارخواہی فراوان کننگ ءِ۔ اوملائیشیا نا کاروباری حلقہ غاتے اسپیشل انویسٹمنٹ فسیلیٹیشن کونسل (ایس آئی ایف سی) نا کمک اٹ پاکستان اٹ زرکاری و اسیجائی ڈٹ آتا سلہ خلک۔ چیئرمین سینیٹ تینا تران نا ایسر آ داہیت آ زور شاغا کہ مسلم ملک آک بیرہ تران ونعرہ غاتیان مون آ ہنسا عملی گام گیج، سوگو واپاری نیٹ ورک، گچین زرکاری نظام و اختراعی شریداری نا بنداو ءِ تخر۔ اوداعزم انا درشانی ءِ کرے کہ پاکستان اسہ سوگو، محکم و شونہال مسلم دنیا نا ٹہیفنگ کن تینا شریدار ملک آتون ہرکہول آ کمکاری کن تیار ءِ۔ اوپارے کہ تین پہ تینی سیوت، اسیجائی وژن و عملی کمکاری ہی مسلم دنیا ءِ زرگزرانی خودکفالت  و جہانی کہول آ سوگو ہند اس ترفنگ نا اسٹ انگا کسر ءِ۔