بحیرہ عرب اٹی سرسہب منشیات تور آپریشن آ پاک بحریہ نا کسبی لائخی ستاکڑزک، وزیرداخلہ محسن نقوی

اسلام آباد۔ 08 دسمبر (اے پی پی) بنجائی وزیر داخلہ ونارکوٹکس کنٹرول محسن نقوی بحیرہ عرب اٹی سرسہب منشیات تور آپریشن آ پاک بحریہ نا کسبی لائخی تا ستاءِ کرینے۔ تینا بیان اٹی او30 لکھ ڈالر مالیت نا 1500 کلوگرام منشیات ضبط کننگ ءِ اسہ بھلو سرسہبی اس گوندسا پارینے کہ پاک بحریہ تینا روایتی مہارت و کچ انا درشانی ءِ کرسا منشیات نا دا بھلا کھیپ ءِ ہلک ہراستاکڑزوک ءُ کارنامہ اسے۔ محسن نقوی داسرسہب کارروائی آ نیول چیف و آپریشن اٹی بشخ ہلوک’یمامہ‘ جہاز انا عملہ ءِ خصوصی مبارکبادی تس۔ اوجہاز انا آفیسر و ورناتے خراج تحسین پیش کرسا پارینے کہ دا سرسہب آپریشن پاک بحریہ نا پروفیشنل ازم انا شاہدی ءِ و مچ آ قوم ءِ بحریہ نا دا جانبازآتیا ناز ءِ ہرا سمندری دنگ انا رکھ اتون اوار اوار غیرکانودی سرجزآتا توننگ اٹ ہم گچین کڑد ادا کننگ ءِ۔ وزیرداخلہ پارے کہ منشیات نا برخلاف دا کارروائی پاکستان ءِ منشیات آن پاک کننگ نا قومی عزم انا عکاسی ءِ کیک۔ اوناپاننگ ئس کہ پاک بحریہ سمندر اٹی مروک غیرکانودی سرجزآتے توننگ کن ہروخت تیار ءِ و داوڑنا آپریشن ملکی سلامتی و راج ءِ منشیات نا لعنت آن بچفنگ کن اہم حیثیت تخک۔