چیئرمین واپڈا ءَ گریٹر کراچی بلک واٹر سپلائی اسکیم ءِ چار منصوبہ آنی تر ءُُ تاب کت، جوڑیشت ءِ کار آنی سر ءَ چار ءُ تپاسی

اسلام آباد – 29نومبر (اے پی پی): واپڈا ءِ چیئرمین لیفٹیننٹ جنرل محمد سعید (ریٹائرڈ) ءَ گریٹر کراچی بلک واٹر سپلائی اسکیم ءِ چار منصوبگ آنی دو روچی تر ءُُ تاب کت ءُُ منصوبگ ءِ کلیدی جا آنی سر ءَ جوڑیشت ءِ کار آنی سر ءَ چار ءُُ تپاسی کت۔ مذکورہ سائٹ آنی تہ ءَ ٹھٹا ضلع ءِ کینجھار جھیل ءَ زیر تعمیراتی ان ٹیک ڈھانچہ ءُُ دو پمپنگ اسٹیشن، کینجھار جھیل ءَ چہ کراچی ءَ ہائی پریشر پائپ لائن آنی سر ءَ ھواریں واٹر ٹرانسفر سسٹم ءِ سر ءَ کلیدی تعمیراتی سائٹ ءُُ کراچی ءَ زیر تعمیراتی فلٹریشن پلانٹ ھوار اَنت۔ زانگ بہ بیت وفاقی حکومت ءَ کراچی شہر ءِ آپ ءِ ضلورت ءِ پیلو کنگ ءِ ھاتر ءَ کے فور منصوبہ ءِ جوڑیشت ءِ ذمہ واری واپڈا ءَ را داتگ ات۔ کے فور منصوبہ ءِ تر ءُُ تاب ءِ ساھت ءَ جنرل منیجر ءُُ پروجیکٹ ڈائریکٹر ءَ کنسلٹنٹ ءُُ ٹھیکیدار آنی گوما چیئرمین واپڈا ءَ را ہر یک کنٹریکٹ پیکج ءِ سر ءَ تاں انوگ ءَ سرجم بوتگیں کار، آیوکیں ٹارگٹ ءُُ آہانی سرجمی ءِ شیڈول ءِ بابت ءَ سرپدی دات۔ ترندیں رنگ ءَ سرجمی ءِ واستہ کے فور منصوبگ ءَ را ہشت جتا جتائیں کنٹریکٹ پیکج آنی تہ ءَ بھر کنگ بوتگ ءُُ درستیں پیکج آنی کلیدی جا آنی سر ءَ جوڑیشت ءِ کار جاری اِنت۔ اے منصوبگ 64درسد سرجم اِنت ایشی ءِ سر ءَ انوگ ءَ تاں 86ارب کلدار ھرچ کنگ بوتگ۔ اگاں لوٹوکیں فنڈز رسگ ءَ انت گڈا واپڈا اے منصوبگ ءَ 2026ءِ ساھت ءَ سرجم کنت۔بریفنگ ءِ ساھت ءَ منصوبگ ءِ مالی پیشرفت ءُُ آیوکیں مالی لوٹ آنی سر ءَ ھم گپ ءُُ تران کنگ بوتگ۔ کراچی ءِ شہر ءِ واستہ کے فور منصوبگ ءِ ارزشت ءِ درشان کنان ءَ چیئرمین واپڈا ءَ ٹھیکیدار آناں زور پر دات کہ آ گیشیں وسیلگ آنی دستیابی ءَ را دل یکیمی کنان ءَ جوڑیشت ءِ کار ءَ را ترند بہ کن اَنت تانکہ جوڑیشت ءِ ٹارگٹ وھد ءِ سر ءَ سرجم بہ بنت۔ آئی ءَ اے گپ ءِ سر ءَ زور پر دات کہ ھاسیں رنگ ءَ پائپ لائن ٹو ءِ کنٹریکٹ پیکج ءِ سر ءَ کار ءَ را ترند کنگ ءِ ضلورت اِنت۔ چیئرمین ءَ پروجیکٹ ٹیم ءَ را ہدایت کت کہ آ پروجیکٹ ءِ جوڑیشت ءِ وھد ءَ سندھ حکومت ءِ گوما نزیکی ءُُ موثر رابطہ ءَ برجم بہ دار انت۔ آئی ءَ امیت سہرا کت کہ صوبائی حکومت کراچی شہر ءَ آپ ءِ بھر ءُ بانگ ءِ نظام ءِ گیشینگ ءِ منصوبگ ءَ را زوتاں چہ زوت سرجم کنت تانکہ کے فور منصوبگ ءِ سرجمیں سیت آناں سرجم کنگ بہ بیت۔ کراچی شہر ءَ را روچے 650ملین گیلن آپ ءِ پھجارینگ ءِ واستہ کے فور پروجیکٹ جوڑ کنگ بوتگ۔ اے منصوبگ دو بھر ءَ سرجم کنگ بیت۔ اے وھد ءَ واپڈا کے فور منصوبگ ءِ اولی بھر ءِ سر ءَ کار کنگ ءَ اِنت کہ ایشی ءِ سرجمی ءَ پد کراچی ءَ را روچے 260ملین گیلن آپ ءِ آسراتی رس ایت۔ یک رندے کہ کے فور منصوبگ ءِ دومی بھر سرجم بیت گڈا کراچی ءَ روچے 390ملین گیلن آپ ءِ گیش رسگ ءِ موہ رس ایت۔ ایشی ءَ چہ پیسر چیئرمین واپڈا ءَ سندھ ءِ ضلع دادو ءَ نئے گج ڈیم منصوبگ ءِ توامیں کارجاہ آنی ھم تر ءُُ تاب کت۔ آئی ءِ تر ءُُ تاب ءِ مول ءُُ مراد منصوبگ ءِ جاہ ءِ جاور ھال آنی چار ءُ تپاسی ءُ منصوبگ ءِ سر ءَ جوڑیشت ءِ کار آناں پدا بندات کنگ ءِ ھاترا کارروائی ءِ منصوبگ جوڑ کنگ بوتگ کہ اے منصوبگ فروری 2025 ءَ چہ جتا جتائیں سبب آنی سبب ءَ بند بوتگ۔ اے سببانی تہا ٹھیکیدار ءِ آمید گس ءِ دیم ءَ آیگ، گوستگیں وھد ءَ تعمیراتی کار ءِ انتہائی سستیں رفتار ءُ مالی جیڑہ ھوار انت۔ چیئرمین واپڈا ءِ تر ءُ تاب ءِ وھد ءَ جنرل منیجر پروجیکٹس ساؤتھ واپڈا، پروجیکٹ ڈائریکٹر ءُ کنسلٹنٹس ھم ھوار اتنت۔ نے گج ڈیم ءِ منصوبہ ءِ سرجمی ءَ پد 28800 ایکڑ بنجریں زمین ءِ سرا کاشت ءُ کشار کنگ بیت۔ اے منصوبگ ءِ سبب ءَ دمگی مردماں 4.2میگاواٹ ارزانیں ہائیڈرو الیکٹرک بجلی ھم رسگ ءَ انت۔