کربلا ءِ پیغام راستی ءُ مزاحمت ءِ ابدی علامت اِنت

اسلام آباد۔25جون  (اے پی پی): کربلا ءِ جنگ ءَ اسلامی راجدپتر ءِ سر ءَ مزنیں اثرے کپتگ۔ اموی خلیفہ یزید ءِ مزنیں لشکر ءِ ھلاپ ءَ حضرت امام حسین بن علی بن ابی طالب (ع) ءُ آئی ءِ ھمراہانی شھید کنگ پہ اسلام ءِ مردماں سداں سالاں سبق بوتگ۔ اے غمناکیں واقعہ ءِ مذہبی اهمیت بے درور انت ءُ جتا جتائیں زبان ءُ دنیا ءِ لبزانک ءِ تہا یک برجمیں جاہے ءِ سرا قبضہ کنت۔ کربلا ءِ جنگ ءِ بنداتی روچاں چہ شاعر ءُ نبشتہ کاراں حضرت امام حسین ءُ آئی ءِ ہمراہانی قربانیانی حوالہ ءَ شعر نبشتہ کتگ انت۔ اے لبزانکی کار نہ ایوک ءَ غم ءِ درشان ءِ عکس اَنت بلکیں زبردستیں مزاحمت ءُ کربلا ءِ سبق ءَ ہم پدر کن اَنت۔ کربلا ءِ جنگ ءِ کسہ اردو لبزانک ءِ تہا رجانکانی تہا شرتر درشان کنگ بوتگ۔ نوزدھمی کرن ءِ لکھنؤ ءِ نامداریں شاعر میر انیس عاشورہ ءِ واقعہانی سرا زیبائیں الیجی نظم نبشتہ کنگ ءِ تہا رہشون زانگ بیت۔ آئی ءِ امیجری ءُ جذباتانی درشان ءِ سرا مرچیگیں روچ ءَ ستا کنگ بیت۔ اے درگت ءَ آئی ءِ ہم عصر ءُ لبزانکی حریف مرزا سلامت علی دبیر ءَ ہم مزنیں کردے پیلو کتگ۔ آئی ءِ شاعری ءِ میراث مرچی ہم گونجگ ءَ اِنت۔ اے الیجی شعر چہ زاری ءَ گیش لبزانکی کار اَنت کہ چہ گپ ءُ تران، اخلاقیات ءِ عکس ءُ جزبگ ءِ شدت ءَ پُر اَنت۔ کہ آئی ءِ تہا حضرت امام حسین رضی اللہ اللہ جات ہمت، قربانی ءُ راستی ءِ مجسمہ ءِ دروشم ءَ پیش دارگ بوتگ ءُ دومی نیمگ ءَ یزید ظلم ءُ ناانصافی ءِ علامت انت۔ شاعری ءِ وسیلہ ءَ کربلا ءِ جنگ راست ءُ رد ءِ میان ءَ ابدی جنگ ءِ رنگ ءَ پدر بیت۔ عربی لبزانک ءِ تہا الفرازادق ءُ کمائل ابن زیاد ءِ وڑیں شاعراں کربلا ءِ شہیدانی غم ءُ احترام ءِ درشان کنوکیں شعر نبشتہ کتگ انت۔ فارسی لبزانک ءِ تہ ءَ مھتاشم کشانی وڑیں شاعراں اے وئیل ءِ باروا وتی مارشت درانگاز کتگ اَنت۔ کربلا ءِ حوالہ ءَ آئی ءِ نبشتانک انگت سداں سالاں پد وانگ ءُ یات کنگ بنت۔ کربلا ءِ جنگ ءَ نوکیں سیاسی ءُ انقلابی لبزانک ءِ سرا ہم اثر جتگ۔ 1979 ءِ ایران ءِ اسلامی انقلاب ءِ وھد ءَ کربلا ءِ حوالہ یک زبردستیں الہام ءِ وسیلہ جوڑ بوت۔ نعرہ "ہر روچ عاشورہ انت، ہر زمین کربلا انت” انصاف، مزاحمت، ءُ اخلاقی ہمت ءِ علامت ءِ دروشم ءَ ابھر بوت۔ جنوبی ایشیا ءَ فیض احمد فیض ءِ وڑیں نامداریں شاعراں آمریت ءِ سرا تنقید کنگ ءُ چاگردی انصاف ءِ وکالت کنگ ءِ ھاترا گوں کربلا ءَ نزوریں ہمگرنچی کش اِتگ۔ آئی ءِ کارانی تہا کربلا چہ جغرافیہ ءَ ابید ظلم ءِ ھلاپ ءَ استحکام ءِ یک جہانی استعارہ یے جوڑ بوتگ۔ اے پی پی ءَ گوں ھاسیں گپ ءُ تران ءَ شاعر، نبشتہ کار ءُ پاکستان کونسل ٹرسٹ ءِ میڈیا پروگرامانی ڈائریکٹر حمید قیصر ءَ کربلا ءِ ھما وھد ءِ لبزانک ءِ تہ ءَ برجاھیں ارزشت ءِ سر ءَ چمشانک داتگ۔ آئی ءَ گوشت کہ عاشورہ ءِ روچ لبزانکی دگنیا ءَ بے دروریں ارزشتے داریت، اے روچ مارا راست ءُ رد ءِ فرق کنگ ءِ سکین دنت ءُ مارا راستی ءِ گوما مھکم بوھگ ءِ جرات ھم دنت۔امام حسین (رضی اللہ) ءُ آئی ءِ ھاندان ءُ ھمراھانی قربانی بے وھد اِنت، کہ انصاف ءُ راستی ءِ شوھاز کنوکیں درستیں مردماں الہام دنت۔“ صادقین فاؤنڈیشن ءِ منصوبہ بندی ءُ دیمروئی ءِ ڈائریکٹر زہیب چوہدری ءَ ہم ہمے لیکہ ءِ درشانی کتگ۔ آئی ءَ گوشت کہ کربلا ایوک ءَ جنگ نہ انت، اے ھک ءُ رد ءِ نیام ءَ یک راجدپتری پیسلہ یے کہ انسانیت ءِ ضمیر ءَ را واب ءَ چہ پاد کنت ۔ حضرت امام حسین (رضی اللہ اللہ) کہ کربلا ءِ سُتکگیں ریگزارانی سرا تُنّیگ بوتگ ات مارا وانینتگ ات کہ راستیں سوبمندی راستی ءِ ہاترا قربانی دیگ ءَ انت۔ آئی ءَ گیش کرتگ کہ عاشورہ یک یات ءِ بستار ءَ کار کنت کہ دروگ ھرچ وڑیں زوراک بہ بیت راستی ءِ توار ھچبر بے توار کنگ نہ بیت۔ آئی ءَ گوشت کہ عاشورہ صبر، قربانی ءُ اصول آنی سر ءَ بے دروریں جزم ءِ سکین ءَ دنت۔ راجی زبان ءِ دیمروئی ءِ کارگس ءِ جارکش ءَ کربلا ءِ میراث ءِ رکھینگ ءِ تہ ءَ لبزانک ءِ ھاسیں کرد ءِ سر ءَ زور پر دات۔ آئی ءَ گوشت کہ لبزانک ءَ اے پجار لچہ، شعر ءُ زاری ءِ وسیلگ ءَ زندگ داشتگ۔ اے نہ ایوک ءَ راجدپتری یات اِنت بلکیں یک زندگیں اخلاقی قوت یے ھم اِنت۔ کربلا مارا ناانصافی ءِ ھلاپ ءَ گپ جنگ ءِ ھاترا دلبڈی دنت، مظلوم ءِ ھمراھی ءَ اوشتات کنت ءُ وتی ضمیر ءِ توار ءَ گوشدار ایت۔ آئی ءَ ھشدار دات کہ حضرت امام حسین ءِ پیغام ءَ را ایوک ءَ رسم ءُ رواج آنی تہ ءَ محدود کنگ ءَ چہ ایشی ءِ زوراکیں بزانت ءَ را کم کنگ ءِ ھترہ ھست۔ اگاں مرچیگیں ورنا، نبشتہ کار ءُ رہشون وتی کار ءُ زند ءِ تہا اے پیغام ءِ جوہر ءَ وتی تہا زرت کن انت گڑا کربلا ایوک ءَ یک یات ءِ نہ مانیت بلکیں یک انچیں برجاہیں تحریکے جوڑ بیت کہ آ گپ ءُ کرد ءِ وسیلہ ءَ گونجگ ءَ برجاہ بیت، کہ دنیا ءَ را یک اصولی مزاحمت ءِ طاقت ءِ یات ءَ برگ ءَ انت۔