چیئرمین سینیٹ گیلانی اطالوی کھان ءِ ہفتگ ءِ گالا ڈنر ءَ بہر زوریت

اسلام آباد۔29نومبر  (اے پی پی):سینیٹ ءِ چیئرمین سیدیوسف رضا گیلانی ءَ اسلام آباد ءَ اطالوی سفیر مارلینا آرملینءُ واجہ ڈومینیکو پیلونی ءِ نیمگ ءَ برجم داشتگیں اطالوی کھان ءِ ہفتگ ءِ گالا ڈنر ءَ بہر زرتگ۔ اے مراگش ءَ سفارتی حلقہ ءُ میاں اوستمانی براتی ءِ نمائندگاں بہر زرتگ ات کہ ایشی ءِ مول ءُ مراد اٹلی ءِ کھان ءِ آرٹ ءُ دود ءُ ربیدگی ورثہ ءَ را پدر کنگ ات۔ شمبے ءِ روچ ءَ سینیٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ چیئرمین سینیٹ ءَ وتی گشتانک ءِ تہ ءَ اطالوی سفیرءُ جناب پیلونی ءِ مہمانداریءُ اے شانداریں مراگش ءِ برجم دارگ ءِ ھاترا دل ءِ جہلانکی ءَ چہ منت واری ءِ درشانی کتگ۔ آئی ءَ گوشت کہ اے مراگش ایوک ءَ تام ءُ وراک آنی جشن نہ اِنت بلکیں پاک اٹلی دوستی، دود ءُ ربیدگی سیادیءُ دیریں وت مہ وتی سیادی آنی احترام ءِ عکس اِنت۔ چیئرمین سینیٹ سیدیوسف رضا گیلانی ءَ پاکستان ءُ اٹلی ءِ نیام ءَ گرم ءُ جوڑیشت ءِ سیادی ءِ سر ءَ رژنائی شنگ کت ءُ گوشت کہ اٹلییورپ ءَ پاکستان ءِ یک ھاسیں اقتصادی شریک انت۔ آئی ءَ تجارت، سرمایہ کاری، وانگ ءُ زانگ، دود ءُ ربیدگءُ پارلیمانی سفارتکاری ءَ ھوار جتا جتائیں شوبگ آنی تہ ءَ کمک ءِ برجاھیں تہ ءَ گیشی ءِ سر ءَ وش اتک کت۔ آئیءَ اٹلیءَ نندوکیں پاکستانی کمیونٹی ئِ ازمت آناں ساڑات ئُُ گوشت کہ پاکستانی ڈائسپورا دوئیں ملک آنی نیامءَ مردم ئِ نیامءَ مہلوک ئِ سیادیءَ را گیش مھکم کنگ ئِ تہ ءَ ھاسیں کرد پیلو کنگ ءَ انت۔ چیئرمین سینیٹ ءَ اے موہ ءِ سر ءَ ثقافتی سفارتکاری ءِ ارزشت ءِ سر ءَ ھم زور پر دات۔ آئی ءَ گوشت کہ راج وردن ءُ وراک، ازم، موسیقیءُ دود ءُ ربیدگ ءِ تبادلہ ءِ وسیلگ ءَ یک دومی ءِ گوما نزیک بنت، ایشی ءَ چہ دل آناں یکجا کنت ءُ وت مہ وتی مھکمیں رنگ ءَ مھکم بیت۔ آئی ءَ دل یکیمی دات کہ پاکستان پارلیمانی ءُ ادارگی کمک ءَ را گیش مھکم کنگ ءِ واھشت مند اِنت۔ پاکستان ءِ سینیٹ اطالوی سینیٹءُ ایندگر ریاستی ادارگ آنی گوما پارلیمانی سیادی ءَ را گیش مھکم کنگ ءِ واستہ سرجمی ءَ جزم انت۔ گڈسرا چیئرمین سینیٹ ءَ یک رندے پدا میزبان آنی منت گپت ءُ اطالوی سفارت خانہ ءَ را اے جوانیں مراگش ءِ سوبمندیں برجم دارگ ءِ سرا مبارکی دات کہ ایشی ءَ چہ اطالوی دود ءُ ربیدگ ءِ منگ ءَ دوئیں ملک آنی نیام ءَ دوستی ءِ جذبہ ءَ را گیش دیمروئی دات۔