اے آئی ءِ وسیلگ ءَ سرجمیں دگنیا ءَ ھیال ءُ لیکہ ءُ وسیلگ آنی بھر ءُ بانگ ءَ چہ دیمروئی ءِ نوکیں راہ پچ بنت، شزہ فاطمہ خواجہ

اسلام آباد ۔29نومبر  (اے پی پی):انفارمیشن ٹیکنالوجی ءِ وفاقی وزیر شزہ فاطمہ خواجہ ءَ گوشت کہ نوکیں انفارمیشن ٹیکنالوجی ھاسیں رنگ ءَ آرٹیفیشل انٹیلی جنس ءِ وسیلگ ءَ ما سرجمیں دگنیا ءَ اے وڑیں ھیال ءُ لیکہ، مہارت ءُ وسیلگ آنی بھر ءُ بانگ ءَ را توانمند کت کن ایں کہ ایشی ءَ چہ دیمروئی ءِ نوکیں راہ پچ بنت۔ آئی ءَ گوشت کہ ھمک مزنیں سفر کسانیں گامگیج ءَ چہ بندات بیت مرچی پاکستان آئی ٹی شوبگ ءَ اے نوکیں سفر ءَ را بندات کنگ ءَ انت۔ آئی ءَ شمبے ءِ روچ ءَ اسلام آباد ءَ آئی ٹی ءِ ھوالگ ءَ یک ھاسیں مراگشے ءَ گوں تران کنگ ءَ ات۔ وفاقی وزیر ءَ گوشت کہ پاکستان آیوکیں سال آنی تہ ءَ ٹیکنالوجی ءِ سر ءَ بنیات ءِ سر ءَ ترندی ءَ گوں دیم ءَ روگ ءَ اِنت ءُ ورنا آنی ساچشتی توانائی اے سفر ءِ تہ ءَ ارزشتی ایں سرمایہ اِنت۔ شزہ فاطمہ خواجہ ءَ گوشت کہ دگنیا گوں ترندی ءَ ڈیجیٹل معیشت ءِ نیمگ ءَ رھادگ اِنت، اے رنگیں جاور ھال ءَ آئی ٹی شوبگ نہ ایوک ءَ روزگار ءِ موہ پیداک کنگ ءَ اَنت بلکینگ ءَ پاکستان ءِ جھان ءِ پجار ءَ را ھم مھکم کنگ ءَ اِنت۔ آئی ءَ اے گپ ءِ سر ءَ زور پر دات کہ آرٹیفیشل انٹیلی جنس ٹیکنالوجی یک انچیں زوراکیں وسیلگ اِنت کہ ایشی ءِ وسیلگ ءَ ھیال آناں حقیقت ءِ تہ ءَ بدل کنگ بیت۔ وفاقی وزیر ءَ گیش گوشت کہ آیوکیں وھد ءِ جوڑیشت ایوک ءَ ٹیکنالوجی ءِ گوما ممکن نہ اِنت بلکیں اخلاقی قدر، انسانی شفقت ءُ ذمہ واری ءِ احساس ءِ گوما ھم ممکن اِنت۔ آئی ءَ گوشت کہ پاکستانی ورنا آنی تہ ءَ ھیل کاری، ازم ءُ ورنا آنی تہ ءَ کمی نیست۔ بس ھما پلیٹ فارم ءِ لوٹ اِنت کہ آ وتی مہارت ءَ دنیا ءِ دیم ءَ پیش بہ دار اَنت۔ آئی ءَ گوشت کہ حکومت آئی ٹی ءِ شوبگ ءَ اصلاحات، سرمایہ کاری ءُ نوکیں تربیت ءِ وسیلگ ءَ اے سفر ءَ را ترند کنگ ءَ انت تانکہ پاکستان آیوکیں وھد ءِ گلوبل ٹیکنالوجی مارکیٹ ءَ مھکمیں جاگہ ​​ءِ رسگ ءَ بہ بیت۔ مراگش ءَ مزنیں کساسے ءَ آئی ٹی ءِ ماہرین، نودربر، پالیسی ساز ءُ نجی شعبہ ءِ نمائندگاں بہر زرتگ ات، آہاں وفاقی وزیر ءِ وژن ءِ توسیپ کتگ ات ءُ گشتگ ات کہ پاکستان ءِ آئی ٹی شعبہ ءَ خطہ ءَ مزنیں کساس ءَ دیمروئی ءِ صلاحیت است انت۔