مسلم لیگ ن ءَ گوستگیں گچین کاری ءَ جوانیں کارکردگی پیش داشتگ ءُ مردماں سرجمیں دل یکیمی ءِ درشانی کتگ، وفاقی وزیر قیصر احمد شیخ

چنیوٹ۔ 29 نومبر (اے پی پی):وفاقی وزیر سرمایہ کاری بورڈ قیصر احمد شیخ ءَ شمبے ءِ روچ ءَ وتی گس ءَ سرکاری جیڈھ آناں گوشدارگ ءِ واستہ پچیں آمید گس برجم داشتگ ات، ایشی ءِ تہ ءَ مزنیں کساس ءَ شہری آں بھر زرتگ ات۔ فدرال ءِ جتا جتائیں محکمہ آنی ضلعی افسر ھم پچیں آمید گس ءَ ھوار بوتگ اَنت کہ آھاں جاہ ءِ سر ءَ لس شکایت ءُ جیڈھ آناں چار ءُ تپاسی کتگ ءُ زوتیں کارروائی ءِ دل یکیمی داتگ۔ اے موہ ءِ سر ءَ میڈیا ءَ گوں تران کنان ءَ وفاقی وزیر قیصر احمد شیخ ءَ ملک ءِ سیاسی ءُ اقتصادی جاور ھال آنی بابت ءَ سرجمی ءَ گپ جت۔ آئی ءَ گوشت کہ اللہ تعالیٰ ءِ فضل ءُ کرم ءَ چہ گوستگیں گچین کاری آنی تہ ءَ مسلم لیگ ن ءَ جوانیں کارکردگی پیش داشتگ ءُ الس ءَ سرجمیں دل یکیمی ءِ درشانی کتگ، خیبر پختونخوا ءِ وڑیں صوبہ ءَ ھم مسلم لیگ ن ءَ را ھاسیں سوبمندی رستگ۔ آئی ءَ گوشت کہ پی ٹی آئی ءِ گچین کاری ءِ بائیکاٹ کنگ راست نہ بوتگ، گوستگیں وھد ءَ ھم بازیں پارٹی آنی نیمگ ءَ بائیکاٹ بوتگ بلے ایشی ءَ کدی نپ نہ رستگ۔ بائیکاٹ پارٹی ءِ پوزیشن ءَ نزور کنت، اگاں آیاں گچینکاری ءَ بہر بہ زرتیں ءُ وتی کیس لس مھلوک ءِ دیم ءَ ایر بکتیں گڑا شرتر اَت۔ وزیر ءَ گوشت کہ اتحادی گل آنی گوما برجاھیں مشورہ آنی تہ ءَ راجی نپ اولی رند ءَ دارگ بوھگ ءَ انت۔ اے وھد ءَ این ایف سی ایوارڈ ھم یک ھاسیں جیڈھ ءِ انت ءُ درستیں صوبہ آنی رضامندی ءَ گوں یک انچیں فارمولہ ءِ پیسلہ کنگ ءِ کوشست کنگ بوھگ ءَ انت کہ ایشی ءَ چہ فیڈریشن ءَ را مھکم کنگ ءُ مالیاتی خسارہ ءَ را کم کنگ بہ بیت۔ آئی ءَ گوشت کہ ملکی سیمسر آنی سر ءَ جاور ھال حساس انت وھدیکہ پاکستان ءَ را دفاعی بجٹ ءِ تہ ءَ مزنیں چیلنج آنی دیمپانی انت۔ اے گپ ءِ باوجود مئے فورسز ءَ مدام اے گپ ثابت کتگ کہ آ دنیا ءِ شرتریں فورسز ءِ تہا ہوار انت۔\378