اسرائیل ءَ فلسطینیانی سرا زوراکی ءِ الزامانی پٹ ءُ پول ءِ کمیٹی جوڑ کنت، اقوام متحدہ

اقوام متحدہ۔29نومبر  (اے پی پی):اقوام متحدہ ءِ زوراکی ءِ ھلاسی ءِ کمیٹی ءَ اسرائیل ءَ چہ لوٹ کتگ کہ آ یک کمیٹی یے جوڑ بہ کنت کہ آ اسرائیل ءُ فلسطین ءِ جیڈھ ءِ رد ءَ زوراکی ءِ سرجمیں الزام آنی پٹ ءُ پول ءَ بہ کنت۔ العربیہ ءِ رد ءَ اقوام متحدہ ءِ کمیٹی ءَ وتی بیان ءَ اسرائیل ءَ را لوٹ کتگ کہ آ یک ماہر، آزات، غیر جانبدار ءُ موثریں پٹ ءُ پولی کمیٹی یے جوڑ بہ کنت کہ آ انوگیں سلاہ بندیں جنگ ءِ وھد ءَ بوتگیں زوراکی ءُ بدسلوکی ءِ درستیں الزام آنی چار ءُ تپاسی ءَ بہ کنت دانکہ مزنیں افسراں ھوار ذمہ وار آنی سر ءَ کارروائی کنگ بہ بیت۔ کمیٹی ءَ 7 اکتوبر 2023 ءَ فلسطینی جنگولی گل ءُ دگہ ٹولیانی نیمگ ءَ اسرائیل ءِ سر ءَ اُرش ءِ یک رند ءَ مذمت کتگ ءُ اے اُرشانی سر ءَ اسرائیل ءِ پسو ءِ بے تناسبیں رنگ ءِ سر ءَ ھم سکیں دلگوشی ءِ درشانی کتگ۔ نومبر ءِ میان ءَ اسرائیل ءِ جاور ھالانی چار ءُ تپاسی ءِ وھد ءَ کمیٹی ءِ نامینتگیں نمائندہ پیٹر فیڈل کیسنگ ءَ اے گپ ءِ نیمگ ءَ دلگوش گور کتگ ات کہ کمیٹی ءِ باسک بازیں وسیلگاں چہ رستگیں مزنیں کساسے ءَ رپورٹانی تہ ءَ ھواریں ھالانی سر ءَ سک باز جیڑگ ءَ اَنت۔ اے رپورٹ اسرائیل ءِ زنداناں فلسطینیانی ھلاپ ءَ زھگ ءُ نزوریں گلانی ھلاپ ءَ منظم ءُ مزنیں کچے ءَ زوراکی ءُ بدیں سلوک ءِ نشانی اَنت۔ اقوام متحدہ ءِ ادارہ ءُ غیر سرکاری ادارہانی رپورٹانی تہا شکنجہ ءِ شوہاز گندگ بیت۔ زلم ءُ زوراکی چوش کہ شدیدیں جتگ ءُ جنین ءِ سرا ٹپّگ، برقی جھٹکا، زبردستی دراجیں دباؤ ءِ جاہ، زانت ءُ زانت ءَ غیر انسانی جاور ءُ گریبی، واٹر بورڈنگ ءُ مزنیں کچے ءَ جنسی ذلت ءُ تجاوز ءِ دھمکی داتگ۔ کمیٹی ءَ مغربی کنارہ ءَ یہودی آبادکارانی نیمگ ءَ چہ ٹارچر ءُ انتظامی بندیگ کنگ ءِ کارمرد کنگ ءِ بابت ءَ ھم جیڑہ درشان کتگ ءُ گْوشتگ کہ اے گامگیج بے دروریں کچ ءَ سر بوتگ اَنت۔ کمیٹی ءَ جست ءُ پرس ءِ وھد ءَ زوراکی ءِ رھبند ءِ رد ءَ نا اعلان کتگیں ”ھاسیں وسیلہ“ ءِ برجاھیں کارمرد کنگ ءِ سر ءَ ھم جیڑگ ءِ درشانی کتگ۔ اے درگت ءَ کمیٹی ءَ اسرائیل ءَ را زور داتگ کہ آ ٹارچر ءِ ھاترا یک جتاھیں مجرمانہ جرمے جوڑ بہ کنت کہ آئی ءِ تعریف کنونشن ءِ رد ءَ کنگ بہ بیت ءُ کارمرز بوتگیں ”ھاسیں وسیلہ“ ءِ دروشم ءِ بابت ءَ راستیں ھال ءُ اھوال بہ دنت ءُ اے گپ ءَ دل یکیمی بہ کنت کہ ٹارچر یا بدسلوکی ءِ جواز ءِ ھاترا ھچ وڑیں غیر معمولی جاور ھال ءِ کارمرز کنگ مہ بیت۔ نومبر ءِ میان ءَ کمیٹی ءِ دیم ءَ داتگیں پسو ءِ تہ ءَ اسرائیل ءِ ڈل ءِ ھمکاریں سروک ءُ اقوام متحدہ ءِ تہ ءَ اسرائیل ءِ سفیر ڈینیل میرون ءَ وتی ملک ءِ سر ءَ جتگیں الزام رد کتگ ءُ اے گپ ءِ سر ءَ زور پر داتگ کہ اسرائیل وتی قدر ءُ قیمت ءُ اخلاقی رہبندانی رد ءَ وتی زمہ واری آناں پیلو کنگ ءِ ھاترا جزم اِنت۔