ملک ءِ معیشت ءِ رفتار ءِ سبب ءَ ڈھانچہ ءِ گہتری کار، ڈیجیٹل ٹرانسفارمیشن، شریں حکومت داری، مالیاتی نظم ءُ ضبط ءُ سرجمیں اقتصادی برجائی ءِ ھاتر ءَ برجاھیں کوشست آنی سبب ءَ جوانیں رنگ ءَ برجاہ اِنت، وزارت ھزانگ

اسلام آباد۔28نومبر  (اے پی پی): وفاقی وزارت ھزانگ  ءَ گوشت کہ ملک ءِ معیشت ءِ رفتار ءِ سبب ءَ ڈھانچہ ءِ گہتری کار، ڈیجیٹل ٹرانسفارمیشن، جوانیں گورننس، مالیاتی نظم و ضبط ءُ سرجمیں اقتصادی برجائی ءِ واستہ برجاھیں کوشست آنی سبب ءَ جوانیں رنگ ءَ برجاہ اِنت ءُ نومبر ءَ افراط زر ءِ شرح 5 ءَ چہ 6درسد ءِ نیام ءَ بوھگ ءِ امکان اِنت۔ اے گپ وزارت مالیات ءِ نیمگ ءَ جمعہ ءِ روچ ءَ شنگ بوتگیں ماہانہ اقتصادی اپ ڈیٹ رپورٹ ءِ تہ ءَ گشگ بوتگ۔ وزارت خزانہ ءِ رد ءَ پاکستان ءِ اقتصادی جاور ھال سرجمی ءَ جوانیں رنگ ءَ بیان کنگ بوھگ ءَ انت، صنعتی چست ءُ ایر گہتر بوھگ ءَ انت ءُ اقتصادی گہتری کار ءِ آسر ءَ برجائی آھگ ءَ انت۔ نومبر ءَ افراط زر ءِ شرح 5.0 ءُ 6.0 درسد ءِ نیام ءَ بوھگ ءِ امکان انت کہ ایشی ءِ مستریں سبب کھان ءِ نرخ ءُ کشت  ءُ کشاری پیداوار ءِ سرا دباؤ انت۔ رپورٹ ءِ رد ءَ اگاں چہ کشار ءِ جاور ھال آمیزش انت بلے کشت  ءُ کشاری ان پٹ ءُ سرکاری کمک ءِ ھست بوھگ ءِ سبب ءَ گمان انت کہ جاری ربیعی موسم ءَ سپلائی جوان ءُ مھکم مانیت۔ رپورٹ ءِ رد ءَ پیداوار ءِ لوٹ آناں پیلو کنگ ءِ واستہ درآمدات ءِ تہ ءَ گیشی ءِ باوجود کرنٹ اکاؤنٹ ءِ خسارہ متوقع حد ءِ تہ ءَ اِنت کہ ایشی ءِ سبب برآمدات ءِ تہ ءَ مدام گیشی ءُ زرّ ءِ دیم دیگ ءِ مھکمیں آمد اِنت۔ سرجمی ءَ ملک ءِ معیشت ءِ رفتار ءِ جوان بوھگ ءِ گمان اِنت کہ ایشی ءِ کمک ءَ برجاھیں ڈھانچہ ءِ گہتری کار، ڈیجیٹل ٹرانسفارمیشن، جوانیں حکومت داری، مالیاتی نظم و ضبط ءُ سرجمیں معیشت ءِ برجائی ءِ برجاھیں کوشست آنی وسیلگ ءَ کنگ بوھگ ءَ اِنت۔ اقتصادی اپ ڈیٹ ءِ رد ءَ مالی سال ءِ اولی 4ماہ آنی تہ ءَ درملک ءَ پاکستانی آنی نیمگ ءَ چہ دیم داتگیں زرّ آنی کساس 12.955ارب ڈالر ریکارڈ کنگ بوتگ کہ گوستگیں مالی سال ءِ ھمے وھد ءِ 11.850ارب ڈالر ءَ چہ 9.3درسد گیش اِنت۔ اے وھد ءِ تہ ءَ ملکی برآمدات ءِ کساس 10.6ارب ڈالر بوتگ کہ گوستگیں مالی سال ءِ ھمے وھد ءِ تہ ءَ 10.4ارب ڈالر ءِ کساس ءَ چہ 2درسد گیش اِنت۔ درآمد ءِ بل 20.7ارب ڈالر بوتگ کہ گوستگیں مالی سال ءِ ھمے وھد ءِ 18.9ارب ڈالر ءَ چہ 9.6ارب ڈالر گیش اِنت۔ مالی سال ءِ اولی چار ماہ ءَ کرنٹ اکاؤنٹ ءِ خسارہ 733 ملین ڈالر بوتگ کہ گوستگیں مالی سال ءِ ہمے وھد ءَ 206 ملین ڈالر بوتگ۔ اے وھد ءِ تہ ءَ ملک ءَ درملکی براہ راست سرمایہ کاری ءِ کساس 747.7ملین ڈالر ریکارڈ کنگ بوتگ کہ گوستگیں مالی سال ءِ ھمے وھد ءِ تہ ءَ 1.010ارب ڈالر ءِ کساس ءَ چہ 26درسد کم اِنت۔ نومبر 2025 ءَ زرّ ءِ ذخائر ءِ کساس 19.7ارب ڈالر ریکارڈ کنگ بوتگ کہ ایشی ءِ تہ ءَ اسٹیٹ بینک ءِ زرّ ءِ ذخیرہ 14.5ارب ڈالر ءُ تجارتی بینک آنی گور ءَ 5.2ارب ڈالر ءِ زرّ ءِ زرّ بوتگ۔ گوستگیں سال ءِ 15 جون ءَ زرّ ءِ ذخیرہ ءِ کساس 16ارب ڈالر ءِ کساس ءَ ریکارڈ کنگ بوتگ۔ کہ ایشی ءِ تہ ءَ اسٹیٹ بینک ءِ گوما زرّ ءِ ذخائر ءِ کساس 11.3 ارب ڈالر بوتگ ءُ تجارتی بینک آنی زرّ ءِ ذخائر ءِ کساس 4.7 ارب ڈالر بوتگ۔ مالی سال ءِ اولی سہ ماہی ءَ ایف بی آر ءِ آمدنی ءِ کساس 3.834کرب کلدار ریکارڈ کنگ بوتگ کہ گوستگیں مالی سال ءِ ھمے وھد ءِ مقابلہ ءَ 11.4درسد گیش اِنت۔ غیر ٹیکس ءِ آمدنی ءِ کساس 3.008کرب کلدار ریکارڈ کنگ بوتگ کہ گوستگیں مالی سال ءِ ھمے وھد ءِ مقابلہ ءَ 0.4درسد کم اِنت۔ مالیاتی بیلنس ءِ حجم 2.119 کھرب کلدار ریکارڈ کنگ بوتگ کہ گوستگیں مالی سال ءِ ہمے وھد ءَ 1.896 کھرب کلدار بوتگ۔ پرائمری بیلنس ءِ حجم 3.497 کھرب کلدار ریکارڈ کنگ بوتگ کہ گوستگیں مالی سال ءِ اولی سہ ماہی ءَ 3.20 کھرب کلدار بوتگ۔ مالی سال ءِ اولی سہ ماہی ءَ کشت  ءُ کشاری شوبگ داتگیں وام ءِ کساس 845.3ارب کلدار ریکارڈ کنگ بوتگ کہ گوستگیں مالی سال ءِ ھمے وھد ءِ 712.8ارب کلدار ءَ چہ 18.6درسد گیش اِنت۔ اولی سہ ماہی ءَ صفر حجم (ایم ٹو) ءَ سالانہ بنیاد ءَ 2.15 درسد کمی بوتگ۔ اکتوبر ءَ پالیسی ءِ شرح 11درسد ریکارڈ کنگ بوتگ کہ گوستگیں سال ءِ 4 نومبر ءَ 15درسد بوتگ۔ مالی سال ءِ اولی چار ماہ آنی تہ ءَ افراط زر ءِ شرح ءِ تہ ءَ 4.7درسد ریکارڈ کنگ بوتگ کہ گوستگیں سال ءِ ھمے وھد ءَ 8.7درسد بوتگ۔ اولی سہ ماہی ءَ مزنیں صنعت آنی پیداوار ءِ تہ ءَ 4.08درسد ءِ گیشی ریکارڈ کنگ بوتگ۔ نومبر 2025 ءَ پاکستان اسٹاک ایکسچینج ءِ 100 انڈیکس 165373 پوائنٹ بوتگ۔ گوستگیں سال ءِ 27 نومبر ءَ کے ایس ای 100 انڈیکس 99269 پوائنٹ ءِ سر ءَ ریکارڈ کنگ بوتگ۔ اے وھد ءِ تہ ءَ پاکستان ءِ تہ ءَ اسٹاک ایکسچینج ءِ انڈیکس ءَ 66.6درسد گیشی بوتگ۔ نومبر ءَ مارکیٹ کیپیٹلائزیشن 66.79ارب ڈالر ریکارڈ کنگ بوتگ کہ گوستگیں سال ءِ 27 نومبر ءَ 45.24ارب ڈالر بوتگ۔ نوکیں کمپنی آنی رجسٹریشن ءَ سالانہ بنیاد ءَ 35.6درسد ءِ گیشی بوتگ۔