مزن وزیر شہباز شریف ءِ سروکی ءَ توامیں شوبگ آنی تہ ءَ شفافیت، کارکردگی ءُ سرکاری آسراتی آناں گہتر کنگ ءِ واستہ عملی گامگیج زورگ بوھگ ءَ انت، اویس احمد خان لغاری 118 ہیلپ لائن سروس ءِ بنگیج ءِ مراگش ءَ گوں گشتانک

اسلام آباد۔28نومبر  (اے پی پی): توانائی ءِ وفاقی وزیر سردار اویس احمد خان لغاری ءَ گوشت کہ مزن وزیر محمد شہباز شریف ءِ سروکی ءَ درستیں شوبگ آنی تہ ءَ شفافیت، کارکردگی ءُ سرکاری آسراتی آناں گہتر کنگ ءِ واستہ عملی گامگیج زورگ بوھگ ءَ انت، کسٹومر آناں توانائی ءِ گچین کاری ءِ واستہ آسراتی پجارینگ ءِ کوشست کنگ بوھگ ءَ انت۔ ءُ درستیں شوبگ آنی تہ ءَ سفارش ءِ دود ءُ ربیدگ ءِ آسر مزن وزیر ءِ وژن اِنت۔ آئی ءَ اے ھیالانی درشانی جمعہ ءِ روچ ءَ بجلی ءِ کارمرز کنوک آنی آسراتی ءِ واستہ جوڑ بوتگیں 118 ہیلپ لائن سروس ءِ بنگیج ءِ مراگش ءَ گشتانک دیان ءَ کت۔ وفاقی وزیر ءَ گوشت کہ وزارت توانائی ءِ تہ ءَ اصلاحات ءِ ایجنڈا ءَ را سرجمیں رنگ ءَ عمل کنگ بوھگ ءَ انت۔ نوکیں سروس ءِ وسیلگ ءَ بجلی ءِ صارفین ءِ شکایت زوت ریکارڈ کنگ بنت، آہانی جاور ہر پڑ ءَ زانگ بنت ءُ محکمہ ءِ ہچ وڑیں ردی یا رد کنگ ءِ سرا چمشانک دیگ نہ بیت۔ آئی ءَ گوشت کہ 118 سروس ءِ وسیلگ ءَ مئے ھمک ردی الس ءِ دیم ءَ پاشک کنگ بیت، اے ھما اصل شفافیت انت کہ ادارگ احتساب ءِ واستہ وت ءَ پیش کنت۔ عویس لغاری ءَ گوشت کہ گوستگیں 18ماہ آنی تہ ءَ ھما اصلاحات ءُ گہتری آنی آسر دیم ءَ اتکگ اَنت آ مزن وزیر محمد شہباز شریف، فیلڈ مارشل سید عاصم منیر، عدلیہ ءُ وفاقی ءُ صوبائی حکومت آنی یکجائی کوشست آنی آسر اَنت۔ آئی ءَ گوشت کہ اے نظام ءِ تہ ءَ ھرچ وڑیں نااہلی یا ردی ءِ ذمہ واری وزیر، چیئرمین، چیف کمرشل آفیسر، کسٹمر کیئر ہیڈ ءُ سیادی داروکیں واکدار آنی سر ءَ بیت۔ وفاقی وزیر ءَ گوشت کہ مزن وزیر ءِ وزارت توانائی ءَ ھوار توامیں ادارگ آنی تہ ءَ سفارش ءِ دود ءُ ربیدگ ءَ را سرجمی ءَ ھلاس کنگ ءِ واستہ یک ھاسیں وژن ءِ است انت۔ آئی ءَ یات دات کہ 2017-18 ءَ آ ھم ھمے وزارت ءِ ذمہ وار بوتگ بلے وھدے آ اپوزیشن ءَ بوتگ گڑا محکمہ ءَ بنی گالا ءِ زور ءِ چیر ءَ ایشی ءِ نیمگ ءَ ھچ وڑیں دلگوشی نہ داتگ۔ وھدے کہ منی وتی لوگ ءِ بجلی ھلاس بوت گڑا فون ءِ پسو دیگ ءَ کس نیست ات۔ آئی ءَ گوشت کہ گرماگ ءِ وھد ءَ 10 ءَ چہ 18 کلاک ڈن ءَ درکپگ ءِ درد ءَ من سرپد باں، ھمے ھاتر ءَ مرچی یک انچیں نظام جوڑ کنگ بوھگ ءَ انت کہ ھمک شہری ءَ را یک وڑیں آسراتی بہ دنت۔ عویس لغاری ءَ گوشت کہ اے نوکیں شکایت ءِ نظام ءِ وسیلگ ءَ سرجمیں ملک ءَ درستیں صارف چہ وتی کلاس ءَ ابید وتی شکایت آناں یکیں پلیٹ فارم ءِ سر ءَ درج کنگ ءِ وس ءَ دار اَنت۔ اے یک مزنیں چاگردی اصلاحاتے، یک انچیں انقلابے کہ ایشی ءَ چہ پاکستان ءِ 38 ملین لوگ آناں براہ راست نپ رسیت۔ آئی ءَ گوشت کہ اے سروس ءِ وسیلگ ءَ کارمرز کنوک ھر شکایت ءِ رجسٹریشن، وھد، روچ ءُ جاور ھال ءِ رجسٹریشن ءِ وس ءَ دار ایت، ایشی ءَ چہ کارندہ آنی کارکردگی ءِ سرجمیں احتساب ءِ وس ءُ واک رس ایت۔ وفاقی وزیر ءَ سیکرٹری پاور ڈویژن ءِ کارکردگی ساڑاتگ ءُ گوشت کہ آئی ءَ ملک ءِ جتا جتائیں دمگ آنی تہ ءَ جوانیں ازمت کتگ ءُ اے پروگرام ءِ جوانیں رنگ ءَ سرجمی ءَ گوں اگاں ریٹائر بہ بیت گڈا ذہنی مطمئن افسر ءِ بستار ءَ ریٹائر بیت۔ عویس لغاری ءَ گوشت کہ آ مزن وزیر ءَ چہ لوٹ کنت کہ آ وزارت توانائی ءِ ماہانہ کارکردگی ءِ اشارہ آناں وزارتی احتساب ءِ نظام ءِ بھر جوڑ بہ کنت تانکہ اصلاحات آنی برجائی ءَ را دل یکیمی کنگ بہ بیت۔