بنجائی وزیر مواصلات عبدالعلیم خان نا ترکیہ نا وزیر واپار پروفیسر ڈاکٹر عمر بولات تون اوڑدہی

استنبول۔ 28 نومبر (اے پی پی) بنجائی وزیرمواصلات عبدالعلیم خان ترکیہ نا وزیر واپار پروفیسر ڈاکٹر عمر بولات تون استنبول اٹی 5 می ای سی او وزارتی دیوان نا وخت آ اوڑدہی کرے۔ وزارت مواصلات آن جمعہ نادے آ جاری بیان نا رداٹ اوڑدہی ٹی پاکستان و ترکیہ نا متکن آ برادرانہ تعلقداری و ودوک آ کمکاری آ است جمی نا درشانی ءِ کننگا وخت اس کہ پاکستان ترکیہ  ہڑتوم آکنڈآتا واپار ءِ بروک آ سال تیٹی 5 ارب ڈالر اسکان ودفنگ آ امناہم مس۔ فریق آک اقتصادی، واپاری و زرکاری تعلقداری تے پین سوگو کننگ نا عزم انا درشانی ءِ کرسا تین پہ تینی است خواہی نا چندی امور تیا گپ وتران و غٹ بشخ آتیٹی کمکاری ءِ ودفنگ آامنا کریر۔ داوخت آ بنجائی وزیر عبدالعلیم خان ای سی او وزارتی دیوان نا سرسہب اڈتننگ آ ترکیہ ءِ مبارکبادی ترسا پارے کہ علاقائی واپار و کمکاری ءِ مون آ دننگ کن ترکیہ نا کوشست سفت نا قابل ءِ، ترکیہ پاکستانی سُو و برنج نا برآمد آتیا سجفنگ کیک۔ اوپارے کہ پاکستان نا آب اٹ مصنوعات مسابقتی نہاد آتیا دستیاب ءِ و برآمد ترکیہ کن فائدہ ئی مریک۔