بنجاھی تہی کار ءِ وزیر محسن نقوی ءَ ایف سی ءِ ہیڈ کوارٹر پشاور ءِ تر ءُ تاب کتگ ءُ بنجاھی کانسٹیبلری ءِ افسر ءُ ورنا آں  گوں یکوئی ءِ درشانی کتگ

اسلام آباد۔28نومبر  (اے پی پی): بنجاھی وزیر تہی کار محسن نقوی بنجاھی ہیڈ کوارٹر ءِ سر ءَ وت کُش اُرش ءَ پد بنجاھی کانسٹیبلری ءِ افسر ءُ سپاھیگ آنی گوما یکوئی ءِ درشان کنگ ءِ واستہ ایف سی ءِ ہیڈ کوارٹر پشاور ءَ سر بوتگ۔ وزیر تہی کار ءَ شہید آنی یادگار ءِ تر ءُ تاب کت، شہید آنی ابدی امن ءِ واستہ گلدستہ ایر کت ءُ فاتحہ پیش کت۔ ایشی ءَ پد محسن نقوی ءَ اُرش ءِ جاہ ءِ چار ءُ تپاسی کتگ ءُ فیڈرل کانسٹیبلری ءِ کارندہ ءُ سپاھیگاں گوں گند ءُ نند کتگ ءُ اودا آئی ءَ یک ھاسیں دیوان ءِ سروکی ھم کتگ۔ محسن نقوی ءَ را بریفنگ ءِ تہ ءَ گشگ بوتگ کہ فتنہ الخوارج ءَ گوں سیادی داروکیں ناشرکار آنی اُرش وھد ءِ سر ءَ کارروائی کنگ ءِ سبب ءَ ناکام بوتگ۔ بریفنگ ءِ رد ءَ ایف سی ءِ بہادریں سپاھیگاں مزنیں دلیری ءِ گوما جنگ کتگ ءُ ایوک ءَ سئے منٹ ءِ تہ ءَ وت کُش اُرش کنوک ھلاس کتگ اَنت۔ اے موہ ءِ سر ءَ وزیر تہی کار ءَ فیڈرل کانسٹیبلری ءِ سپاھیگ آنی بھادری ءُ غیر معمولی جزبگ ءَ را مزنیں شگر ءُ منت گپت ءُ گوشت کہ من شھید آنی کربانی ءَ را سلام پیش کناں۔ شھیداں وتی سر ندر کُت اَنت ءُ ناشرکارانی بدیں نیت بے سوب کُت اَنت۔ ایشانی قربانی کدی بے سوب نہ بیت۔ وزیر ءِ تہی کار ءَ گوشت کہ شھید آناں بہادری ءِ ابدمانیں مثال پیش کتگ ءُ دژمن ءِ بزدلیں اُرش ءَ را پد ءُ رند کتگ۔ آئی ءَ گوشت کہ ھندی سرپرستی ءَ ناشرکار آنی ھلاپ ءَ ھما جرات ءِ گوما جنگ کتگ ستا کرز انت۔ محسن نقوی ءَ دل یکیمی دات کہ شہیدانی کھول ءِ ھیالداری ایشانی وتی کھول ءِ وڑ ءَ کنگ بیت ءُ حکومت ھمک رنگ ءَ گوں آھاں اوشتاتگ ۔ آئی جی خبر پختونخوا پولیس ذوالفقار حمد، کمانڈنٹ فیڈرل کانسٹیبلری نظیر گڈا ءُ اے دگہ مزنیں سول ءُ فوجی کارندہ ھم ساڑی بوتگ انت۔