مزن وزیر ءِ ھاسیں کمکار رانا احسان افضل ءَ ابوجا ءَ نائیجیریا ءِ درئی کارانی وزیر یوسف میتاما ٹیگر ءَ گوں گند ءُ نند کتگ، دو نیمگی سیادی ءَ را گیش کنگ ءِ راہ ءُ درانی سر ءَ گپ ءُ تران

اسلام آباد۔28نومبر  (اے پی پی): تجارت ءِ ھوالگ ءَ مزن وزیر ءِ ھاسیں کمکار رانا احسان افضل ءَ جمعہ ءِ روچ ءَ نائیجیریا ءِ درئی کارانی وزیر یوسف میتاما ٹیگر ءَ گوں ابوجا ءَ وتی کارگس ءَ گند ءُ نند کت، ایشی ءِ ساھت ءَ آھاں اقتصادی کمک ءَ را گیش کنگ، تجارتی ءُ سرمایہ کاری ءِ سیادی ءَ را گیش کنگ ءُ دو ملک آنی نیام ءَ مھکمیں دو نیمگی سیادی آناں دیمروئی دیگ ءِ راہ آنی سر ءَ تران کت۔ دوئیں نیمگ ءَ نائیجیریا ءُ پاکستان ءِ سیادی ءَ را نوکیں بالاد ءَ سر کنگ ءِ واستہ مھکمیں سیاسی جزم ءِ درشان کتگ۔ گند ءُ نند ءَ نائیجیریا ءُ پاکستان ءِ نیام ءَ دو نیمگی تجارتی معاہدے ءَ را گڈی رنگ دیگ ءُ دستخط کنگ ءِ معاہدے ءِ سر ءَ گڈ سر بوت ءُ تکنیکی ٹیم آناں ہدایت کت کہ آ کم چہ کم وھد ءِ تہ ءَ جیڈھ آناں گیش ءُ گیوار بہ کن اَنت۔ ایشی ءَ ابید نائیجیریا ءِ تر ءُ تاب کنوکیں پاکستانی کاروباری مردم، سرمایہ کار ءُ سیل ءُ سواد کنوک آنی واستہ ویزہ ءِ آسراتی ءُ پاکستان ءِ تر ءُ تاب کنوکیں نائیجیریا ءِ شہری آنی واستہ وت مہ وتی آسراتی ءِ بابت ءَ گپ ءُ تران کنگ بوتگ۔ دوئیں نیمگاں توانائی، کشت ءُ کشاری، ٹیکسٹائل، دواسازی، انفارمیشن ٹیکنالوجی ءُ حلال تجارت ءَ ھوار کلیدی شوبگ آنی تہ ءَ تجارت ءَ را گیش کنگ ءُ کثیر جہتی فورم آنی تہ ءَ یک دومی ءِ کمک ءِ واستہ وتی یکجائی جزم ءِ پدا زور دات۔ دوئیں ملکاں اے گپ ءِ سر ءَ دل یکیمی درشان کت کہ اے گپ ءُ تران ءَ چہ نزیکیں وھد ءَ ٹھوس اقتصادی نپ ءُ مردم ءِ نیام ءَ رابطہ گیش بنت۔