وفاقی وزیر تہی کار محسن نقوی ءَ ویڈیو لنک ءِ وسیلگ ءَ آسٹریلوی ہم ھمکار ٹونی برک ءَ گوں گند ءُ نند کتگ، ناجائزیں امیگریشن ءِ گر ءُ دار ءِ بابت ءَ گپ ءُ تران کتگ، آسٹریلیا ءِ کرکٹ ٹیم ءِ پاکستان ءِ آیوکیں تر ءُ تاب ءِ بابت ءَ گپ ءُ تران

اسلام آباد۔28نومبر  (اے پی پی): وفاقی وزیر تہی کار محسن نقوی ءُ آسٹریلیا ءِ وزیر تہی کار ٹونی برک ءِ نیام ءَ ویڈیو لنک ءِ وسیلگ ءَ یک ھاسیں گند ءُ نند ءِ برجم دارگ بوت، ایشی ءِ تہ ءَ وت مہ وتی مفاد ءُ سیکورٹی کمک ءِ جیڈھ آنی سر ءَ سرجمیں رنگ ءَ گپ ءُ تران کنگ بوت۔ ویڈیو کانفرنس ءِ تہ ءَ ناجائزیں امیگریشن ءِ گر ءُ دار ءِ واستہ پاکستان ءُ آسٹریلیا ءِ نیام ءَ کمک ءَ را گیش کنگ ءِ سر ءَ تپاک کنگ بوت۔ دوئیں ملک آں اے گپ ءِ سر ءَ زور پر دات کہ انسانی دزگیری ءُ ناجائزیں روگ ءُ آیگ ءِ حلاف ءَ یکجائی حکمت عملی ءِ سرا زور دیگ بیت۔ ویڈیو کانفرنس ءِ ساھت ءَ پولیس ءُ نیم فوجی فورس ءِ افسر آنی ادارگی صلاحیت ءَ را گیش گہتر کنگ ءِ واستہ تربیتی پروگرام آناں بندات کنگ ءِ ھوالگ ءَ ھم گپ ءُ تران کنگ بوت۔ ایشی ءَ ابید آسٹریلوی ادارگ آنی نیام ءَ نیشنل سائبر کرائمز انوسٹی گیشن ایجنسی ءُ ایف آئی اے ءِ گوما کمک ءَ را گیش کنگ ءِ امکانات آنی سر ءَ ھم گپ ءُ تران کنگ بوتگ۔ دوئیں تہی کارانی وزیر آں دو نیمگی کمک ءَ را گیش موثر جوڑ کنگ ءِ واستہ یکجائی ورکنگ گروپ ءِ جوڑ کنگ ءِ ھم پیسلہ کتگ۔ گند ءُ نند ءَ آسٹریلیا ءِ کرکٹ ٹیم ءِ آیوکیں پاکستان ءِ تر ءُ تاب ءِ بابت ءَ ھم گپ ءُ تران کنگ بوت، ایشی ءِ سر ءَ تہی کارانی وزیر محسن نقوی ءَ وتی آسٹریلوی ھمکار ءَ را ٹیم ءِ واستہ کتگیں سیکورٹی بندوبست آنی بابت ءَ سرپد کت۔ گڈسرا وفاقی وزیر تہی کار محسن نقوی ءَ آسٹریلیا ءِ وزیر تہی کار ءَ را پاکستان ءِ تر ءُ تاب ءِ یک شلی ءَ  دعوت دات، وھدیکہ دوئیں تہی کار وزیراں دو نیمگی سیادی ءَ را گیش مھکم ءُ مھکم کنگ ءِ ھاترا وتی عزم ءِ پدا زور دات۔