بنجائی وزیر داخلہ محسن نقوی نا آسٹریلوی ہم منصب ٹونی برک اتون ویڈیولنک اوڑدہی

اسلام آباد۔ 28 نومبر (اے پی پی) بنجائی وزیرداخلہ محسن نقوی و آسٹریلیا نا وزیرداخلہ ٹونی برک انا نیام اٹ ویڈیو لنک انا کمک اٹ اہم اوڑدہی مس، ہراٹی تین پہ تینی است خواہی نا امور و سیکورٹی کمکاری آ سرجمی اٹ گپ وتران کننگا۔ ویڈیو کانفرنس اٹی پاکستان و آسٹریلیا نا نیام اٹ غیرکانودی امیگریشن نا توننگ کن شریداری نا کاریم ءِ ودفنگ آ امنا کننگا۔ ہڑتوم آملک آک داہیت آ زورشاغار کہ انسانی اسمگلنگ و غیرکانودی ہن وبر نا برخلاف اسیجائی حکمت عملی اس تینا کننگک۔ ویڈیو کانفرنس اٹی پولیس و پیراملٹری فورس آتا آفیسر آتا ادارہ جاتی کاریم نا کچ اٹی پین گچینی کن ہیلکاری پروگرام تا بناءِ کننگ آ ہم گپ وتران کننگا۔ داکان بیدس نیشنل سائبر کرائمز انوسٹی گیشن ایجنسی و ایف آئی اے تون آسٹریلوی ادارہ غاتانیام اٹ کمکاری ءِ ودفنگ نا گمان تیا ہم گپ وتران مس۔ ہڑتوم آ وزیرداخلہ غاک ہڑتوم آ کنڈآتا کمکاری ءِ پین گچین کننگ کن اسیجائی ورکنگ گروپ اس جوڑ کننگ نا فیصلہ ہم کریر۔ اوڑدہی ٹی آسٹریلیا نا کرکٹ ٹیم نا بروک آ دورہ پاکستان نا بابت ہم گپ وتران کننگا ہراڑآ وزیرداخلہ محسن نقوی آسٹریلوی ہم منصب ءِ ٹیم اکن کروک آ سیکورٹی بست وبند آتیان معلومدار کرے۔ ایسر اٹی بنجائی وزیرداخلہ محسن نقوی آسٹریلوی وزیرداخلہ ءِ پاکستان نا دورہ ءِ کننگ نا باضابطہ سلہ خلک وخت اس کہ ہڑتوم آ وزیرداخلہ غاک ہڑتوم آ کنڈآتا تعلقداری تے پین سوگو و محکم کننگ نا عزم انا درشانی ءِ کریر۔