پاکستان تاجکستان اٹی دہشت گردجلہو اٹی چینی شاری تا زوال کننگ آ چین و تاجکستان تون ہڑزخواہی و یکجہتی نا درشانی ءِ کیک، ترجمان دفترخارجہ

اسلام آباد۔ 28 نومبر(اے پی پی) پاکستان اوغانستان تون تینا سیم انا خڑک تاجکستان اٹی اسہ دہشت گرد جلہو اسے ٹی چینی شاری تا نہادی جون تا زیان آ عوامی جمہوریہ چین نا حکومت و الس تون اوار اوار تاجکستان نا حکومت و الس تون تینا ہڑزخواہی و سوگو یکجہتی نا درشانی ءِ کرینے۔ ترجمان دفترخارجہ نا کنڈآن جاری بیان اٹی پاننگانے کہ پاکستان چینی شاری تیا مروک آ دا جلہو نا پیدوار لوز آتیٹی مذمت ءِ کیک۔ داواقعہ ٹی سلہہ بند ڈرون تا کاریم اٹ اتنگ اوغانستان آن بروک آ خطرہ نا سنگینی و اونا پداٹ کارفرمابندغ آتا ڈھیٹی ءِ پیدوار کیک۔ بیان نا رداٹ اسہ ہمسایہ سے نا وڑاٹ ہرا وار وار اوغان گل زمین آن دہشت گردی نا جلہو آتا گواچی مسنے، پاکستانی الس چینی سنگت و تاجک شریدار آتا ڈکھیائی و غم ءِ پورو وڑاٹ سرپند و اوٹی شریک ءِ۔ ترجمان تینا بیان اٹی مستی پارے کہ پاکستان پدریسہ داہیت آ زور شاغانے کہ اوغان گل زمین تینا ہمسایہ یا پین ملک اسے نا برخلاف دہشت گردی کن بایدے کاریم اٹ اتنگپ، دہشت گرد آتا کنڈآن اوغان گل زمین نا وار وار آ کاریم اٹ اتنگ و اوغان طالبان حکومت نا سرپرستی ٹی اوفتا پدریسہ ساڑی گری مچ آ ڈیہہ و گیشتر جہانی برادری کن گڑتی اسے۔ بیان نا رداٹ اوغان گل زمین آن دہشت گرد گروپ، اوفتا است بڈی ءِ کروک آ، کمکار و مالی کمک کروک آتا برخلاف پبی و پک ا نا قابل کارروائی ہی دا ودوک آ خطرہ تون مون تننگ نا اسٹ انگا کسر ءِ ، پاکستان تینا اسیجائی ہمسایہ ٹی امن، سوگوی و سلامتی ءِ مون آ دننگ کن چین، تاجکستان و ایلو علاقائی شریدار آتون اواری اٹ کاریم کرسا کیک۔