پاکستان زرگزرانی اصلاحات و نجی بشخ انا کماشی ٹی شونداری نا پوسکن آ دور اٹی پترینگ انگ ءِ، وزیراعظم شہبا ز شریف نا پاکستان و بحرین نا سوگو تعلقداری تے زرگزرانی کمکاری ٹی بدل کننگ نا عزم انا درشان

منامہ۔ 27 نومبر (اے پی پی) وزیراعظم محمد شہباز شریف پاکستان و بحرین نا سوگو تعلقداری تے زرگزرانی کمکاری ٹی بدل کننگ نا عزم انا درشان و بحرین نا زرکارآتے پاکستان اٹی چندی بشخ آتیٹی زرکاری نا سلہ خلسا پارینے کہ پاکستان زرگزرانی اصلاحات و نجی بشخ انا کماشی ٹی شونداری نا پوسکن آ دور اٹی پترینگ انگ ءِ، کشت وکشار، آئی ٹی، معدنیات، توانائی و ایلو بشخ آتیٹی زرکاری نا پوسکن آ درگہ غاک ملنگانو، بحرین نا زرکار آک پاکستان آ بریر و ننتون شریداری کیر۔نن زرکاری، اسیجائی ڈٹ و کاروباری کمکاری کن ہرممکن آسراتی فراوان کینہ، پاکستان تون افرادی قوت ، وسیلہ ، مون آ بروک منڈی، سٹریٹجک محل و وقوع و ورناتا بھلو واک اسے، پاکستان وخلیج کمکار کونسل نا نیام  اٹ آجوواپار نا معاہدہ گڈیکو ریسہ غاتیٹی ءِ، دا معاہدہ واپاری تعلقداری تے پوسکن آ بڑزی تسکان سرکیک۔ اوداخیال آتا درشانی ءِ  پنچ شنبے نادے آ داڑے کاروباری برادری نا دود آن تران کرساکرے۔ وزیراعظم پارے کہ بے کچ فیاضی و گرم جوشی اٹ بخیر اٹ پاننگ آ بحرین نا حکومت و الس نا منت وار اُٹ، نن تینا بحرینی ایلم خاص کر شاہ بحرین و ولی عہد و وزیراعظم نا مہمانداری آن فائدہ ہرفینن ہراوڑاٹ ننے بخیر کننگا اومدام ننے یات سلک، بحرین برسا ہندن محسوس مننگ ءِ دُن کہ نن تینا ہی اُراغا بسونن۔ وزیراعظم پارے کہ بحرین و پاکستان اِرا ایلم ملک ءُ و ننا تعلقداری کیہی دہائی تیا تالان ءِ، دا تعلقداری دودوربیدہ ئی ، مذہبی ، تین پہ تینی شر ف و پت آ تالان ءِ و ہندا ننا تعلقداری تا تمبہ ءِ۔ وزیراعظم پارے کہ ہڑتوم آملک آتا نیام اٹ تزویراتی کمکاری کیہی دہائی آن ساڑی ءُ ولے اواینو او تعلقداری تے پین ودفنگ کن بسنے۔ وزیراعظم پارے کہ شاہ حمد بن عیسیٰ الخلیفہ و ولی عہد و وزیراعظم تون پارینے کہ پاکستان ایلم ملک بحرین تون کشت وکشار، آئی ٹی، اے آئی، فن ٹیک و ایلو غٹ بشخ آتون اوار اقتصادی کمکاری ءِ مون آ دننگ کن تیار ءِ، نن دا بشخ آتیٹی تینا کوشست، علم، آزموندہ و اسہ ایلو تون کمکاری نا عزم انا کمک اٹ ہم گرنچی ودی کننگ کینہ۔ وزیراعظم پارے کہ اونا دورہ نا مسخت اقتصادی بشخ آتیٹی پوسکن پیش رفت اتنگ ءِ، شاہ بحرین و ولی عہد و وزیراعظم نا پاکستان تون بدل مفروک وابستگی آ اوفتا بے کچ منت وار اُٹ۔ وزیراعظم پارے کہ ننا اوڑدہی تا چاگڑد بالکل اسہ خاہوت تون اواری اٹ تولنگ آنبار ئس دا اوڑدہی بے کچ بامسخت و نتیجہ خیز مسنے، ہندا بنداو آ ای پاننگ کیوہ کہ ای داڑے مہمان افٹ بلکن تینا خاہوت نا بندغ، تینا بحرینی ایلم و ایڑھ تتون ملنگ کن بسونٹ۔ وزیراعظم پارے کہ پاکستان اٹی آبادی نا گیشتری ورناتیا تالان ءِ، ورناک ننا واک ءُ ننا 60 درسد ورناتا وئی 15 آن 30 سال انا نیام اٹی ءِ، ورنا آبادی اسہ چیلنج، بھلو نعمت و اسہ موقع اس ہم ارے، چینی کہاوت نا رداٹ دااسہ چیلنج اس ہم ارے و اسہ زبردست ءُ موقع اس ہم ارے نن تینا ورناتے واکدار کرسا داچیلنج ءِ عظیم موقع ٹی بدل کننگ کن سنبرینگوک اُن، اوفتے آئی ٹی، اے آئی، فنی و کسبی مہارت و ایلو بشخ آتیٹی تربیت ترسا دا چیلنج ءِ موقع ٹی بدل کینہ و تینا بحرینی کاروباری ایلم تتون اواری اٹ نن دا بشخ آتیٹی اسہ زبردست ءُ قوت اس جوڑ مرینہ۔ وزیراعظم پارے کہ ہنداوخت ءِ کہ داموقع غان فائدہ ہرفنگے انتئے کہ وخت و لہر کس اسے نا انتظار ءِ کپسہ، داہرسا خوشی مریک کہ بحرین اٹی ننا متحرک پاکستانی کمیونٹی اسہ لکھ آن زیات نا کچ اٹی ساڑی ءُ ، داکمیونٹی ننکن گمر ناسوب ءُ، ہراملک انا ہم ای دورہ ءِ کرینٹ ای پاکستانی کمیونٹی تون گپ وتران کرینٹ و ای ہمیڑے پاکستانی تا داستان تے بنگونٹ ہرافتا پاکستان تون مہرومریبت وخت اس ہم کم متنے دُن تو اوفک تینا لائخی وخواری ءِ ایلو ملک و دودوربیدہ غاتا شونداری کن وقف کرینو۔ وزیراعظم پارے کہ پاکستانی شناخت جغرافیہ سے نا پابند اف اوہراڑے کہ مریر دا شناخت دا پاکستانی تا است آتیٹی ساڑی مریک، داڑے بحرین اٹی ہم ہندا جوزہ شک و شبہ غان ایڑتر پیدوار وڑاٹ نظربریک، عظیم پاکستانی تے بحرین وپاکستان ہڑتوم آ تیکن خذمت آتیا سلام پیش کیوہ، داپاکستان نا عظیم سفیر ءُ و پاکستان نا قومی زرگزرانی شونداری ٹی بشخ شاغنگ آ اوفتیا گمر ءِ۔ وزیراعظم پارے کہ بحرین اٹی رہینگوک پاکستانی تا خواری و کوشست آتیان کٹیاکروک آ زر نہادی زرراہی تس نا دروشم اٹ تدوک آ مالی سال اٹی 48 کروڑ 40 لکھ ڈالر اسکان مسنے، دا بھاز قابل قدر ءِ ، شاہ بحرین نا پاکستانی تیکن است انا بھلنی اٹ مخ تفی آ اوفتا منت وار اُٹ۔ وزیراعظم پارے کہ پاکستانی ایلم و ایڑھ تیان خواست کیوہ کہ او نئے بیرہ پاکستان بلکن بحرین نا ہم عظیم سفیر جوڑمریر انتئے کہ پاکستان و بحرین اسہ جون اِرا است ءُ و ننا است اسہ ایلو تون سُرک، کنے یقین ءِ کہ نم تینا زبردست خذمت آتیان تینا بحرینی ایلم وایڑھ تے تینے آ گمر کننگ آ بیوس کیرے، نمکن پاکستان و کنا درگہ مدام ملوک مریک ۔ وزیراعظم پارے کہ شاہ حمد بن عیسی الخلیفہ نا بصیرت افروز، متحرک و دانشمندانہ سرکڑدہ ئی و بحرین نا ولی عہد و وزیراعظم نا عظیم کماشی و راہشونی ٹی بحرین زرگزرانی شونداری، مالیاتی جدت و انسانی مرکزیت آ تالان شونداری نا اسہ مشعل نا وڑاٹ مون آبسنے، پاکستان بحرین نا شونداری نا ماڈل آن بھاز زہمی ءِ۔ اوپارے کہ پاکستان گیشتر وارخواہی  ، کسبکاری ، وسیلہ و صارف آتا ودوک آ کچ والا مارکیٹ نا حامل ملک ءِ ہرا تزویراتی محل و وقوع تخک ، بحرین نا مالیاتی مہارت، کاروباری بصیرت و جہانی نقطہ نظر نا شریداری مرے تو پاکستانی منڈیک گیشتر گمان آتا حامل ءُ۔ اوپارے کہ پاکستان پنجرجاتی اصلاحات نا عمل آن گدرینگ انگ ءِ ہرا زرگزرانی اصلاحات، ڈیجیٹل جدیدیت و نجی بشخ انا کماشی ٹی شونداری کن فیصلہ کن کڑد انا حامل مسنے، نن خیسن آ فیتہ نا اڑاند آتے مدامی کن چٹفینن۔ تینا ضابطہ غاتے سوگو کرینن، کشاری کاروبار، آئی ٹی، معدنیات، توانائی وسیل وسوات کون آ پوسکن آ بشخ آتیٹی مریس مد شریداری کن ملانن۔ وزیراعظم پارے کہ بحرین نا نائب وزیراعظم، وزیرخزانہ، وزیر صنعت، وزیرخارجہ و بحرین نا کاروباری ادارہ غاتا زرکارآک پاکستان آ بریر نن نم تون اواری اٹ تولسا کاریم کننگ خوانہ، نما عظیم آزموندہ و مہارت آن نن ہیل کینہ، نم تینا سلاہ و علم آن پاکستان نا صنعت و کشت وکشار ءِ متحرک کبو۔ وزیراعظم پارے کہ پاکستان و خلیج کمکار کونسل نا نیام اٹ آجوواپار نا معاہدہ گڈیکو ریسہ غاتیٹی ءِ ہراڑآ زوت دستخط مننگ نا گمان ءِ، اوپارے کہ بحرین وژن 2020 ءِ مون آ درسا وژن 2050نا بنداو ءِ تخنگ ءِ، نن پاکستان ءِ اسہ اسیجائی زرگزرانی آخبت اسے نا حامل شریداری اسے نا وڑاٹ ہُننگ اُن۔