خیبر پختونخوا نا قبائلی علاقہ غاتیٹی خوارج آتا ہلوک آ بارودی مواد و سرنگ آتے تلف کننگ نا عمل ترندی اٹ برجا، 82 مربع کلومیٹر علاقہءِ کلیئر کننگا، پاک فوج انا 5 ورنا شہید

اسلام آباد۔ 27 نومبر (اے پی پی) پاک فوج انا کنڈآن خیبرپختونخوا نا قبائلی علاقہ غاتیٹی خوارج آتا ہلوک آ بارودی مواد و سرنگ آتے تلف کننگ نا عمل ترندی اٹ برجاءِ، دہشت گردی نا برخلاف جنگ اٹی خیبرپختونخواٹی خوارج آک دہشت گردی تالان کننگ و سیکورٹی فورس آتا کسر ءِ توننگ کن قبائلی علاقہ غاتیٹی بھلو کچ اسے آ بارودی سرنگ تالان کریر۔ سرجم حوال آتا رداٹ خیبرپختونخوا ٹی انسداد دہشت گردی آپریشن آن پد سیکورٹی فورس آک دا علاقہ غاتیٹی بھلو کچ اسے آ ڈی مائننگ نا عمل نا بناءِ کریر۔ پاکستان نا فوج انا بہادر ورناک تینا جون تے دلدست آ تخسا علاقہ ءِ بارودی سرنگ و گولہ بارود آتیان پاک کننگ ءُ۔ خیبرپختونخوا ٹی کل 114 مربع کلومیٹر علاقہ ٹی بارودی مواد و سرنگ آتا پیدواری ءِ کننگاسس۔ پاک فوج انا کسبی لائخی و سخت کوشست آتا سوب داتم اسکان 82 مربع کلومیٹر علاقہ ءِ پورو وڑاٹ کلیئر کننگانے۔ خیبرپختونخوا ٹی ایلو ماندہ علاقہ غاتا ڈی مائننگ آ دے ونن کاریم برجاءِ۔ ڈی مائننگ نا داخطرہ غان پُر کارروائی تیٹی پاک فوج انا 5 ورنا شہید وخت اس کہ 115 ورناتینا نت دُوتیان محروم مسنو۔ پاک فوج انا کنڈآن علاقہ غاتے بارودی مائننگ آن پاک کننگ نا مسخت الس ءِ شکست آن رکھ تخنگ ءِ۔ گیشتر وخت نادانستگی ٹی علاقہ نا چناک و ورناک بارودی مواد آتون گوازی کرسا شکست آتا گواچی مسر۔ 26 نومبر آ باجوڑ نا تحصیل خار انا خلق جنت شاہ ٹی اِرا ورناخوارج آتا ہلوک آ بارودی مواد آتا ترخنگ آن زوال کریر۔ داکان مست ہم باجوڑ ، لکی مروت و کیہی پین علاقہ غاتیٹی داوڑنا شکست پیش بسنے۔ شکست آتیان پین بچنگ کن المی ءِ کہ ہرا علاقہ غاک داسکان کلیئر متنو ہموجاگہ نا گزرگاہ تیان احتیاط کننگے۔