پاکستان متحدہ عرب امارات ءِ گوما وتی براتی سیادی ءَ سک باز ارزشت دنت، سید  یوسف رضا گیلانی

اسلام آباد۔27نومبر  (اے پی پی):   چیئرمین سینیٹ سید یوسف رضا گیلانی ءَ گوشت کہ پاکستان متحدہ عرب امارات ءِ گوما وتی براتی سیادی آناں سک باز ارزشت دنت کہ آ یکے دومی ءِ سر ءَ بھروسہ ءِ مھکمیں بُن ھشت، یکجاھیں مذھبی ءُ دود ءُ ربیدگ ءِ ارزشت ءُ دہائی آنی سیاسی، اقتصادی، چاگردی ءُ پارلیمانی کمک ءِ سر ءَ بندوک اَنت۔ اے ھیالانی درشانی آئی ءَ متحدہ عرب امارات ءَ امارات ءِ سفیر سالم محمد سالم البواب الزعبی ءَ گوں اسلام آباد ءَ گند ءُ نند ءِ ساھت ءَ کت۔ گند ءُ نند ءِ ساھت ءَ وت مہ وتی دلپوشی ءِ جیڈھ ءُ دوئیں ملک آنی نیام ءَ دیریں براتی سیادی ءَ را گیش مھکم کنگ ءِ جزم ءِ سر ءَ ھیال ریچی کنگ بوت۔ آئی ایس سی ءِ چیئرمین یوسف رضا گیلانی ءَ متحدہ عرب امارات ءِ سروکی ءُ الس ءَ را دل ءِ جہلانکی ءَ گوں دزبندی ءِ درشانی کت۔ چیئرمین ءَ اسلام آباد ءَ برجم داشتگیں بین پارلیمانی اسپیکر کانفرنس ءَ امارات ءِ ھاسیں بھر زوری ءُ فعالیں کرد ءِ توسیپ کت ءُ گوشت کہ امارات ءِ سرجمیں بھر زوری ءَ چہ کانفرنس ءِ گپ ءُ تران گیش موثر بوتگ ءُ دمگی یکوئی ءِ دیمروئی ءِ ھاترا آئی ءِ مھکمیں جزم ءَ را پدر کتگ۔ چیئرمین ءَ آئی ایس سی ءِ کرد ءِ سر ءَ زور پر دات کہ آ یک دیمروئی ءِ پلیٹ فارم ءِ رنگ ءَ انت کہ ایشی ءَ چہ پارلیمانی رہشون آناں یکجا کنگ بیت تانکہ آ یکجاھی ءَ جھان ءِ چیلنج آناں گیش ءُ گیوار بہ کن انت۔ چیئرمین ءَ گوستگیں سال آنی تہ ءَ دوئیں ملک آنی نیام ءَ گیش بوھوکیں سفارتی سیادی ءِ سر ءَ زور پر دات ءُ ایشی ءَ را دوئیں ملک آنی سروکی آنی وژن ءِ درشان لیک اِت۔ آئی ءَ گوشت کہ اپریل 2025 ءَ شیخ عبداللہ بن زاید النہیان ءِ پاکستان ءِ تر ءُ تاب ءُ شیخ خالد بن محمد بن زاید النہیان ءِ اولی پاکستان ءِ تر ءُ تاب ءَ چہ پاکستان ءُ امارات ءِ دوستی ءَ را گیش مھکم کتگ۔ آئی ءَ گوشت کہ پاکستان امارات ءِ صدر ءُ ابوظہبی ءِ حاکم شیخ محمد بن زاید النہیان ءِ آیوکیں تر ءُ تاب ءِ ودار ءَ انت۔ سید یوسف رضا گیلانی ءَ گوشت کہ تاں 2025ءَ دوئیں ملک آنی نیام ءَ دو نیمگی بیپار 10کلہ 1ارب امریکی ڈالر ءَ سر بوتگ، اے یک جوانیں دیمروئی یے انت۔ آئی ءَ تجارت، توانائی، ٹیکنالوجی، جان سلامتی ءُ انفراسٹرکچر ءِ شوبگ آنی تہ ءَ کمک ءَ را گیش کنگ ءُ اماراتی سرمایہ کاری ءَ را گیش کنگ ءِ لوٹ کتگ۔ امارات ءِ سفیر ءَ پاکستان ءَ را یک ھاسیں اقتصادی شریک ءِ لیکگ ءَ تجارت ءُ سرمایہ کاری ءِ تہ ءَ گیشی ءِ واستہ سرجمیں واھشت ءِ درشان کت۔ آئی ءَ چیئرمین سٹیسی ءِ مزن وزیر ءِ بستار ءَ پاکستان ءِ ازمت آنی حوالہ دات ءُ گوشت کہ آئی ءِ دور ءَ پاکستان ءُ امارات ءِ سیادی گیش مھکم بوتگ انت۔ پارلیمانی سفارتکاری ءِ ارزشت ءَ را پدر کنان ءَ چیئرمین ءَ پاکستان ءُ امارات دوستی گروپ ءُ پارلیمانی بیانیہ ءِ چیر دستی ءَ یکجائی پٹ ءُ پولی پروگرام آنی تجویز داتگ۔ آئی ءَ دمگی ایمنی، قابل تجدید توانائی ءُ اسٹریٹجک کمک ءِ ھوالگ ءَ دو نیمگی مجازی سیمینار آنی برجم دارگ ءِ ھم سفارش کتگ۔ چیئرمین سید  یوسف رضا گیلانی ءَ امارات ءِ سفیر ءَ گوں تران کنان ءَ گوشت کہ پاکستان ءُ بھارت ءِ نیام ءَ کش ءُ چیل ءِ بُنکی سبب جموں ءُ کشمیر ءِ سر ءَ دیریں جیڈھ اِنت ءُ جنوبی ایشیا ءَ دیریں امن ءُ ایمنی ھما وھد ءَ داں ممکن نہ اِنت کہ اے جیڈھ ءِ انصاف ءِ گیواری اقوام متحدہ ءِ قرارداد ءُ کشمی راج ءِ رد ءَ دست کپ ایت۔ آئی ءَ ھشدار داتگ کہ اے جیڈھ ءِ گیواری ءَ چہ دمگی ایمنی ءِ واستہ مزنیں ھترہ ءِ دیم ءَ کیت ءُ ایشی ءِ عادلانہ گیواری ءِ واستہ میاں اوستمانی براتی ءَ وتی کرد پیلو کنگ لوٹ ایت۔ چیئرمین ءَ دمگ ءَ امن ءُ ایمنی ءِ واستہ پاکستان ءِ بے دروریں جزم ءِ سر ءَ زور پر دیان ءَ گوشت کہ پاکستان امن دوستیں ملک اِنت بلے ھمک رنگ ءِ زوراک ءُ منفی پروپیگنڈا ءِ سر ءَ جوانیں پسو ءِ دنت۔ آئی ءَ بلوچستان ءَ ناشرکاری ءِ کار ءُ کرد ءُ آئی ءِ تہی کارانی تہ ءَ درملکی مداخلت ءِ سر ءَ سک باز جیڈھ ءِ درشانی کت ءُ سندھ ءِ آپانی معاہدہ ءَ ھوار میاں اوستمانی معاہدہ آنی سر ءَ عمل کنگ ءِ ارزشت ءِ سر ءَ زور پر دات۔ روس ءُ اوگانستان جیڈھ ءِ وھد ءَ پاکستان ءِ انسانی کمک ءِ ھوالگ ءَ آئی ءَ گوشت کہ پاکستان ءَ دہائی آنی تہ ءَ 3.5 ملین اوگان پناہ گزین آنی میزبانی کتگ ءُ نوں وھد اتکگ کہ میاں اوستمانی براتی ایشانی باوقار ءُ والنٹری  وطن واتر کنگ ءِ واستہ کار بہ کنت۔ چیئرمین ءَ گوشت کہ امارات ءَ پاکستانی کمیونٹی دوئیں ملک آنی سیادی ءِ تہ ءَ مھکمیں کرد ءَ پیلو کنت۔ آئی ءَ اماراتی حکومت ءِ منت گپت کہ آ امارات ءَ پاکستانی شہری آناں مدام کمک کنگ ءَ انت ءُ گوشت کہ ویزہ ءِ نرمی ءَ چہ روزگار، مزنیں وانگ ءُ زانگ ءُ مردم آنی نیام ءَ رابطہ ءِ موہ آناں گیش گیشی بیت۔ گند ءُ نند ءِ ساھت ءَ دفاعی کمک، تربیتی پروگرام، یکجائی مشق ءُ دفاعی زمہ واری آنی تہ ءَ برجاھیں کمک ءِ سر ءَ دل یکیمی ءِ درشان کت ءُ ھمے رنگ ءَ وت مہ وتی مفاد ءِ توامیں جیڈھ آنی سر ءَ دمگی کمک ءَ را برجاہ دارگ ءِ جزم ءِ درشان کت۔ امارات ءِ سفیر ءَ مہمان داری ءِ پد ءَ امارات ءِ چیئرمین سید یوسف رضا گیلانی ءِ شگر ءُ منت گپت ءُ توامیں شوبگ آنی تہ ءَ دو نیمگی کمک ءَ را گیش دیمروئی دیگ ءِ جزم ءِ درشان کت۔ آئی ءَ چیئرمین ءَ را بین پارلیمانی اسپیکر کانفرنس ءِ سوبمندیں برجم دارگ ءِ سر ءَ ھم مبارکی دات۔ گند ءُ نند ءِ ساھت ءَ پنجاب اسمبلی ملک وسیم مظہر راؤ، مشیر چیئرمین سینیٹ  ءُ  سفیر بین الپارلیمانی اسپیکرز کانفرنس مصباح کھر  ءُ  سینئر ڈائریکٹر جنرل پروٹوکول طارق بن وحید  ھم ساڑی ات۔